النميمة في الشغل .. تسلية أوقات فراغ

النميمة.. انا شغالة في مكتب صغير، والمكتب الصغير فيه ناس كتير، بينهم علاقات، والنميمة جزء أساسي لا يتجزأ من حياتي اليومية في الشغل، وللنميمة أسباب كتير

السبب الأول: الفراغ..!
أول وأحد أسباب النميمة الرئيسية هو الفراغ، الموظف من دول ييجي شغله 9، يخلص شغله 9 ونص، وبعد كدة يفضل قاعد من ساعتها لحد ما يخلص، فاضي، ف يقعد يبص ف السقف شوية، ويحضر للغدا شوية، ويقرا الجرايد والمجلات، وبعد كل ده يفضل عنده فراغ فظيع، وقتها يبدأ يبص لزمايله، مين اشتري بوكسر جديد، ومين راكن عربيته ف مكان المدير وهكذا…

السبب التاني: مناخيرك كبيرة..
السبب التاني ف انتشار النميمة في المكاتب هي انك شخص حشري بطبعك، حابب تتكلم علي ده ودي، وتجيب ف سيرة الناس ليل ونهار، وبالتالي، مناخيرك بقت أكبر عضو ف وشك، ارحم نفسك يا حشري..!

السبب التالت: لت النسوان.
السبب التالت هو انتشار عدد كبير من الستات في الشغل، والستات بطبعهم نمامين، أو مستنيين الفرصة لحد مناسب ينمو معاه، بالتالي، الرغي والنميمة هي شئ طيبعي ومثالي بسبب انتشار الجنس الناعم في سوق العمل المصرية..

السبب الرابع: العواطف والحوووب…
بطبيعة الحال بما ان فيه مكان شغل، ف 99.9% م البنات اللي شغالة هناك نازلة تستلقط عريس، بالتالي فيه خمسة من أصل أربع شباب نازلين يشقطو/ يتعرفو او يتجوزو، ف تلاقي فلان بيحب علانة، وكل يوم بيجيبلها سندوتشات الفطار، وبيعملها شاي معاه في البوفيه، وبيجيبلها بسكوت كحاجة حلوة، وهكذا…طبعا عصافير الحب دول عامل حفاز لأي حد حتي لو مش بيحب يجيب في سيرة الناس انه يتكلم 😀

السبب الأخير: الشركات الكبيرة..
اتساع حجم الشركات والمصالح الحكومية، هو أكبر سبب لانتشار النميمة في الوطن العربي كله، ف تبدأ تنتشر أساطير عن “قسم الحسابات” الي رئيسه بيزوغ م الشغل، ومديرة قسم الائتمان الي شربت شاي بالياسمين، وغيرهم وغيرهم من حواديت ياعالم هي صح ولا غلط بس، أهي حواديت مسلية وخلاص!

في النهاية نحب نقولكم ان النميمة شئ غلط، ووحش، ومحدش يعمل كدة تاني، ولو حد عرف حاجة عن حد ميقولهاش غير ليا انا بس 😀