871 مشاهدة
مسلسل اللعبة 2 .. حكاية الأخطاء الستة الموجودة في الحلقة الثانية
الكوميديا أشكال متنوعة.. زي الفارس والبلاك كوميك والكوميديا اللفظية وكوميديا الموقف وغيرهم كتير، وهي أحد أشكال الدراما الأقدم في التاريخ (بداية الدراما كانت ملهاة أو مأساة)، وفي رأيي من أصعبهم وأكترهم أرتباطًا بالثقافة المحلية لكل مجتمع.. فنلاقي الكوميديا أقل انتشارا عالميًا إذا ما قورنت بالرعب والأكشن مثلًا.
عند مقارنة أنواع الكوميديا ببعض هنلاقي أنواع أسهل من غيرها وأنواع تعد أرقى من أنواع، فمثلا الكوميديا اللفظية أسهل كتير من كوميديا الموقف، فالأولى تعتمد ع الإيفيه اللفظي.. “هاطلعلك حتى من بنطلونك” ممكن جملة زي دي تتقال في عمل كوميدي وتجيب ضحك في الصالة ويسهل انتقالها لخارج صالة العرض ويمكنها الانتشار مجتمعيًا بمعزل عن العمل نفسه.. بل يمكن نسيان العمل وبقاء الإيفيه.
في حين يصعب جدًا تحقق الأمر ذاته لجملة زي “أنت ضليع في اللغة العربية”، فهي في حد ذاتها غير مسببة للضحك، ولا يمكن استخدامها بغرض الإضحاك إلا بين المجموعة البشرية اللي أتفرجت على فيلم غزل البنات للراحل نجيب الريحاني، لأن دول بس اللي هيقدروا يستدعوا “الموقف” أما أي حد ماشفش الفيلم عشان يفهم إيه المُضحك في الجملة هيحتاج شرح طويل جدًا لتوضيح ملابسات المشهد.
فخلال متابعتي لمسلسل اللعبة 2 والكتابة عن مدى دقة التعامل مع مفردات العمل هاحاول أتكلم كمان عن وضع الكوميديا في المسلسل، بوصفها الغرض الأساسي من العمل، فزي ما أتفقنا في الموضوع السابق أن المسلسل ينتمي لمدرسة الضحك للضحك.
بشكل عام (خلال أول خمس حلقات) كل الشخصيات، باستثناء شويكار وإسراء بيكافحوا من اجل الإضحاك، وده أمر جيد بس سهل ينقلب لضده، فمثلا أول ظهور لشخصية سعدون كان غير مضحك ويستحيل يثبت في دماغ المشاهد بعد نهاية المشهد، اللي أعتمد على تشخيص جزء من نكتة قديمة مع تطعيمه بشوية إيفيهات عبارة عن ذكر أسماء أغاني خليجية مع توضيح مدى جهل طرفي المشهد (سعدون-البواب) بملابس شعوب المنطقة.
اقرأ أيضًا
اللعبة .. أفضل مسلسل كوميدي مصري في أخر ١٠ سنوات
في حين مثلًا تقديم مدى كارثية وضع فندق “وادي الحمام” شهد إيفيه بصري يستحيل يتنسي، مجرد قطعة أكسسوار ظهرت ع الشاشة لثواني معدودة، رغم كده قدرت تنتزع مني ضحكة بصوت عالي جدًا.. ولمدة مش قصيرة، لدرجة أني أضطريت أرجع أتابع فرجة من مكان ما وقفت، إيفيه عشان يتحكي محتاج شرح لتفاصيل كتير من دراما العمل وتفاصيل أكتر من دراما الحياة، وده نجاح ما بعده نجاح في عالم صناعة الكوميدية.
كمان فوتمونتاج تحديات الأختين في اللعبة كان لطيف ومضحك جدًا، أتمنى يكون ما سبق توضيح -مبسط- كافي لأشكال الكوميدية وشرح مقاييس أو معايير الحكم على المادة على صناعتها ومقدميها، على الأقل من وجهة نظري.
خلونا بقى نختم بمرور سريع على الأخطاء اللي حصلت خلال الحلقة:
- مع بداية الحلقة إسراء بتحاول تصالح وسيم فبتقول له: “عشان خاطر كل كلمة حب قولتها لي”، فرد عليها: “كل كلمة قولتيها كانت كدب فـ كدب”.
- مش منطقي أن وسيم يسأل عن زمن بداية لعبهم لإنها سبق وعرفته أنهم بدأوا اللعبة يوم ولادة مدبولي.
- اللعبة عرفت منين أن الرجالة رجعوا يلعبوا (دي نقطة لازم توضيحها قبل نهاية المسلسل).
- لحظة نشل المحفظة مش بس غير موجودة.. كمان مافيش لحظة قطع أو إشارة لمرور زمن أو توقف مرور الراكبة أو حتى وقوف المني باص، كمان المسافة بين اللصة والعربية تسمح بتوقيفها والنزول.
- مشهد انتظار وسيم مع جميل ظهور النشال نفس الفتاة بتمر مرتين من نفس الاتجاه (خطأ راكور).
- وجود كلابش مع وسيم يتمرر في ضوء نوع العمل.. بس تفصيلة رمي قشرة الموز عايزة ظبط زوايا.
الكاتب
ما هو انطباعك؟
