الثلث الأخير من مسلسل الــنــمــر .. مسلسل جديد

وقفت شوية عن الكتابة عشان بس أتأكد أن التِلت الأخير من مسلسل الــنــمــر .. مسلسل جديد، حاجة كده شبه فيلم النمر والأنثى بس على أوسع، بداية جديدة بقواعد جديدة للعبة.. لعبة من 3 فصول، المسلسل بيفرجنا الفصلين التاني والتالت منها.. وبغرض التشويق بيتم استخدم معلومات الفصل المؤسس زي رقعة بازل كبيرة.

المشهد في مسلسل الــنــمــر بقى مكون من 4 لاعبين رئيسيين جوه الصاغة، وكلهم على صلة ما من قرابة، الأخوان حلق والأخوان رضوان.. بس ممثل ماهر رضوان هو ابنه عبد الله “النمر”، والحاوي واقف لوحده على تكة وهيتجوز هنومة.

اقرأ أيضًا 
النمر وبراعة الاستهلال

الشيمي عنده 3 أبناء.. ملك من إلهام (رجعت المصحة) خالد ابن زوجة ميتة (حتى الآن) علي ابن شمس (محسوب ع الحاوي). ملك بتحب ابن عمها (اللي مقري فتحتهم وهمه في اللفة) بس بتعاديه نصرة لأهلها، خالد متجوز فريدة بنت الحاوي اللي بتحقد على ملك.. واللي فقدت القدرة ع الخلفة بسبب أن خالد “جوزها” أجر بلطجية خلوها تسقط حملها من حسن الحلق، وهي فاكرة أن حسن هو المجرم. مافيش حد يعرف الحقيقة غير شمس والنمر.. ودلوقتي عرفها كمان علي مع معلومة إنه ابن الشيمي.

معلومة أن علي ابن الشيمي عند هدية “أم عبد الله”، اللي ظهرت ع الساحة مؤخرًا، وكمان بقت عند خالد اللي حب يهدد بيها شمس عشان يأمن نفسه من معرفتها بجريمته في تسقيط فريدة.. فكلامه أتسمع من طرف علي.

النمر/عبدالله بيبقى لاعب شرعي جوه الصاغة وبيرجع مع أمه يعيشوا في بيت أبوه ويفتحوا محلاته، بس التحقيق معاه وعلى قد ما كشف معلومات مهمة إنما كمان احتوى على نقط مربكة.. وتبدو مش منطقية، النمر قال إن اسمه الحقيقي رجب (حسب بطاقة رجب الدكروري) وأن اسم شهرته عبدالله، ثم يقول إنه بالصدفة اتخبط بالعربية من بنت عمه ومن هنا وصل لعمه الشيمي اللي أدى له الفلوس دي كلها، بعيد عن التركيبة المقصود يبني عليها.. أزاي رجب الدكروري يبقى ابن ماهر رضوان ويستلم ميراثه؟؟، أظنه سؤال منطقي هييجي في دماغ أمين المباحث.

الكم الكبير من الغموض في الفصل التاني جنب معضلة تعمية الفصل الأول خلوا أغلب حمل عبء سد الفجوات المعلوماتية على الفصل التالت، اللي دفع تمنه مشاهد كاملة عبارة عن حكي من النمر للمشاهد الكامل لبعض الأحداث، مشكلة حاول المخرج يداويها بجعل الحكي مرئي.

أظرف فقرة حكي اتعملت هي زيارة شمس للشيمي في بيته، عرفنا كل الخطوط العريضة للحدوتة دي.. وكمان وصلت لخالد الشيمي، كل ده في مشهد يستوعب فعليًا كل الحكي ده.. والزيارة مبررة جدًا.

اللعبة في توبها الجديد خدت أشكال تانية، منها الجانب القانوني، النمر ضرب بلاغ في المحاسب القانوني بتاع عنتر الحلق، المحاسب أتحبس تزوير والحلق لبس مع الضرايب في 5 مليون مصالحة.. ويا الدفع يا الحجز. وبلاغ تاني في الشيمي بخصوص الدهب المضروب، وطبعًا دي خباياها كلها مع نصر، فالشيمي أتحط هو كمان على تراك اللي يروح مايرجعش، إلا لو قدم كبش فدا يروح خلف الأسوار نيابة عنه.

ومن ناحيتهم محور الشر بيعرفوا بصفقة ألماظ بيعملها مسلسل الــنــمــر .. فيطلعوا عيالهم تضرب فيه بلاغ، فبيخرج منها بسلام تبدو متقنة، لولا الحاجة لتوضيح أزاي عربية النمر ضيعة وقت لغاية ما كاوتش عربية الشباب يتغير ويحصلوه تاني ويسبقوه.. عشان حتى العيال يرجع لهم الأمل بعد ما أكيد ضاع أو كش بسبب نمرة الكاوتش؟

كمان الجانب الاجتماعي كان له مكانه، بفرض الوجود الفيزيائي جنب المعنوي، زي لعبة ظهور “هدية”.. أرملة ماهر رضوان وأم عبدالله/النمر، وبتقوم بدورها الفنانة القديرة سوسن بدر.. يعني الشخصية جديدة واضح أن لها حجم يساوي تأثيرها في توازنات اللعبة.

العلاقات الإنسانية بين الشخصيات كتير منها خدت أشكال تانية خالص، مثلًا علاقة النمر وملك فتحت شبابيك الشقلبظات ع البحري. وعلاقة سالي-الشيمي رايحة في سكة جواز بالتالي علاقة عنتر-الشيمي باظت أكتر وبشكل مباشر، أما صفية فراحت أترمت في حضن هدية. خالد بعد ما عرف كل حاجة قلبه جمد على شمس وأبوه.. ووقع مع أبوه واقعة طين قلبته عليه تمامًا.

أما شخصية فريدة فاتطورت لحد ما أتدهورت، هي صحيح نفسيتها جحيم بس اللي حاصل فيها كتير، دي تقريبًا ملعونة لعنة من بتوع الدراما الأغريقية.. حتى في الإجرام فشلت، مصير يقال على صاحبه “قدمه ملهلب”.

إقرأ أيضا

نابليون.. فيلم كارتون باهت ضل الطريق مع ريدلي سكوت

تقريبا الحاجة الوحيدة المستمرة على حالها هي أن شمس بعيدة عن ضربات النمر، وأحيانًا بتعرف تحصله أو تسبقه بخطوة، وزي ما جابت قراره في الصعيد.. قدرت توصل لعلاقته بالصياد، وتقريبًا ده أخطر حدث دلوقتي.. لإنه بيفتح سكة محتملة لضهر النمر. واللي من ناحية تانية بتحاول تفتح لنفسها سكة مع النمر.

اللعيبة الجداد مش بس هدية والصياد.. لازم ماننساش ظهور الفهد، اللي أكيد وراه قصة.

التطورات الكبيرة جدًا في الفصل التالت من مسلسل الــنــمــر أو المسلسل الجديد للأسف ماخليتش من الأخطاء.. أزاي مثلًا البيت أتجدد من غير ما حد ياخد باله؟؟، علميًا ده ماينفعش يحصل خالص في الخباثة.. عربيات بتنقل مونة وعمال طالعة نازلة.. إعادة إحياء بيت محروق ده عمل كبير يا جماعة مايحصبش في الخباثة، أنتوا متصورين كام عربية نقل دخلت بمونة أو خرجت محملة رتش.

أما الغلطة الأكبر، أتمنى يطلع لها تبرير منطقي، لو النمر مستهدف الماسة.. ليه قطع ع الشيمي طريق الوصول ليها بعدين سأله عنها؟؟ ما يستنظر لما يشتريها ثم يقابله في طريق العودة.