الديانات السماوية إسمها إبراهيمية.. ومش تلاتة

صَبِّأت ورَّب الكعبة.

أ صَبِّأت يا رجل.

لقد صَبّأ.

جُمل كتير من النوع ده سمعناها في أفلام زي الشيماء وفجر الإسلام وهجرة الرسول.. إلى أخر أفلام كانت بتعرض بانتظام بشكل موسمي، مولد النبي.. راس السنة الهجرية.. ليلة الإسراء والمعراج.. طلعة رجب.. إلخ، وعادة الجملة من دول بتيجي على لسان أي ممثل وشه واخد فُرشة سواد وحواجبه أتقل من شنب نيتشة.

طبعًا أغلبنا ماوقفش عندها أو وقف شوية وكمل عادي، لأن الجيل اللي أتربى ع الأفلام دي كانت المعلومة أيامه صعبة المنال، بالتالي حتى اللي سأل نفسه إيه موضوع “الصبئان” ده.. مالقاش إجابة، فبالنسبة لمعظمنا مات السر وأندفن مع كفار قريش أو أتبخر مع ريحة حنظلة.

الواحد لما كبر وغوي القراية عرف شوية عن السر القديم بس ماكنش في حاجة مُلحة أني أحكيه، بس بما أن البابا فرنسيس، بابا الفاتيكان، راح العراق وفتش السر، وصورة الشيخ ستار جبار الحلو، رئيس الصابئة، غرقت السوشيال ميديا، فأسمحوا لي أعترف لكم بحاجة مهمة كنت مخبيها عليكم من سنين طويلة (بصوت حسين صدقي)، الديانات الإبراهيمية الشهيرة بالسماوية مش تلاتة زي ما مشهور (يهودية، مسيحية، إسلام) وخلاص على كده… لأ، فيه ديانة رابعة أقدم منهم كلهم.

الصابئة المندائيين.. صابئة هي أشتقاق من كلمة “صبا” -بالآرامية- بمعنى “تعمّد” و”مندانية” معناه “المعرفة”، تبقى على بعضيها تعمد بالمعرفة، وهي أقدم الديانات الإبراهيمية الموجودة. جايبين الفيلم من أوله خالص.. مؤمنين أنهم على ديانة النبي آدم، يعني ماحدش يعرف يعلي عليهم، ومعترفين بنبوة كل من: شيت بن آدم، انوش بن شيت، نوح، سام بن نوح، إدريس، إبراهيم، زكريا، يحيى بن زكريا.

ليهم لغتهم (المندائية) وأبجديتها مكونة من 24 حرف (آ، ب، ج، د، هـ، و، ز، ح، ط، ي، ك، ل، م، ن، س، ع، ف، ص، ق، ر، ش، ت، إد، أ)، دي اللي ينطبق عليها (أبجد هوز حطي كلمن) بتاعت ليلى مراد، وهي لغة كتابهم المقدس كنزا ربا أو (الكنز العظيم)، وحسب أعتقادهم هو تجميع لما أُنّزِل على الأنبياء اللي ذكرناهم.

أجمل ما في الصابئة المندائيين أنهم ناس في حالهم.. ماعندهمش فتوحات أو حروب مقدسة ولا حتى دعوة أو تبشير، تقريبا كده دي الديانة الإبراهيمية الوحيدة اللي مابتحاربش المختلفين معاها، بالعكس تمامًا.. دول حتى مابيقبلوش حد ينضم ليهم، تحسهم كده ناس رايقة ومش عايزين وجع قلب.. بلا مؤمنين جدد بلا خوتة، بيتجوز من بعض وعيالهم زي باقي الديانات ياخدوا الدين بالوراثة وبارك الله فيما رزق على كده.

بُنيَت المندائية على خمس

• اهْدوثا وسَهْدُوثَا اِدْ هَيِّي رَبَّا (الشهادة بتوحيد الله الحي)
• اِرْشَامَا وَصَلُّوتَا (الوضوء والصلاة).. 3 صلوات يوميًا.. القبلة جهة الشَمَال حيث (بَيْت هَيِّي) يعني بيت الحي أو بيت الحياة الآخرة.. مافيش صلاة جماعة.
• صَوْمَا (الصيام).. الصيام الكبير مدى الحياة.. ده عن القتل والسرقة والزنا، الصيام الصغير 36 يوم متوزعين على السنة.. يمتنعوا فيها عن أكل اللحوم.
• زِدْقَا وَطَبْوُثَا (الصدقة).. مافيش نسبة أو رقم محدد.
• مَصْبُتَا إِدْ هَيِّي وَاِطْمَاشَا (صبغة الحي).. يعني التطهر/التعميد، جنب تعميد المواليد فيه منه أنواع كتير.

غير اللغة الخاصة والكتاب المقدس فيه كمان تقويم خاص بيهم، وهو مُركب.. عداد شغال من النبي آدم وعداد تاني شغال من النبي يحيى بن زكريا، وطبعًا معروف باسم السنة المندائية، واليوم المقدس حداهم هو الأحد زي المسيحية.. أو كده المسيحية هي اللي زيهم، بحكم الأقدمية.

كتاب كنزا ربا مقسوم قسمين، يمين.. ده فيه قصص ووصف الإله والملاكية والجنة، يسار.. فيه وصف الحياة بعد الموت، وبيتكون من (ابْوَاثِي) مفردها “بوثة”، حسب فهمي ده اسم النص زي “سورة” في القرآن و”إصحاح” في التوراة. من أهم الحاجات اللي بيشدد عليها الكتاب هي الجواز، العزوبية عندهم حرام شرعًا… فحسب نص (من الكتاب اليمين) ما بيقول:

أيُّها الرِّجال (140) إذا اتَّخذتُم لأنفُسِكم أزواجًا فاختاروا من بَينِكم وأحبُّوهنّ (141) وَلْيحفَظْ أحَدُكم الآخر (142) واعتَنوا ببعضِكم عنايةَ العيونِ بالأقدام (143) ليحبّ بعضُكم بعضًا (144) وليحتملْ بعضُكم بعضًا، تَعبُروا بحر سوف العظيم.

وفيه طلاق لكن في أضيق الحدود.

خذوا المحبة الصادقة من الزوجة، ولاتتركوا أسم الكشطا من بعضكم البعض حتى تتوفوا وأنتم صالحون، أنّ كل من يترك زوجته التي ليس فيها النقص والخيانة والكَذب ويذهب للشهوات والغرام في هذا العالم سوف يُدان.

وطبقًا للنص ده نفسه بيتم تحريم الجواز من أي ديانة تانية.

الأعياد المندائية

إقرأ أيضا

“تناول المشيمة بعد الولادة” .. لماذا تلجأ النساء لذلك؟

• البر ونايا (عيد الخليقة العلوي).. ده عيد خلق العوالم النورانية، ميعاده في مايو.
• دهوا ربا (عيد الخليقة المادي).. ده عيد خلق الشمس والقمر والكواكب والأرض، ميعاده في يوليو.
• عيد شيشلام (بعد العيد اللي فات بيوم).. وهو ذكرى حلول السلام والمحبة على الأرض.
• دهوا هنينا (عيد الأزهار).. ذكرى عودة جبريل/جبرائيل للسما يبشر بأزدهار الأرض، ميعاده في نوفمبر.
• دهفا إد ديما (عيد التعميد الذهبي).. ذكرى تعميد الملائكة في عالم النور وتعميد جبريل للنبي آدم وفيه تم تعميد النبي يحيى، وميعاده في أكتوبر.

على فكرة الصابئة مش بس طلعوا في الأفلام الديني القديمة.. لأ دول كمان مذكورين في القرآن أكتر من مرة:

إِنَّ الَّذِينَ آمَنُوا وَالَّذِينَ هَادُوا وَالنَّصَارَىٰ وَالصَّابِئِينَ مَنْ آمَنَ بِاللَّهِ وَالْيَوْمِ الْآخِرِ وَعَمِلَ صَالِحًا فَلَهُمْ أَجْرُهُمْ عِنْدَ رَبِّهِمْ وَلَا خَوْفٌ عَلَيْهِمْ وَلَا هُمْ يَحْزَنُونَ (62 – البقرة).

إنَّ الَّذِينَ آمَنُوا وَالَّذِينَ هَادُوا وَالصَّابِئُونَ وَالنَّصَارَى مَنْ آمَنَ بِاللَّهِ وَالْيَوْمِ الْآخِرِ وَعَمِلَ صَالِحًا فَلَا خَوْفٌ عَلَيْهِمْ وَلَا هُمْ يَحْزَنُونَ (69 – المائدة).

إِنَّ الَّذِينَ آمَنُوا وَالَّذِينَ هَادُوا وَالصَّابِئِينَ وَالنَّصَارَىٰ وَالْمَجُوسَ وَالَّذِينَ أَشْرَكُوا إِنَّ اللَّهَ يَفْصِلُ بَيْنَهُمْ يَوْمَ الْقِيَامَةِ ۚ إِنَّ اللَّهَ عَلَىٰ كُلِّ شَيْءٍ شَهِيدٌ (17 – الحج).

الآيات اللي فاتوا تم ذكرهم بشكل مباشر.. فيه بقى حالة رابعة غير مباشرة بس في رآيي إنها قوية جدًا.. ذكرنا أن الصابئة كتابهم المقدس بيضم ما أُنّزِل على عدد من الأنبياء منهم يحيى بن زكريا.. اللي بيرد ذكره وذكر ما أنزل عليه في سورة مريم.