رئيس مجلس الادارة: رشا الشامي
رئيس التحرير: أسامة الشاذلي

همتك معانا نعدل الكفة
471   مشاهدة  

ما وراء الطبيعة 05 (أسطورة الجاثوم)

  • شاعر عامية وقاص مصري مهتم بالشأن النوبي وتجديد الخطاب الديني

    كاتب برونزي له اكثر من 100+ مقال


Share

بدأت الحلقة الخامسة أن رفعت مفتقد شيراز المختفية من وقت عزاء أخوه، وقاعد بيفكر هي راحت فين وكانت إيه اللي جابها أصلا، وإذ صدفة يلمح كارتين التارو متقطعين في الزبالة.. فيجمع كارت الكاهنة الكبرى، ويفتكر كلام صديقه ليو عن إحتمالية إنه يلاقي اللي هو عايزه في أحلامه.. ومن هنا تبدء المغامرة.

كمال بينصح رفعت إنه ينام في مواعيد ثابتة ويخلي جنبه نوتة يكتب فيها أحلامه أول ما يصحى (خصوصًا لو صحي فجأة في نُص الليل).. خلال الحلقة رفعت نام 4 مرات كلهم بالنهار.

 

الجاثوم

متفقين أن رفعت مدخن شره جدًا، بس أعتقد إن التدخين أثناء توقيع الكشف الطبي عليه مبالغ فيه شوية.. خصوصًا لما يكون منقول للطبيب وهو فاقد الوعي، ولو دي تعدي يبقى أكيد مايعديش أن الطبيب سايبه يدخن خلال الكشف ولما خلص أفتكر يخاف عليه وياخد السيجارة من أيده.

الجاثوم

رفعت مش بس جمع كارت الكاهنة الكبرى.. لأ ده كمان أهتم يلزقه، بس مش عارف بقى هو أياميها كان فيه سوليتب شفاف ولا لأ، حاكم على أيام طفولتي، في التمانينيات، كان السوليتب الشفاف حاجة حديثة وشريط اللزاق الورقي البُني اللي بيحتاج (ولا مؤاخذة) يتلحس زي الطوابع هو المنتشر.

مرور ماجي على هويدا في المدرسة يثير سؤالين مهمين.. بما أن الزيارة واضح إنها بدون علم رفعت تبقى عرفت مكان المدرسة منين.. رئيفة اللي مش طايقاها؟؟ وليه أوضة الموسيقى متعلق فيها خريطة؟

بداية الحلقة كانت مشكلة رفعت هي عدم وجود أحلام، وبناء على نصيحة كمال بقى ينام جنبه نوتة يسجل فيها أحلامه أول ما يصحى، مع “حلم السقوط من السلم العالي” رفعت حكى لكمال الحلم ووراه العلامة وقال إنه خايف ينام تاني، وإذ فجأة تم التعامل مع الوضع وكأن رفعت رجل لا ينام.. مش شخص بيفكر إنه ماينمش.

الجاثوم

ثم في البيت رفعت يبدء يأدي أداءات شخص متوتر وعلى شفة حفرة م الأنهيار بسبب قلة النوم، ويفكر بقى في الرقم القياسي بدون نوم، وآثار قلة النوم على العقل البشري.. و”نستفوجئ” إنه بعت البواب يشتري له منوم.. مع أن مافيش أي سابق كلام عن عدم قدرته على النوم.

في نفس جلسة الهلوسة غير المبررة يتوصل رفعت لدلالة المتاهة في الحلم، الراجل قاعد يحل متاهة على شكل عقل فييجي في دماغه أن المتاهة هي عقلُه.. قشطة حلو ده، بس فجأة يرمي الكشكول ولا الأجندة اللي فيها المتاهة ويهجم ع التاني اللي فيه ملاحظاته ويفر الصفحات بعصبية ويتنقل بين مجموعة ملاحظات كإنه بيتأكد من صحة الفكرة.. وفعلًا يقف قيمة 5 ولا 6 مرات (بعضهم مكرر) كلهم عند ملاحظات مافيش ولا واحدة فيهم بتربط بين العقل والمتاهة.

الجاثوم

طول المسلسل وإحنا متسوحين في الزمن، والحلقة دي هي واحدة من ذروات الشألطة الزمنية، خصوصًا مع حلم “موت طلعت”، اللي شهد “دُرُوب” زمني يزعل.

نهار داخلي – شقة رئيفة: هويدا بتطلب من رئيفة وعادل ييجوا معاها يتطمنوا على رفعت.

ليل داخلي – شقة رفعت: رفعت بيتوصل لحل رمزية المتاهة في الحلم، يخبط عليه البواب ويديله طلباته.

نهار داخلي – غرفة نوم رفعت: رفعت ع السرير بياخد المنوم ويذهب لمواجهة الجاثوم.

نهار داخلي – بيت رفعت: هويدا بصحبة رئيفة وعادل يحاولوا يصحوا رفعت.. فيموت عادل.

ده معناه الوحيد أن زمن استلام رفعت المنوم والعِدة من البواب غلط.. كان المفروض هو كمان نهار.

الجاثوم

إقرأ أيضا
زرادشت

معلش يا أخونا عشان أنا ماليش أي خبرة مع المنومات.. هل منطقي أن مواطن بالع أكتر من نص دستة أقراص يصحى لما حد يصحيه؟

اقرأ أيضًا 
ما وراء الطبيعة 01 (أسطورة البيت)

أستمرارًا لحالة السحولة الزمنية بنعيش في الحلقة دي متوالية من الأحداث عايزة قيمة جُمعة عشان تحصل، رفعت ينام عشان يطارد الجاثوم.. أهله يكبسوا ع البيت.. طلعت يقع من طوله.. ينقلوه ع المستشفى.. يحاولوا ينقذوه بس مايحصلش نصيب.. رفعت يركب عربيته ويطلع ع المنصورة.. يوصل قريته التابعة للمنصورة، كل ده خلال نهار شتوي مأزعر من اللي هو ساعتين ونص ده.

الجاثوم

المهم رفعت وصل بيت الخضراوي لقى إبراهيم، المالك الجديد للبيت، مات وكتب البيت باسم رفعت، خبط لزق كده.. من غير ما نعرف رفعت عرف اسمه منين ولا نفهم هو أزاي كتب البيت باسمه؟، هل دي وصية واجبة كتبها قبل ما ينتحر ولا لقى كارنيه مدرسة وقع زمان من رفعت فعرف يستخدمه في نقل ملكية البيت.. ولا إيه اللي حصل بالظبط، رغم كل العبث ده تفضل أكتر تفصيلة عجيبة بالنسبة ليا في المشهد.. هي نبرة الراجل عديم الصفة، هو بيكلم رفعت كده ليه يا جماعة؟؟

اقرأ أيضًا 
ما وراء الطبيعة 02 (لعنة الفرعون)

في النهاية ليا سؤالين:

  • الحلقة بدأت أن رفعت لقى كارت الكاهنة الكبرى متقطع وفي الزبالة، وبما إنه ماعملش كده مافيش حد ساكن معاه يبقى مافضلش غير مدموزيل شيراز اللي هو مفتقدها.. مش كده المفروض إنه أطمأن خلاص عليها؟ ولا فيه حد أدى له خبر أنها مقطعاهم من الحلقة اللي فاتت؟!؟!
  • رفعت خلال استعداداته لمواجهة الجاثوم بلع من 7 إلى 8 حبات منوم.. هو كده نام ولا مات؟؟
حلقة الجاثوم

 

الكاتب

  • رامي يحيى

    شاعر عامية وقاص مصري مهتم بالشأن النوبي وتجديد الخطاب الديني

    كاتب برونزي له اكثر من 100+ مقال

Content Protection by DMCA.com
Share

ما هو انطباعك؟
أحببته
1
أحزنني
1
أعجبني
3
أغضبني
0
هاهاها
1
واااو
0
Slide
Slide
Slide
Slide
Slide


2 تعليقان

أكتب تعليقك

Your email address will not be published.

حقوق الملكية والتشغيل © 2022   كافه الحقوق محفوظة
موقع إلكتروني متخصص .. يلقي حجرا في مياه راكدة

error: © غير مسموح , حقوق النشر محفوظة لـ الميزان