رئيس مجلس الادارة: رشا الشامي
رئيس التحرير: أسامة الشاذلي

همتك معانا نعدل الكفة
729   مشاهدة  

الثوابت الوهمية.. (الجزء التالت: تحريم الرق)04 – بقط الراشدين وتقيين الأمويين

الخلفاء
  • شاعر عامية وقاص مصري مهتم بالشأن النوبي ونقد الخطاب الديني

    كاتب فضي له اكثر من 250+ مقال



في الحلقة التالتة اتعرفنا على ممارسات النبي بخصوص الرقيق، الحلقة دي وزي ما أتفقنا هتبقى عن ممارسات الخلفاء في نفس الموضوع.. وهنمر عليهم سريعًا مرحلة مرحلة.

الخلافة الراشدة

أغلبية الخلفاء ماتوا مقتولين، بس خلونا نقول كتير منهم، المهم لينا هنا هو أول الخلفاء المقتولين.. عمر بن الخطاب. أيوه هو نفسه بتاع: حكمت فعدلت فأمنت فنمت، بس القائل شافه قبل ما قتلت، مين قتل عمر؟ وليه قتله؟

مقتل عمر

القاتل: رجل فارسي اسمه فيروز، الشهير بـ أبو لؤلؤة المَّجوسي، تم أسره في معارك العرب مع الفرس.. ووقت توزيع الغنايم كان من نصيب الصحابي المُغير بن شعبة.

السبب: الرقيق ماكنوش بس للخدمة في أعمال مُلاكهم، كمان كانوا يتسابوا يشتغلوا للغير بس مقابل أجر.. والسيد ياخد من المملوك مبلغ محدد مسبقًا تحت اسم “خَراج”، وبما أن الخراج ده بتاع الأرض مش البشر.. فنقدر نسميه بالبلدي كده إتاوة (متاع). وحسب الروايات أشتكى المملوك لأمير المؤمنين من قيمة الإتاوة.. فسأله الخليفة: أنت صنعتك إيه؟، فرد: نجار وحداد ونقاش، فأقر الخليفة الإتاوة بوصفه بيعمل حاجات كتير وراجل كسيب.

فغضب العبد، وقال: وسع كلهم عدله غيري. ونفذ معاه.

نهي الجواري عن الحجاب

عمر في حياته له مواقف كتيرة تعتبر علامة في تاريخ الإسلام، زي تعطيله لحد السرقة فترة المجاعة.. وزي إلغاءه لباب المؤلفة قلوبهم من أبواب مصارف بيت المال، بس المهم لينا هنا هو مواقفه مع الجواري اللي كان يشوفهم لابسين الحجاب.

روي عن الفاروق إنه لو شاف جارية لابسة حجاب كان يضربها وينهها عن التشبه بالأحرار من النساء. هذا والعهدة على شيخ ابن تيمية، في الجزء الخمستاشر من كتابه “مجموع الفتاوى”.

نخلص من القصتين أن عصر الخلافة الراشدة شهد وجود رقيق، والرواية التانية تحديدًا تؤكد أن دينيًا ليهم تشريعات مختلفة عن الأحرار، وكمان بتأكد على صحة كلامي في الجزء الأول من السلسلة (الحجاب).. بالتحديد ما ورد في حلقته الأخيرة ثنائية الحجاب والإئح.

الخلفاء

 ص217 الجزء15 مجمع الفتاوى

معاهدة البقط (الرق في مقابل الغذاء) دور ع النبيت

قبل ما نقفل صفحة الخلافة الراشدة خلينا ناخد مثال تاني، مهم حبتين تلاتة.. لإنه كاشف للسياسة الخارجية للدولة الإسلامية في عصر “صدر الإسلام”. بعد غزو مصر اتحرك العرب-المسلمين بسرعة للتوسع أكتر في أفريقيا وهاجموا النوبة بجيش يقوده عقبة بن نافع، بس أجدادي زعلوهم، المحاولة التانية كانت زمن خلافة عثمان بن عفان.. قاد جيش المسلمين وقتها أخوه في الرضاعة عبد الله بن أبي السرح.

انتهت المحاولة التانية بلا غالب أو مغلوب، بس بتفوق نسبي للغزاة، فتم توقيع أتفاقية سلام عرفت باسم أتفاقية البقط. وبحسب موقع قصة الإسلام المتخصصة في الإسلاميات، والمعروف بتوجهاته الإسلامية.. تكونت الأتفاقية من 12 بند، يهم سياقنا هنا البند رقم 9:

وعليكم في كل سنة ثلاثمائة رأس وستون رأسا تدفعونها إلى إمام المسلمين من أوسط رقيق بلدكم غير المعيب يكون فيها ذكران وإناث، ليس فيها شيخ هرم ولا عجوز ولا طفل لم يبلغ الحلم، تدفعون ذلك إلى والي أسوان.

يهمني هنا نقطتين:

– الرق كأحد أولويات العرب-المسلمين في سياستهم الخارجية.

– بداية علاقة أفريقيا بالإسلام والمسلمين العرب شكلها إيه.

بعد ما نفكر كويس في النقطتين دول أقدر أقفل الصفحة دي وأنا مرتاح الضمير، رغم أن فيه مئات المواقف والروايات ماتمش سردها، بس مافيش وقت ولا مساحة لسرد كل تاريخ العبودية في الإسلام.. إحنا بس بنمر على أهم المحطات ونثبت وجود الرق بشكل شرعي تمامًا.

الخلفاء

إقرأ أيضا
العنصرية

 غلاف كتاب معاهدة البقط

الدولة الأموية.. عصر تطور النخاسة

وضع الرقيق في الدولة الأموية مهم جدًا، مش بس عشان التزايد الرهيب في أعدادهم إنما كمان لأن الخلافة الأموية في ذاتها كانت تأسيسية لمنهج حياة الخلفاء/الملوك، الوضع اللي ابتدعه معاوية بن أبي سفيان بتوريث العرش لأبنه اليزيد.. وأستمر كقاعدة ثابتة “لا تُكسر إلا بحد السيف” حتى السقوط النهائي لدولة الخلافة بإنقلاب عسكري قاده جمال الدين أتاتورك.

فأصبح الوضع اللي زعل المسلمين في عهد عثمان بن عفان، بهيمنة بني أمية ع الدولة، أمر واقع وسائد وممنطق.. فالدولة هنا هي دولة بني أمية ولن تنتهي إلا لما يسقطها بنو العباس بالقوة.

خلال حكم الأموين تم تأسيس وتقعيد مظاهر كتير جدا من مظاهر المجتمع الإسلامي، زي تجارة الرقيق اللي انتشرت بشكل واسع وتطورت مهنة النخاسة بشكل نوعي ملحوظ، فبقى النخاس من دول عامل زي كشاف المواهب دي صوتها حلو.. فتغني، دي قوية.. فتشتغل في البيت، دي ذكية.. فتتعلم الأدب والشعر، دي دلوعة.. فتبقى مُلعب.. إلخ.

الخلفاء

النخاس يشتري الجارية وهي لسه وظوُّظة بسعر قليل ويدربها على ما يتصور إنها هتتميز فيه، يستثمر فيها وقت وجهد وفلوس لغاية ما تكبر ويبيعها بسعر أعلى يعوض له مصاريفه ووقته.

العملية دي عرفت باسم “التقيين”، تصليح وهندلة الأشياء، ومن يقوم بها يبقى المقين/ة، أنتشر الفيرجن ده من النخاسة بشكل كبير، اللي عايزين تفاصيل أكتر يقدروا يرجعوا لكتاب تاريخ التمدن الإسلامي للمؤرخ اللبناني جُرجي زيدان، خصوصًا الجزء التاني.

بعد ما خدنا فكرة عن وضع الرقيق في صدر الإسلام وفي عصر تحويل الخلافة إلى مملكة، الحلقة الجاية هنشوف أزاي التوسع ده في الأسترقاق وصل مداه في العصر العباسي، المعروف بالعصر الذهبي للدولة الإسلامية.. انتظرونا.

الكاتب

  • الخلفاء رامي يحيى

    شاعر عامية وقاص مصري مهتم بالشأن النوبي ونقد الخطاب الديني

    كاتب فضي له اكثر من 250+ مقال






ما هو انطباعك؟
أحببته
2
أحزنني
0
أعجبني
3
أغضبني
0
هاهاها
0
واااو
1


Slide
Slide
Slide
Slide
Slide
Slide
‫إظهار التعليقات (2)

أكتب تعليقك

Your email address will not be published.







حقوق الملكية والتشغيل © 2022   كافه الحقوق محفوظة
موقع إلكتروني متخصص .. يلقي حجرا في مياه راكدة

error: © غير مسموح , حقوق النشر محفوظة لـ الميزان