ألف ليلة وليلة ورحلة الشاطر أبو فاشا من الإذاعة للتلفزيون

دي علامة من علامات رمضان من قبل حتى ما يخترعوا التلفزيون أو يتعمل ماسبيرو، الحكاية اللي طلع منها ألف نسخة تقريبا، ومثلها أكتر من نجم ونجمة، وفضلت عايشة معانا يمكن لحد سنتين فاتوا وهي عايشة معانا، بس البداية اللي بجد كانت من استوديو الإذاعة المصرية مع اسمين بالتحديد.

الأولاني هو طاهر أبو فاشا، ده راجل اتولد سنة 1908 في يوم 22 ديسمبر بدأ تعليمه في المعهد الديني في دمياط وبعدين دخل كليه دار العلوم واتخرج منها واتوظف مدرس بمدرسة فؤاد الأول بسوهاج وبعدها راح اشتغل مدرس في الواحات الخارجة وبعدين رجع القاهرة، لكن اللي يهمنا في رحلتنا دي انه الراجل ده كان شاعر وزجال كبير.

الراجل شهرته جت من الإذاعة، لما راح قدملهم مشروع حلقات ١٠٠٠ ليلة وليلة، اللي كان كاتبها على شكل حوار مسجوع، وحوار مسجوع ده اللي هو ” بلغني أيها الملك السعيد ذو العقل الرشيد والعمر المديد” تحس إنه شعر بس مش شعر أوي يعني، الراجل ده برضوا كتب أغاني كتير منها أغاني فيلم رابعة العدوية وكان المنافس لمصطفى عبدالفتاح في الأغاني الصوفية.

لما راحل عمنا طاهر أبو فاشا في الإذاعة واتوافق على المشروع جه هنا تاني أسم في رحلة ١٠٠٠ ليلة وليلة، وهو محمد محمود شعبان وده واحد من رواد الإذاعة المصرية، اتولد في 21 سبتمبر 1912 واتخرج من كلية الأداب قسم اللغات اليونانية واللاتينية بس بتوصية مباشرة من طه حسين وزير المعارف وقتها اشتغل في الإذاعة.

اشتغل مقدم برامج ومذيع ربط، المذيع اللى كان بيطلع بين البرامج أو المسلسلات يقول موعدنا حاليا مع برنامج كذة أو اغنية كذا هو ده مذيع الربط، المهم عمنا محمد محمود شعبان في يوم وهو في الإذاعة وكان في برنامج أطفال، وفجأة مذيع برنامج الأطفال ده مجاش، حصله ظرف طارئ ومجاش ومفيش حل غير إن حد يقدم البرنامج مكانه ويشاء السميع العليم إن الحد ده يكون محمد محمود شعبان، وهنا كان الراجل ده مع موعد مع القدر بجد.

غلطة مطبعية، تخيل مصيرك كله يتغير بسبب غلطة مطبعية وإسمك بدل ما يتكتب بابا شعبان يتكتب بابا شارو، والمذيع زميلك يقوله وهو بيقدمك بابا شارو، والأطفال والكبار يعجبهم صوتك وطريقتك ويعجبهم كمان الإسم فتفضل لأبد الدهر أسمك عند كل الناس بابا شارو، وتبقى واحد من أهم إن لم تكن أهم مقدمين برماج الأطفال في مصر، وتفضل طول 20 سنة بتقدم برنامج أطفال على الإذاعة من سنة 40 لسنة 60.

لكن مش برنامج الأطفال بتاع بابا شارو هو أكبر مدة قضاها يقدم عمل فني، لكن المدة الأطول بجد كانت من نصيب ١٠٠٠ ليلة وليلة، حد ها يقولي ايه علاقة ألف ليلة وليلة ببابا شارو؟ أقولك الراجل ده هو اللي أخرج ألف ليلة وليلة، وبصراحة هي اسم على مسمى لانها اتعملت ألف حلقة إذاعية وفضلت تتعرض 28 سنة في الإذاعة.

إقرأ أيضا

مقتل السنوار وأزمتنا مع الكلام

لكن السؤال الأهم هنا هي أتنقلت للتلفزيون إزاى وإمتي؟ اتنقلت سنة 1985 مع طاهر أبو فاشا برضوا لما عمل أو نسخة تلفزيونية في شكل فوازير وكانت اول فوازير لشريهان واتكلمنا عنها قبل كدة، لكن المخرج المرة دي هو فهمي عبد الحميد، وبعدين اتفصلت واتعملت مسلسل أكتر من نسخة كان منهم نسخة لفاروق الفيشاوي ونيرمين الفقي ونسخة تانية لحسين فهمي ونجلاء فتحي وأخر نسخة كانت شريف منير ونيكول سابا ، يالا الله يرحمك يا زوزو نبيل أنتي وعبدالرحيم الزرقاني.