1٬898 مشاهدة
العلاقات (1): الهروب التكتيكي للكلب المكسيكي
البدايات دائماً ممتعة.. وقصص الحب ربما تجعل من العالم مكانا أفضل ومناسبا للحياة، ولكن هناك مجموعة من العلاقات المفروض نحذر منها.
النوع الأول اللي حنتكلم عنه النهاردة، هو النوع الزئبقي، بتاع “أنا ما قولتش حاجة واضحة”ـ بس أنا لازق لك طول الوقت وطول اليوم ومراقب الاحداث ومتوغل في حياتك، أسبوعين مع تكثيف الخروجات ومكالمات التليفون، حتنعزلي عن العالم مكتفية بما يقدمه الشخص اللي لسه مت وضحش أي شيء ليه علاقة بالعلاقة ما بينكم، مع إن كل تصرفاته حتكون شبه البدايات.. عايزة ورد يا إبراهيم؟.. حتلاقي ورد.. عايزة تشتكي من بنت خالتك اللي بتنفسن عليكي؟.. حيسمعك. عايزة تسمعي كلام حلو؟..حتسمعي.. عايزة تخرجي وزهقانة؟.. وليه تخرجي مع أي حد تاني حيحرج.
حتعيشي لقطة ان التليفون ما بيسبكيش ولو قفل حيرن بعد خمس دقايق عشان يقولك انه مقدرش يقعد من غير ما يكلمك .. دي المرحلة الأولى.. عادة دي بتستمر لمدة أسبوعين، بتكوني تخيلتي بعدها إن ده المنقذ وفارس الأحلام وان دعواتك ودعوات أهلك ودعوات الجيران كمان استجابت، وبيكون فيه جزء تاني للقصة.
الهروب التكتيكي للكلب المكسيكي:
بيبدأ يتجاهل مكالماتك، ما يردش.. وطبعا مش محتاجة أقول ما بيتصلش.. هنا الشخص ده تعامل معاكي باستراتيجية الديلر.. لما بيقابل شخص جديد وبيبتدي يدي له صنف عالي الجودة، بيتعلق بيه تماما، وبالتالي بيرجع له، ولأنه مصدره الوحيد بعد سحب الصنف ده منه فحيقبل بأيا كان اللي حيوفرهوله، فهو لأنك تعلقتي مع بداية شبه العلاقة، مع انسحابه حتتحولي لأشبه بمدمن بيدور على مخدره الخاص.
الظهور الغير مكلف:
تبعا لكل اللي فوق ده بمجرد ظهوره، اللي بيكون متوقع في خطته إنك حتقبلي بأي نوع من أنواع التواجد ليه، وغالبا بتقوم معظم البنات بخداع نفسها ان الشخص اللي كان موجود أول أسبوعين ده حيرجع تاني بس بيمر بأزمة هوية بقى ولا أزمة نفسية، والحقيقي جدا أنه ده ما بيحصلش هو طاقته ومجهوده توقفت عند أول أسبوعين، فأصبح الموضوع أبسط، هو في علاقة بيمارس فيها دور الطحلب، بيتغذى على الشخص اللي قدامه بدون ما يقدم أي شيء أو يكون له أي فايدة أو يتحمل مسئوليات وعقبات، وبالتالي أول ما تلاقي خطة الكلب المكسيكي .. سيبيه.. بمجرد تنفيذه للخطة دي لازم تعرفي انك تسيبيه هو الحل الأمثل، والحقيقة إنك لما تسيبيه مش حتلاقي منه أي رد فعل أو محاولات لتصليح أي شيء، لأن بالنسبة ليه، مفيش شيء يتصلح، مع الجملة الشهيرة “أنا ما قولتش حاجة، إنتي فهمتي صداقتنا غلط”، فده شخص حتى لا يصلح للفرند زون.. ده شخص من مصاصي الطاقة، بيتغذى على طاقة البشر الآخرين عشان يعيش حياة هو أكثر جبنا من أنه يوضح إنه عايز يعيشها أو إنه يتخلى عنها.
اقرأ أيضا
الكاتب
ما هو انطباعك؟
