الفرق بين الفنان محمد سعد والذكاء

محمد التهامي
حاصل على درجة الدكتوراه ومهتم بالفنون بشكل عام والبحث في التاريخ وصدرت له العديد من الكتب

كاتب نجم جديد

إزاي الفنان محمد سعد يكون مصيره بالصورة دي، محمد سعد كان فنان ناجح جدًا وفنان شاطر جدًا، موهبة حقيقية ظهرت في فيلم الناظر مع المخرج شريف عرفة، بعد عدة أدوار صغيرة في مسلسلات وأفلام متنوعة يتحول الممثل الشاب إلى نجم كبير، ممكن نقول أنه اتحول لظاهرة مش مجرد نجم شباك.

خارج من عباءة شريف عرفة، يحقق الفنان محمد سعد نجاح كبير، أفلام كتير بتحقق إيرادات خيالية في تاريخ السينما المصرية، ممثل له شعبية أسطورية طوابير كبيرة على السينمات، محدش يقدر ينكر نجاح محمد سعد في أفلام زي اللمبي واللي بالي بالك وعوكل و غيرها، يفضل محمد سعد يقدم نفس الدور، دور شخصية الشخص صاحب الإعاقة.

بعد تراجع الايرادات تجي له فرصة مسلسل شمس الانصاري مع الفنان الكبير فاروق الفيشاوي، وكان مفترض إنه مسلسل صعيدي وإن دور محمد سعد دور صعيدي جاد حسب السيناريو المكتوب فى الأول وحسب تصريحات فاروق الفيشاوي وقتها، ولكن محمد سعد ياخد المسلسل ناحية اللمبي و تقديم نفس الشخصيات والمسلسل يفشل فشل ذريع وقتها، لأن إطار المسلسل غير المحتوى المقدم ويوجد عدم ترابط بين الأحداث.

للأسف محمد سعد مش بيسمع لا كلام مؤلف ولا كلام مخرج، غرور كبير في التعامل مع المحيطين، بنشوف فيديوهات مسربة له بيتعدى على المخرجين، مخرجين كتير بتسيب الشغل معه، تجي له فرصة عظيمة مع شريف عرفة تاني، المخرج اللي اكتشفه في البداية، يحاول شريف عرفة يعيد تقديمه في فيلم الكنز، فيلم مهم ودور جاد دور بشر، فرصة عظيمة مفروض كان محمد سعد يستغلها بس نقول ايه؟ مفيش فايدة.

يرجع تاني محمد سعد مش لازم يبعد عن الكوميديا بس لازم يقدم شخصيات درامية وجادة، لازم يتعلم من مشوار عادل إمام لما عادل قرر أنه يقدم أدوار جادة زي المشبوه و الجن والإنس و غيرها، تنوع الدرامي مطلوب، وأعتقد أن محمد سعد حصل له اكتفاء من الأداء الكوميدي محتاج يقدم أدوار جادة زي بشر .. أدوار حقيقية.

إقرأ أيضا