الليمون و٥ استخدامات مدهشة .. أه يالموني

الليمون فاكهة جميلة، من أحب الفواكه لقلبي، من الحمضيات، زيه زي البرتقال والنارنج واليوسفي، بينمو بشكل مكثف في دول حوض البحر المتوسط، ومن أهم ميزاته اننا بنشوفه طول السنة، علي عكس “البرتقال” بيطلع في الشتا بس، النهاردة، جيت أوريكم أكتر من فايدة للمون غير انك تشربه وتعمل بيه عصير، عشان تهدي أعصابك..
قبل ما نتكلم عن فوايد اللمون التانية خلونا نشوف الأول فوايده الصحية، واللي كلنا عارفينها بس ف الإعادة الإفادة:
1. مضاد للزكام.
2. بينظم ضربات القلب وبيوطي الضغط.
3. مضاد للباكتيريا.
4. اللمون مع الزنجبيل بيعالج اضطرابات المعدة.
5. بينشط الدورة الدموية وبيحمي القلب..
لكن لليمون فوايد تانية بردو، خلينا نشوفها مع بعض:
1. فوايد الليمون للبشرة.
عشان تخلي وشك مشرق دايما، ممكن تستخدمي عصير الليمون مع خيار وتدهني بيه وشك كويس، عشر دقايق ونغسله بمية ورد، وهتلاقي وشك بيشرق ومضئ علي غير العادة.

ممكن بردو تضيفي معلقة عسل نحل، مع معلقتين عصير لمون للبشرة الدهنية، وتسيبي الماسك ده ربع ساعة وبعد كدة نغسله، مرتين كل أسبوع عشان تشوفي الفرق.

والليمون بردو مفيد في شد البشرة، لو جبنا معلقة عصير لمون ومعلقة لبن وعملنا منهم ماسك ده بيكون مغذي وبيشد البشرة مع بعض.

2. فوايد الليمون للشعر.
الليمون ممكن يساعدك في علاج تقصف الشعر، عن طريق انك تجيبي نص لتر مية، تلات معالق عصيرلمون مع زنجبيل مطحون، وتغليهم وتدلكي بيهم فروة راسك وهتشوفي الفرق.

ممكن تفتحي بيه لون شعرك، عن طريق انك ترشي علي شعرك مية بلمون وانتي ف الشمس، ده هيساعدك انك تفتحي لون شعرك من غير صبغات تضره أو تأذيه.

3. تلميع المعادن.
لو عندك في البيت مقابض “كروم” دي لونها بيتغير مع الوقت والاستخدام، والمية مش هترجعها زي ماكانت، فالحل انك تلمعيها بعصير لمون وهترجع زي الجديدة، كذلك لو عندك فضيات، هتطوس لو لمعتيها بالمية، ف الحل انك تلمعيها بمزيج من “كربونات الصوديوم” واللمون.

4. معطر طبيعي.
لو كنتي بتعملي أكلة ليها ريحة نفاذة زي “السمك”، “الرنجة” أو “الفسيخ” ف الليمون هو خلاصكم الوحيد من الريحة دي، لأنها مش بتطلع من الايد ف الحل الوحيد انك تدعك ايدك بقشر لمون جامد وتغسلها بعد كدة وهتلاقي مفيش أثر للريحة تماما.

كذلك بالنسبة للمطبخ ممكن تخلي شوية مية وتحط فيهم كذا لمونة مقطوعة وده هيخفي الريحة تماما.

5. التطهير.
“رخامة المطبخ” من أكتر الحاجات اللي ممكن تتعرض للمايكروبات في البيت، عشان تحافظي دايما علي نضافتها، استخدمي مزيج من الخل واللمون مع تخفيف بشوية مية وهتلاقي عندك محلول للتطهير أورجانيك مية في المية من غير أي إضافات صناعية.
دي كانت فوايد تانية للمون، لو عندك استخدام تاني للمون قولنا عليه في التعليقات واوعي تنسي تعمل شير ولايك للمقالة..!