تقرأ الآن
خالتي بمبة وحكايات مظاليم الفن.. حسن البارودي أصيب بالشلل و”الست”طالبت الدولة بعلاجه

رئيس مجلس الادارة: رشا الشامي
رئيس التحرير: أسامة الشاذلي

همتك معانا نعدل الكفة
723   مشاهدة  

خالتي بمبة وحكايات مظاليم الفن.. حسن البارودي أصيب بالشلل و”الست”طالبت الدولة بعلاجه

حسن البارودي وخالتي بمبة

أم كلثوم كانت بتحب صوته، ومخرج أمريكي كان شايف إن صوته يستحق مليون جنيه، تفتكروا مين، قبل ما تبدأوا تقولوا أسماء هو مش مطرب، هو ممثل مسرحي كبير، وله أدوار في السينما كتير منكم يعرفها، تقدروا تقولوا عليه من عشاق الفن ومظاليمه، يعني رغم كل النجاحات اللي في حياته وقيمته الكبيرة، فيه اللي ميعرفش اسمه، عشان كده خالتكم بمبة هتكلمكم النهاردة عن شيخ الفنانين، حسن البارودي.

هسهلها عليكم هو الشيخ المنافق اللي ممكن يبيع ضميره عشان يرضي العمدة، ده كان دوره في فيلم “الزوجة التانية”، أيوة اللي كان بيقول لـ”أبو العلا- شكري سرحان”: “وأطيعوا لله وأطيعوا الرسول وأولي الأمر منكم”. هو اللي كان بيحب “قناوي- يوسف شاهين” وبيحاول يقنعه ميقتلش “هنومة- هند رستم” في “باب الحديد”، والزوج المغفل واللي بتخدعه مراته في “الطريق”، وكمان اليهودي المادي في “هجرة الرسول”.

ابنه أشرف قالي إن حبه للتمثيل بدأ معاه بدري أوي زي كتير من ولاد جيله، بفرقة التمثيل في المدرسة.

حسن البارودي في شبابه
لما كان عمره 15 سنة ولإنه كان شاطر في اللغة العربية والإلقاء، اختاروه يقول خطبة ادام “الزعيم” سعد زغلول، وعجبه صوته جدا.

الزعيم قال له إنه لما يكبر ممكن يبقى محامي كبير ويكسب القضايا من أول جلسة، الكلام فرحه جدا، لكن مافيش حاجة بعدته عن التمثيل.

بدأ حياته كموظف، لكن مقدرش يكمل، واشتغل في عدد من الفرق المسرحية زي فرقة فاطمة رشدي وجورج أبيض.

بعدين بقى واحد من أهم ممثلين فرقة يوسف وهبي “رمسيس”، مع إنه دخلها في الأول على إنه يشتغل ملقن.

عمل فرقة خاصة بيه قدمت مسرحيات في محافظات مصر كلها تقريبًا وسافر بيها السودان، وكان معاه فنانين كبار منهم المليجي.

من حكايات كاريوكا العنيدة “نحس وجبس” مع سمير خفاجي

تعالوا بقى أقولكم إيه لم الشامي على المغربي، يعني ايه اللي جمع “كوكب الشرق” بشيخ الممثلين.

زمان لما كانت الأيام حلوة والثقافة ليها قيمة والفنان بيحاوط نفسه بأدباء وصحفيين ومفكرين، كانت الست بتعمل صالون ثقافي.

وهو كان واحد  من ضيوفها طبعًا، والصالون ماكنش ينفع يبدأ إلا بوجوده، حتى لو اتأخر الست كانت بتقول نستنى!

الست كانت بتقدر قيمة البارودي وعارفة إنه فنان كبير، وفضلت على اتصال بيه، لحد أخر أيام حياته.

نظره ضعف يا حبة عيني، ومكانش زي ممثلين اليومين دول بيقبض ملايين ولا معاه فلوس تخليه يعمل العملية في لندن.

إقرأ أيضا
الكعبة عام 1947 م

حاول ياخد من الدولة قرار بعلاجه على نفقتها، لكن طلبه اترفض بحجة إن مفيش فلوس.

الست أول ماعرفت اتصلت بالمسئولين وجابت الموافقة في أقل من 24 ساعة، وسافر فعلا عشان يعمل العملية.

أكتر حاجة كانت مضيقاه في أخر حياته إنه طلع معاش من المسرح، وهو فيه فنان بيطلع معاش يا إخواتي!

حس إنهم بيقولوله خلاص راحت عليك، جاله اكتئاب غير المشاكل الصحية اللي أثرت عليه ومبقاش بيتحرك وجاله شلل نصفي.

حسن البارودي اسمه الحقيقي حسن محمود حسانين البارودي، ولد في نوفمبر عام 1898، وتوفي في سبتمبر عام 1974.

الكاتب

Content Protection by DMCA.com

ما هو انطباعك؟
أحببته
1
أحزنني
0
أعجبني
0
أغضبني
0
هاهاها
0
واااو
0
Slide
Slide
Slide
Slide
Slide


2 تعليقان

أكتب تعليقك

Your email address will not be published.

حقوق الملكية والتشغيل © 2022   كافه الحقوق محفوظة
موقع إلكتروني متخصص .. يلقي حجرا في مياه راكدة

error: © غير مسموح , حقوق النشر محفوظة لـ الميزان