سحر كرة القدم.. حفنة أخطاء منحتنا هدف رائع وريمونتادا تاريخية

رامي يحيى
شاعر عامية وقاص مصري مهتم بالشأن النوبي ونقد الخطاب الديني

كاتب فضي له اكثر من 250+ مقال

في ليلة عيد العمال سنة 2019 كان جمهور كرة القدم على موعد مع ماتش توقع الجميع إنه هيكون قوي، لإنه بين أتنين من أقوى الفرق في العالم.. برشلونة بقيادة الخرافي ميسي ضد كتيبة يورجن كلوب والنجومية الجارفة لمو صلاح.

أحتفل عمال مدينة ليفربول نهارا بعيد العمال وفي الليل حل الغم على مشجعي الريدز منهم، بعد خسارة فريقهم بنتيجة 3-0، حيث ميسي قدم أداءه الفضائي المعتاد خصوصًا في لعبة الجون التالت.

الجون أتبروز تاريخيًا لإنه رقم 600 لميسي مع فرقته، وفنيًا بوصفه من الأجوان الإعجازية في تاريخ اللعبة، دفاعيًا كل حاجة صح بنسبة 100%.. اللعبة أبعد من 30 متر ورغم كده أتعمل حيطة من 4 لعيبة طوال كلهم عملوا jump عالي وراهم حارس عملاق واقف على نقطة التلت والتلتين.. وأخد خطوتين قبل ما يطير يقفل الزاوية تماما في خلال ثانية واحدة من لعب الكورة.

بس لمسة الكائن الفضائي اللي عامل فيها أرجنتيني للكورة بعتتها بالقوة والدقة اللازمة إنها توصل عند ألتقاء العارضة بالقايم في زمن أقل، أو زي ما بيقولوا في “ثانية إلا ثانية”. وفي نهاية الموسم فاز ميسي بجائزة أفضل هدف في البطولة عن اللعبة دي.

نتيجة 3-0 حسمت التأهل بدري بدري، خصوصا مع إصابة الثنائي الهجومي مو صلاح وفيرمينيو، وبقى الكلام عن ريمونتادا في الأنفيلد مجرد دعابة للسخرية من جمهور الريدز.

نتيجة مباراة العودة أخدت عظمتها من النتيجة الكبيرة في الذهاب ومن غياب ثنائي هجوم ليفربول مع كامل جاهزية صفوف المنافس الكبير والفورمة العالية لنجمه الأسطوري.

لو حذفنا الجون التالت عظمة ماتش العودة هتقل.. وهتقل أكتر وأكتر لو حذفنا مشاركة ميسي في لقاء العودة، تصوروا كده لو نتيجة ماتش الذهاب 2-0 بس.. ومافيش فضائيين في ماتش العودة، هل عودة الريدز في الأنفيلد كانت هتبقى بنفس الأهمية؟ أو كان جمهور البرسا هيعاني من ترومة الرابع اللي جابه أوريجي؟

الجون المعجزة حصل نتيجة لمجموعة من الأخطاء، رؤية خطأ من الحكم حسب على أثرها الفاول وأنذر فابينيو “خط وسط الليفر”.. في حين الرؤية السليمة فاول عكسي مع كارت أحمر مباشر لميسي.

القرار ده لو تم اتخاذه بشكل سليم كان هيغير كتير في نتيجة مباراة الذهاب ومن أهمية مباراة العودة ويمكن نتيجتها كمان.

النتيجة 2-0 فقط ومافيش ميسي في العودة، وأكيد يا عالم هل الطرد كان ممكن يأثر على نتيجة الإياب والليفر يستغل النقص العددي وضيق الفارق مثلا.

الجميع تقريبا هيتفق معايا على النتايج المترتبة على تغيير القرار، بس على أي أساس أنا باقول أن اللعبة فاول عكسي وكارت أحمر مباشر.

لما نشوف اللقطة كويس وبالتصوير البطئ نلاحظ أن فابينيو ماعترضش طريق ميسي.. على العكس تمامًا، ده ميسي هو اللي نط وضرب فابينيو بالبوكس.

https://twitter.com/xisco_manjon/status/1123694340096897026

فيديو اللعبة

خطأ تاني متعلق بلعبة الجون.. وهو في مكان لعب الكورة، الكورة أتلعبت من نقطة غير نقطة وقوع الخطأ المفترض، نقطة متقدمة ناحية المرمى بحوالي مترين أو أكتر.

سحر سحر