السينما هي الفن السابع .. تعالى نقولك إيه هما الفنون الستة التانيين

من واحنا صغيرين بنشوف في التليفزيون برنامج عن السينما مشهور كان اسمه “الفن السابع”، علي قد ما كنت بحب البرنامج ده علي قد ما كنت بستغرب، ليه السينما هي “الفن السابع”؟ ولو هي رقم 7 فين الفنون اللي قبلها؟ وهل فيه فنون تانية بعد كدة؟ يعني فيه الفن التامن مثلا؟ الله أعلم…لكن عامة، النهاردة حبيت أشرح لأهلي وحبايبي والمجتمع والناس السبع فنون اللي قامت عليها الحضارة الإنسانية، واللي من غيرها بنتحول لبرابرة همجيين، ملناش هم غير علي الأكل والشرب…

الفن الأول: العمارة.
فن العمارة باختصار هو تصميم المنشآت الخارجية، وتصميمها الداخلي، بما يتفق مع البيئة اللي حواليها، ويتعامل بتناغم حوالين البيئة الي بتتبني فيها الحاجة دي، يعني باختصار العمارة مش انك ترص عمارات جنب بعض، لأ، هي انك تستخدم عناصر البيئة اللي حواليك، وتبني شيء يكون جزء م البيئة دي، وباستخدام طرق العمارة دي، بتطلع بشئ عظيم…
مش هنتكلم عن المهندسين المعماريين العظما، لكن من أعظم المعماريين في تاريخ مصر الحديثة هو: حسن فتحي، ولو بتتكلم عن المستوي العربي هتلاقي: زها حديد.

الفن الثاني: الموسيقي.
الموسيقي مصطلح يوناني، باختصار معناه انك تستخدم الات موسيقية أو آلة واحدة في خلق معزوفة مكانتش موجودة قبل كدة، أو العمل علي تنغيم كل المقطوعات دي بما يشكل معزوفة واحدة، مظبوطة الإيقاع والأوزان، بعيدا عن الدوشة والنشاز.
طبعا الموسيقي غير العزف، ولو الواحد قعد يتعلم علي آلة واحدة ألف سنة مش هيطلع معزوفة واحدة عظيمة زي معزوفات “موتسارت”، وطبعا جانب من الموسيقي هو التلحين، لكن خلق الموسيقي للموسيقي هو الشئ الأجمل والأسمي، ومن أهم المؤلفين في العالم: بيتهوفن، موزار، فاجنر، وغيرهم وغيرهم من عظماء الموسيقي الكلاسيكية.

الفن التالت: الرسم.
الرسم مش تلوين، ولا تلطيخ علي لوح، الرسم من أسمي الفنون اللي اتوجدت علي الأرض من وقت خلقها، شيء بيسمو بالروح، وبيعبر عن مكنون الرسام، ومفيش فن أكتر من الرسم أقدر علي التعبير عن الفنان في العالم. الرسم له اكتر من مذهب ومدرسة ف منها مثلا: المدرسة التشيكيلية، ودي بتعتمد علي محاكاة الطبيعة في الرسم، سواء رسم البورتريهات الشخصية، أو لوحات الطبيعة الصامتة، ودي من أهم روادها “كلود مونيه” وعلي المستوي المصري “محمود سعيد”، والمدرسة التجريدية، ودي بتعتمد علي استخلاص مشاعر وملامح من الشئ، ثم رسم شيء جديد، من أهم روادها هو “بيكاسو”.
بردو تحت الرسم بنلاقي “الزخرفة” و”الكاريكاتير” وغيرهم من أنواع الرسم المختلفة اللي متسمحش المقالة بذكرها.

الفن الرابع: النحت.
لو نقدر نقول، ان النحت هو التجسيد الثلاثي الأبعاد للرسم هنقول كدة، النحت هو أحد أقدم الفنون الموجودة علي وجه الأرض، من أول اجدادنا الفراعنة والأشوريين، لحد التماثيل العظيمة الموجودة في الميادين والشوارع المصرية :/، فن النحت فن مميز جدا، وعشان تعرف قيمته زور مدينة زي “الفاتيكان” الي هي عبارة عن متحف مفتوح، لنحاتين عظام زي “رفايللو” و “دوناتيللو” أيوة مش سلاحف النينجا، دول فنانين عاشو فعلا ف عصر النهضة.
طبعا من اهم النحاتين المصريين: “محمود مختار” و “عبد البديع عبد الحي” وغيرهم من النحاتين الكبار.

الفن الخامس: الشعر.
زي ما النحت هو التجسيد الثلاثي الأبعاد للرسم، ف الشعر هو التجسيد الكلامي للموسيقي، ف بدل ما بتستخدم آلة موسيقية عشان تعمل معزوفة، بتستخدم الكلام والحروف عشان تجسد ده، والموضوع بيكون معتمد علي الوزن والقافية، وقصيدة.
الشعر فن قديم، من أول “فيرجيل” اللي كتب “الإلياذة” و”الأوديسة” لحد شعرائنا العرب من أمثال “المتنبي” وانتهاءا بشعراء مصريين عظام زي “أحمد شوقي”، وكان بيستخدم للمبارزات الكلامية في عصر الجاهلية، وبيعتمد علي فصاحة وبلاغة الشخص اللي بيألفه طبعا.

إقرأ أيضا

بـ101 مليون دولار .. مصر تعزز حضورها في قطاع الملابس بالسوق التركية

الفن السادس: الرقص.
وسيلة ربط الجسد بالروح والتعبير عن مشاعر الانسان باستخدام لغة الجسد، للرقص أنواع كتير، منها التعبيري، الباليه، الشرقي، ولكل شعب رقصة وطنية بتختلف حسب ثقافة الشعب، فتلاقي الخليجي بيرقص بالسيف، وتلاقي المصريين عندهم الرقص الشرقي، وتلاقي شعوب عندها الرقص البدوي.
في الحضارات القديمة اعتبر الرقص وسيلة تقرب للآلهة، وكان فيه في مصر القديمة راقصات للمعبد، مخصصات للإله بس، وميزة الرقص وقمته ان الراقص يتوحد مع الموسيقي الي شغالة، ويصبح هو والموسيقي جسد واحد.
طبعا من أشهر التجارب الفنية للرقص في مصر هي: فرقة رضا.
الفن السابع: السينما.
ظهر فن السينما في القرن ال19 علي ايدين الأخويين “لوميير” في فرنسا، من بعدها انتشر في كل أنحاء العالم، بدأ بالسينما الصامتة، اللي اعتمدت في الأول علي تعابير وحركات وردود أفعال مبالغ فيها لاضحاك الجمهور، مع الاستعانة ببعض اللوحات المكتوبة عشان تشرح المشاهد، ومن رواد عصر السينما الصامتة الكوميدية: “تشارلي تشابلن” و “بستر كيتون”، ثم دخلت السينما عهد الكلام، والموسيقي التصويرية، واتطور الفن من مجرد سكتشات كوميدية لعلم، بيشمل السيناريو والحوار والإخراج والاضاءة.
طبعا من رواد فن السينما في مصر هو المخرج: “محمد كريم” اللي اتعلم في “ألمانيا” وتلميذه “صلاح أبو سيف” اللي اتسمي بمخرج الواقعية المصرية وغيرهم وغيرهم من عظام المهنة دي.
دول كانو أنواع الفنون السبعة، لو حابب نتناقش ممكن تسيب كومنت ولو عجبتك المقالة ممكن تعمل شير ولايك!