الاستعراب يختزل الهوية ويدمر آثار الأجداد

يستقتل السادة العروبجية (المُستعربين والناصريين والقومجية واليسار القومي وغيرهم من المُستلبين) في الإصرار على عروبة بلدنا دولةً وشعبًا.. أرضًا ومجتمعًا.. ثقافةً وحضارة.. وحتى “الطفل في المحارة” على رأي صديقي المخرج أدهم الصفتي، والموضوع متوغل في وجدانهم لدرجة أن بعضهم يمكن وصفه بيعاني من حالة استعراب لا إرادي.

العجيب وغير المفهوم، ع الأقل بالنسبالي، إن بعد كل هذا المجهود بيرجعوا يتخانقوا مع الأفروسنتريك وطبعًا مع اليهود لما يدعوا إنهم بناة الأهرام والحضارة الكميتية العريقة.

بتوع كُلُه

فريق العروبجية بيلعبوا بأسلوب استحواذي يضيق الخُلق؛ عايزين يستحوذوا على كل حاجة بما فيها أشياء تُناقض بعضها البعض.

تقرا في تاريخهم عن المعركة من دول تلاقيهم فيها هُمه المُنتصر والضحية في نفس العبوة.. “زمبؤلك كده”، يبقوا بيهاجموا بلاد الناس بس معاهم حق، ولما التاريخ ياخد دورته والإمبراطورية دي تنكسر.. يتغير مفهوم الحق ويبقوا الضحية واحتلال بلاد الناس يبقى جريمة.

في بلاد الفرنجة راشقين في معسكر أنصار المواطنة والحقوق الثقافية.. بس في أي بلد مُسيطرين عليها تلاقيهم يمين رجعي محافظ شايف كل كلام عن حقوق الأقليات هو بالضرورة مشروع خيانة “قومية”.

متبنيين المفهوم “البسماركي” الألماني للقومية؛ القايم على فكرة إن القومية ترتكز على وحدة اللغة، واللي تطورت تدريجيًا حتى وصلت للقومية العرقية وأسطورة تفوق الجنس الآري، وده حصل على أيد أدولف هتلر (1889 – 1945) مؤسس الرايخ التالت.. واللي حظى بدعم كتير من الرموز العربية والعروبية خلال الحرب العالمية التانية، زي ما سبق وأوضحت بالتفصيل هنا.

بالتالي بيقولوا إن العربي هو من تحدث العربية، وبيعتمدوا على تأصيل المفهوم ده بحديث منسوب للنبي بيقول: “ليست اللغة العربية من أحدكم بأمٍّ ولا أب، وإنما هي اللسان؛ فمن تكلم العربية فهو عربي“، وعملية التأصيل دي فيها مشكلتين كبار ومهمين جدًا.

• التأكيد على إن أي محاولة لتأصيل أي حاجة تخص العروبة لازم ترتكز على الإسلام كدين؛ فزي ما سبق كتبت العروبة كقومية مش ممكن تنشأ في معزل عن الإسلام فهو دايما مرجعيتها الرئيسية.
• الحديث نفسه مضروب أساسًا.

بس لما يحبوا يتمحكوا في حد ناجح ومابيتكلمش عربي زي زين الدين زيدان أو كريم بنزيما وغيرهم من المهاجرين الفرنسيين أصحاب الأصول الشمال أفريقية، هنا يتنقلوا فورًا لمربع “القومية العرقية” ويتكلموا عن “الدماء العربية”.

أما أعجب تكويشة فهي هجومهم ع “الكمايتة” و”الأفروسنتريك” في نفس الوقت، بدعوة إن مصر عربية وشعبها عربي بس هو صحاب حضارة وادي النيل؛ اللي ظهرت وتألقت واندثرت قبل ظهور العرب ع الساحة وأصحابها عمرهم ما نطقوا عربي.

“العقل الزوط[i]” للمثقف الْمَا مزبوط

لا ينفك الزول[ii] العروبجي أن يكُوريك[iii] آناء الليل وأطراف النهار في محاولة إثبات إننا مصريين الأصل عرب الثقافة؛ مع إنها سهلة ومش مستاهلة، إحنا دولة عابرة للقارات جُلها في أفريقيا وتِلتها في آسيا.. شعبها أفريقي غالبيته الكاسحة من الأقباط وفيه أقليات نوبية وأمازيغية وبعض القبائل العربية ولغتها الرسمية هي العربية.

لكنه العروبجي يظل يكُوريك ويكُوريك لإنه في الواقع تماهى مع الثقافة العربية بشكل أفقده هويته وبقى يتعامل مع نفسه بوصفه من أبناء شبه الجزيرة العربية؛ فتلاقيه يا كبدي مش قادر يحط عمرو بن العاص في نفس المربع مع زُملاتُه قمبيز والأسكندر ونابليون وكرومر وكل الغزاة، اللي نهبوا خيرات بلدنا لصالح إمبراطوريتهم الخاصة.

وبكده يبقى عندنا تيار عروبجي، محسوب ع النخبة المثقفة، بيقول إننا عرب.. وبيخون أي حد يقول إننا “كمايتة” أو “مصريين ناطقين بالعربية”، وتيار تاني إسلامنجي بيكفر أجدادنا وحضارتنا وشايف إن الإسلام هو مرجعيتنا الوحيدة، وإن المرجعية دي بتقول “أننا لازم نِتبَرَا من أجدادنا وتاريخهم“، كما صرح الشيخ عثمان الخميس.

والكلام ده مش جديد؛ ومش بس عشان كلمة “فرعون” ودلالتها القرآنية والكلام ده.. لع، الكلام ده قديم والمَقصَد منه إن كل الحضارات كافرة ومافيش أصل الإنسان ينفع ينتِمِيلُه إلا الإسلام، وده عن طريق تمجيد جيل المسلمين الأوائل، زي ما قال الكوز[iv] الشهير عبدالحي يوسف.

فهمسة في ودان شركاء الوطن من العروبجية، لو مش واخد بالك من مغزى كلام “الخميس” ومش فاهم كلام “عبحي” ومش واخد بالك إن “قبطي” بقى معناها “مسيحي”.. وإن اللغة القبطية بقى رسمي حِكر ع الكنيسة ومابتتدرسش غير في المعاهد الدينية المسيحية.. وأسماء زي مينا ورمسيس بقت أسامي مسيحية.. وإن ماعدش فاضل من أعيادنا المحلية غير “شم النسيم“.. وكتير من الناس فاكرة إنه “عيد مسيحيين”، لو كل ده عدا عليك أتمنى تكون شوفت التخريب المتعمد لجدارية جوه مقبرة “مريروكا” في سقارة.. وحجم ردود الأفعال.

التأثير الثقافي

عزيزي العروبجي هل خدت بالك إنه تخريب مُتعمد مش مجرد هبل إتنين حبيبة بينقشوا حروف اساميهم، ولا عيل مبرشم بيكتب “للذكرى الهباب وأيام العذاب”؟ هل انتبهت إن رد الفعل الجماهيري ع الواقعة دي أقل بمراحل من رد الفعل على هدم قبر واحدة من مستولدات محمد علي؟

طب ماسألتش نفسك لو بَدل المُجرم المجهول وجريمته الشنيعة كان فيه إتنين حبيبة حضنوا بعض ولا خطفوا فرنشاية بطعم التاريخ.. إيه اللي كان هيحصل؟

طب واخد بالك إن عيالنا يعرفوا عن تاريخ شبه الجزيرة العربية أكتر ما يعرفوا عن تاريخ بلدهم؟

طب هل ربطت في دماغك بين تأكيدك على عروبتنا ومهاجمتك وتخوينك للكمايتة و”صَهيَنِت” كل حد يقول إننا مش عرب.. بالإضافة لاحتفاء الإسلامجية بالعروبة وبتاريخ العرب وشيطنتهم لتاريخ أجدادنا، وبين إن المصريين يتشحتفوا ع الأثار “الإسلامية” أكتر من الآثار الكميتية.

هل ربطت بين كل ده وبين إن فيه مواطن “غالبا مصري” يتعمد تشويه آثر زي مقبرة “مريروكا”.. في تصرف شوفنا طالبان بتعمله مع تماثيل بودا والدواعش بيعملوه مع الآثار الآشورية والبابلية وحدانا الإخوان عملوه في متحف ملوي؟

الاستعراب بالعافية

أطرف ما في العروبجية هي إصرارهم على فرض العروبة لدرجة حربهم على جبهتين؛ جبهة ضد الشعوب غير العربية في منطقة الهلال الخصيب وبين النهرين وشمال أفريقيا، والجبهة التانية ضد الشعوب العربية الحقيقية في شبه جزيرة العرب.

فزي ما فيه أصوات غير عربية بترفض الانضواء تحت لواء القومية العروبية؛ كمان فيه أصوات عربية بترفض تمسح العروبجية فيهم كعرب.. وبيأكدوا إن العروبة مش مجرد عروبة لسان؛ إنما هي تاريخ مشترك يجمع مجموعة قبايل شبه الجزيرة مع بعض.

أسطورة التاريخ المشترك

صدع العروبجية رؤوسنا بالحديث عن التاريخ المشترك، وهم في سبيل ذلك “يصهينون” عن الغالبية العظمى من تاريخنا.

فلو مفهومهم عن التاريخ المشترك هو بداية من الغزو/الفتح العربي؛ يبقوا لتاني مرة بيرتكزوا على الإسلام كدين.. ده غير إنهم بينفضوا لآلاف السنين سبقت ظهور العرب ع الساحة؛ عشرات القرون كانت بلدنا فيهم بتعلم التاريخ الكتابة وعندها علاقات بحضارات ومجتمعات مختلفة ومتنوعة في المنطقة.. ماكنش من ضمنهم العرب.

إقرأ أيضا

أغنيات شيرين عبد الوهاب الجديدة الحائرة بين روتانا و بين البوتاجاز

أما لو كان قصدهم التاريخ المشترك بيبدء من نشأة فكرة القومية العربية، فده معناه إنهم بيتكلموا عن حوالي قرن، يعني بيهزروا رسمي. إذا كان الألف وشوية سنة بتوع الإسلام دول بالنسبة لتاريخنا يعتبروا يادوب مرحلة.

فزي ما عندنا الحقبة البطلمية والحقبة الرومانية عندنا كمان الحقبة العربية الإسلامية؛ فأنت سايب كل ده وجاي على أخر قرن في عُمر أقدم دولة في التاريخ.. وتقول على أساسه: تاريخ مشترك مصير مشترك؟!؟!

تالله‏ إن هذا لهجصٍ وإنكم لقومٍ هَجّاصين

أما بقى بالنسبة لكلاشيه “الثقافة المشتركة” فده موضع تفنيده هيحتاج ليلة كبيرة سعاتك.. فخليها لمقال مستقل.

_{[i]) المعادل السوداني للخازوق}

_{[ii]) الرجل بالسوداني}

_{[iii]) يزعق بالسوداني}

[iv]) _{الإخوانجي بالسوداني}