أكبر عملية نصب إلكتروني تمت على الشعب المصري في عام ٢٠٢١.. تعرف عليها

من كام شهر ظهر برنامج اسمه white sands البرنامج اتقال انه برنامج اجنبي للربح من الانترنت من خلال انك بتشترك في البرنامج وبيطلب منك مهمات تنفذها وبتاخد مقابلها فلوس .. المهمات دي هي انك تعمل لايك لـ عدد من البوستات البرنامج بيقدمهوملك

بتجرب في البداية مجاناً لحد ما بتجمع بكل بساطة 30 جنيه تقدر تحولهم فودافون كاش ، بمجرد ما بتسحب الفلوس بتكون تجربتك المجانية خلصت والمفروض بتشترك في باقات بتبدأ من 600 جنيه لحد 30 الف جنيه في التحديث الاخير قبل النصباية ما تقفل ، الي بيفرق الباقات من بعض ان سعر اللايك بيكون اعلي وعدد البوستات اكتر وطبعاً بحسبة بسيطة بتشوف ان المكاسب كبيرة لدرجة تخض بمجهود قليل جداً

شحن الباقات كان من خلال اشخاص المفروض انهم اجانب واسمهم وكلاء .. والناس فعلاً بدأت تدفع وتكيب من خلال البرنامج ، بتشترك في الباقة الاولي وتجمع الي دفعته في كام يوم تطمع وتشترك في التانية وهكذا لحد ما تلاقي نفسك بتطمع كل يوم ان فلوسك تزيد فـ تبدأ تدفع للباقات الاكبر وطبعاً فيه ناس استلفت الفلوس وناس باعت حاجات وناس مضت علي نفسها ايصالات امانة علشان تشترك في الباقات وتكسب ويشغلوا الفلوس

البرنامج في فترة قليلة جمع مبالغ رهيبة ملايين بتدفع كل يوم ومش مبالغة ملايين حرفياً والناس بدأت تعمل اكتر من حساب كمان طمع في فلوس اكتر وطبعاً مكسبك بيزيد لما بتدخل حد من خلالك للبرنامج ويرقي للباقات المدفوعة

والبرنامج بيرمي طعم لـ الناس والفلوس فعلاً بتوصل وعلشان الناس تطمن كان فيه ناس بتكسب من البرنامج مبالغ وصلت لنص مليون جنيه ودي حقيقة فيه ناس عملت الرقم ده من خلال الدعوات وطبعاً الناس بتشوف ارباحهم فـ يدفعوا اكتر علشان يعملوا فلوس زيهم

لحد ما فـ اول السنة هوب البرنامج قال ان فيه مشكلة في التحويلات وبدأ تدريجي الموقع يقف طبعاً طمع الناس كان خلاهم دفعوا ملايين وطبعاً كـ شعب مصري الثقة عنده زيادة الناس كانت بتطمن بعض حتي والتحويلات واقفة ويقولوا مشكلة وهتتحل ويجر غيره وغيره يدفع برضه علي امل ان الفلوس هتوصل وكله بيجر كله لحد ما البرنامج يوم 10 قفل نهائي وضاعت فلوسك يا رضا

في النهاية وبعد ما الناس بدأت تدور علي اساس برنامج white sands اكتشفوا ان البرنامج ده ملهوش اي وجود غير في مصر وان مفيش لا وكيل اجنبي ولا اي نيلة البرنامج تصميم مصري 100٪ ونصباية فل من شخص ما محدش يعرفه حتي الوكلاء الي كانوا شغالين معاه وخد الفلوس وخلع برة مصر .. مين المبرمج الي عمل البرنامج محدش يعرف ! ، الفلوس راحت فين برضه اللهُ اعلم .. ودي تعتبر انضف واكبر عملية نصب الكتروني حصلت في تاريخ مصر حبيت اوثقها ليكم قبل ما تعرفوها من برة لما نبقي مسخرة العالم وكله يحكي علينا

في النهاية جمع النصاب ٥ مليار جنيه مصري من ٦ مليون مشترك، حولهم لعملات إلكترونية وهرب خارج البلاد