حكايات خالتي بمبة| نحس وجبس.. مواقف مش ولابد جمعت كاريوكا بخفاجي

أهلًا أهلًا أهلًا بأعز الحبايب، وحشتوني يا جمهوري، النهاردة خالتكم بمبة هتتكلم عن مواقف جمعت بين واحد من أشهر المنتجين والمؤلفين في عالم المسرح سمير خفاجي، والراقصة الشرقية والممثلة اللي كل الناس تعرف أنها ست ولا كل الستات، وبيضربوا بيها المثل في الجدعنة، الفنانة تحية كاريوكا.

المواقف اللي جمعت خفاجي بتحية كان فيها سوء تفاهم شوية، على سوء حظ حبتين، على حاجات مش مفهومة خلت المنتج الكبير ياخد قرار بالابتعاد عن التعاون معاها رغم أن كان فيه مسرحية بتجمعهم معروضة فعلًا وبقالها تقريبًا 3 أيام بيشوفها الجمهور، ودي مواقف حكاها بنفسه خفاجي في مذكراته “أوراق من عمري”.

بدأت الحكاية لما طلب خفاجي منها تقديم فقرة مع فرقة ساعة لقلبك في موسم راس البر، لكن تحية حطته في موقف محرج أمام الجمهور اللي كان حريص إنه يتفرج عليها، لدرجة أن كل التذاكر اتباعت في أول حفلة، بس هي مجتش، واضطر يلغي الحفلة، وسافرلها القاهرة عشان يعرف سبب غيابها.

ولما راح لها اتفاجئ بعصبيتها وعرف ان فيه حد -الله يسامحه- فهمها انهم هيشغلوها في ملاهي، وحاجة كدا مش قد المقام، فقالها الكلام ده مش حقيقي وإنهم بيقدموا عروضهم على مسرح سينما رويال، وده كان الموقف الأول اللي حصل بسبب كدبة.

في مرة تانية كان بيتفق معاها على تقديم نفس فقرة الرقص، في موسم جديد للفرقة بس المرة دي في بورسعيد، ومرة تانية تحية مش بتلتزم ومش بتيجي، والمرة دي خفاجي كتب للجمهور على شباك التذاكر أن تحية مش جاية، واللي عايز ياخد تمن تذكرته ياخدها، وراحلها يفهم فيه لإيه حصل خلاها تتصرف بالشكل الغريب ده.

المهم لاقاها بتشتكي من زميل في الفرقة هو الكاتب والفنان يوسف عوف، قال إيه يا جماعة حجزلها في أتوبيس اسمه بولمان مع إنها كانت طالبة تسافر بقطر البولمان -طب والنبي ده اسمه كلام يا ست تحية- يالا ما علينا اسكتي يا بمبة وعديها، المهم خفاجي اكتشف إن اللي حصل كانت غلطة مش مقصودة من عوف اللي مفهمش إن قصدها قطر، واعتذرلها واخدها وسافر.

واضح ان النحس كان سبب جديد في تالت موقف يجمع الاتنين، فبعد ما سافرت مع الفرقة عشان تقدم فقرتها كرقاصة، على المسرح القومي في الإسكندرية، وقبل الافتتاح بيوم اتعصبت تحية على اللبيسة بتاعتها، وخبطت برجليها الترابيزة، ومقدرتش بعدها ترقص وبدأت تعرج.

حكايات بمبة وصداقات الدقن.. بدأت مع المليجي بسيجارة ومع عيلة سرحان بـ”بوكس مصارعة”

حاول خفاجي يتصرف بإنه يخلي كاريوكا تشارك كممثلة، وبالفعل شاركت في أول ليلة في سكتش، وأول ما طلعت على المسرح قالت للجمهور لو بتحبوني اقبلوني النهاردة كممثلة، لكن تاني يوم كان الأطباء ليهم رأي تاني ووضعوا رجليها في الجبس، فاستعان خفاجي بالرقاصة نعمت مختار بدالها.

بس خفاجي بقى ما بيحرمش تقريبًا، للمرة الرابعة يروح لتحية ويعرض عليها المشاركة في مسرحية “يا مدام لازم تحبيني”، وقالها هيديها 150 جنيه في 15 يوم، لكن فجأة يدور عليها في سلقط في ملقط اختفت، ووقتها كانت واخدة 50 جنيه كعربون، وقابل صديقها الفنان عبدالغني السيد، فسأله عنها، فلقاه بيقوله هي عايزة 50 جنيه تانية قبل ما ترجع للبروفة، وفعلًا وافق وخدت الفلوس ورجعت للعرض.

إقرأ أيضا

هل الإسلام مافهوش كهنوت؟.. ولا عندُه جُوَه؟

ياترى مين هو المطرب اللي فقد جزء من لسانه وبرضه فضل يتسلطن في الغنا.. حكايات خالتي بمبة

بعد يومين من العرض، اختفت تحية وهنا بقى كان خفاجي مقدرش يتحمل، ومع ذلك حاول يسيطر على الموقف ويرجعها، العرض شغال ومينفعش ميكونش ملتزم ادام الجمهور، فكلم جوزها ووقتها كان الفنان فايز حلاوة، ولقاه بيقوله إن تحية عايزة 50 جنيه كمان، وشايفة ان من حقها تقبض 300 جنيه حتى لو كانت مدة العرض 15 يوم مش 30 يوم، ومش موافقة خالص تقبض 150 جنيه، وتاني يوم راح المسرح ولقاها في أوضتها، لكن كان خد قرار بأنه مينفعش يكمل بالطريقة دي أبدًا وقالها إن خلاص مفيش عرض.

دي كانت حكايات خفاجي وتحية كاريوكا ، في رأيكم هل حد فيهم كان غلطان، ولا فعلًا النحس هو السبب انهم ميكملوش شغل مع بعض.