290 مشاهدة
الإسلام المستورد مش “سينيه” .. وسطية مصر جزء من شخصيتها
الإسلام المصري
في مستوى معين الناس بتقول “لازم تجيب الحاجة سينيه، من بلدها”، في مستوى تاني يقولوا ” المستورد بيعيش اكتر، أصلي ومش مضروب”، المستوى التالت بقى أو كلاس سي زي ما بيقولوا الأخوة المثقفين على ولاد البلد ” هات صيني ياعم وقصر رخيص وتمنه مرتاح”.
لكن كل المستويات في مصر بتحب المستورد، حتى أنا مبحبش غير قطع الغيار الأصلية.
بس الحقيقة في حاجة افتقدناها كلنا في مصر، اللي عندها قدرة غريبة على إنها تمصر أي معنى أو قيمة تدخلها، تلونها بلون النيل وتدفيها بروح المصريين الدافية المحبة للحياة.
بس ايه رأيكم ان حتى الاسلام بكل قيمته وعظمته وتسامحه لما دخل مصر اتمصر هو كمان، واتحولت مصر خلال 3 قرون بس من دخوله من دولة تابعة الى دولة تقود العالم الاسلامي دينيا ويمكن كمان سياسياً.
واشتهر الاسلام في مصر بوسطيته واعتداله ولان خير الأمور الوسط ، قدرت مصر تحمي الدين الاسلامي طول قرون طويلة اتعرضت فيها الأمة الاسلامية لأيام انتصار وسنين انكسار.
وفي الوقت اللي كان الأزهر فيه منارة الإسلام في العالم كله، كانت بتقوم حركة سياسية في مكان ما في دولة عربية، اضطررت للتحالف مع حركة دينية علشان تديها إذن شرعي بغزو بقية الجزيرة، تحت ستار محاربة الكفار، المبرر علشان تقدر تحارب الأخر انك تكفره فتبقى حربك معاه جهاد، وبنجاح الحركة السياسية دي واستقرارها في دولتها ، كان طبيعي انها تعتنق المذهب الديني ده.
ومع بداية الانفتاح الاقتصادي في مصر وخروج المصريين للعمل في دول الخليج اللي من ضمنهم الدولة دي، بدأو يتعاملوا مع المذهب ده، وبتعايشهم هناك لسنين طويلة، وبداية رجوعهم لمصر بداية التمنينيات، وضعف الازهر في الفترة دي بعد انتمائه بالكامل للنظام الفاسد، كان طبيعي يحاربوا الأزهر كمان لانه شوكة بتضايقهم.
كان طبيعي الدول دي تحول تصدرلنا مذهبها مرة في قلوب وعقول الناس اللي راجعة من عندهم بفعل العشرة يعني، والعشرة متهونش على المصريين ، ومرة تانية بالفلوس خاصة بعد الانفتاح الاعلامي الكبير في اخر ٢٠ سنة بعمل قنوات فضائية دينية متخصصة لنشر المذهب ده.
علشان يتحول الاسلام الوسطي المصري الخالص اللي بيشبه مصر بموقعها الجغرافي وأصولها وعادتها وتقاليدها، إلى إسلام متطرف مبيقبلش الآخر وميعرفش يعيش معاه، والآخر بالنسباله هو كل اللي يخالفه إن شاله في مجرد تربية دقن.
المرادي مكانش المستورد أحسن
لإن الإسلام المستورد مكنش أحسن خالص من الاسلام المصري الأقرب بروحه كتير من دعوة سيدنا محمد عليه الصلاة والسلام.
الكاتب
ما هو انطباعك؟
