اليسار القومي ومتلازمة النضال اللا إرادي

يوم 7 أكتوبر 2023 شنت حركة المقاومة الإسلامية “حماس” هجمات في محيط غزة، أدت لمقتل حوالي 1500 شخص بين مدني وعسكري ومستوطن إسرائيلي.. وجنسيات تانية كانت في حفلة مزيكا هناك. ومن وقتها والفلسطينية بيدفعوا فاتورة كارثية (41 ألف قتيل و92 ألف مصاب أغلبهم ستات وعيال صغيرة؛ لغاية دلوقتي، وفقًا لإحصائيات وزارة الصحة التابعة لحماس) فطبيعي إنهم دلوقتي بيلعنوا حماس واللي جابوها ع السبحة، بس اليسار المصري بكرفته القومية كان له رأي تاني.

رغم إن خالد مشعل، أحد مؤسسي حركة حماس، خرج من قصره في الدوحة يتبجح ويتكلم باستهتار شديد بحياة عشرات الآلاف ومصائر ملايين الفلسطينية.. بوصفها خسائر تكتيكية.

رئيس حركة حماس في الخارج خالد مشعل: خسائر حماس “تكتيكية” وخسائر إسرائيل “استراتيجية” #فلسطين#حماس#قناة_الحدث pic.twitter.com/AvvSgEy1k7

— ا لـحـدث (@AlHadath) October 7, 2024

ورغم إن التصريحات دي مش الأولى من نوعها، وإن حماس من أول لحظة بتتعامل بوصفها مليشيا، خاطفة السلطة بقوة السلاح ليها أكتر من عشر سنين، وحسابات المكسب والخسارة عندها مبنية على الأساس ده، بالتالي أي خراب يحصل في البلد وأي مصيبة تحط على الشعب الفلسطيني ماتخصهاش، بمعنى (مسلحينهم في الأنفاق والمدنيين تحت النار).

بعد كل ده؛ لسه فيه مصريين محسوبين على اليسار القومي حدانا، قاعدين في بيوتهم آمنيين سالمين وبيدعموا حماس بوصفها “مقاومة وطنية”!!

حنجورية فارغة..

السيد حمدين صباحي، مثلًا، وبمنتهى الاستسهال (مش عايز أقول تنطع سياسي) بيساوي بين نصر أكتوبر 1973، اللي حرر الأرض وأجبر الصهاينة يقعدوا على ترابيزة المفاوضات، وبين عملية “طوفان الأقصى” اللي غرق شعبه والشعوب المجاورة. غير المصابين والقتلى فيه أكتر من مليون نازح والمدينة نفسها إتساوت بالأرض.

القومجية واليسار المتعاص إسلامي عودونا على الحنجورية الفارغة، بس في المشهد ده أصبح ينطبق عليهم تصنيف “صايع بلكونة”، على رأي الريس زكريا رعنا يديم سيرته بكل بهجة وانبساط.

قاعدين قصاد الشاشات بيتفرجوا ع المجزرة ومقضينها تشجيع وتضامن من الشمخ الجواني، ولما لقوا الغزاوية بيسبوا ويلعنوا في حماس وعمايلها.. مش يفهموا بقى ويصححوا موقفهم، أبسلوتلي، دول قرروا يزايدوا ع الناس المحروق قلبها و$%#َ$ طالع، مزايدة وصلت لتخوين ضحايا الكارثة.. ناس أهاليهم لسه تحت الأنقاض، فالناس تسيب بكائيتها وتدخل تلعن سلسفيلهم.

أي والله.. القادر بيخون الغزاوية الواكلين @#^$%#، ده بغض النظر عن إن البوست السابق.. اللي اليساري بيسفه فيه من معاناة المواطن الفلسطيني، مقالش حاجة غير إنه طرح سؤال وساب الناس هي ترد، على عكس اليساري المُزايد.. اللي قفل التعليقات لما ماستحملش الهجوم عليه.

اليسار والبوصلة الخربانة

أزمة اليسار المصري مش على قد موقفهم من 7 أكتوبر، إنما في كونهم متلحوسين عروبة وإسلام سياسي، وده خلاهم قبل ذكرى سبعة أكتوبر يزايدوا كمان على لبنانيين وسوريين وعراقيين احتفلوا في الشوارع بقتل حسن نصر الله، قائد المليشيا اللي قَتِلِت فيهم على مدار 30 سنة.. وورطت لبنان في حرب بدون الرجوع لا لشعب ولا لآليات سياسية الحزب جزء منها (الحزب له أعضاء في البرلمان اللبناني). وبمنتهى التنطع الإنساني والهطل الأيدلوچي سرح إخواتنا اليساريين يدعموا مليشيات مسلحة بتحارب إسرائيل بالنيابة عن إيران.

إسرائيل كيان عنصري.. إسرائيل كيان استعماري.. قادة إسرائيل مجرمي حرب؛ كلام هنتفق عليه كلنا، زي بالظبط ما متفقين إنهم دولة حديثة عندها قوة عسكرية لا يستهان بيها ولا بغشوميتها وإنهم مدعومين سياسيًا من أكبر راس في الكوكب، فهل من العقل دعم مليشيات مسلحة بتروح تهيج وَحْش مالوش كبير؛ ويجروا يستخبوا في الأنفاق وتسيب مدنيين غلابة فوق الأرض يحاسبوا ع المشاريب؟

وهل فيه يسار في الكوكب بيدعم جماعة مسلحة مشروعها المُعلن إقامة دولة دينية تابعة لسلطة دولة دينية تانية يحكمها رجل دين بالنيابة عن عيل تايه من ألف سنة؟

ضلالات أيدلوچية

بوصفي شيوعي معتزل أقدر أقول عن تجربتي هناك حاجة مشرفة جدًا.. بالتحديد حاجتين:

• عُمري ما اعترفت بالقومجية العروبيين كيسار.. ولسه لحد النهارده شايفهم نموذج لليمين المتطرف.
• مُجَرّْد ما التنظيم اليساري التروتسكي قرر، بالتحايل الرخيص، إنه يتحالف مع الإخوان.. استقَلّْت.

بناءً عليه أقدر، وبالفُم المليان، أوصف مواقف القومجية واليسار ده بإنهم بيعانوا من ضلالات أيدلوچية، وده مش مُجرد كلام مُرسل.. إنما أقدر أوضح ليه، وتعالوا نفندهم بالترتيب حسب مرجعياتهم همه.

إزدواجية العروبجية (حمدين V.S حمدين)

بغض النظر عن إن الخطابين العروبي والإسلامي بيضيعوا حق الفلسطينية في مواجهة خطاب أصولي أقدم منهم، بس المهم هنا هو إن القومجية العرب شايفين فلسطين عربية ولبنان عربية والمنطقة كلها عربية.. وحاجة في منتهى الأچانسات، بالتالي همه ضد الكيان الصهيوني بوصفه “قومية أصولية دخيلة” مُحتل لأراضي عربية، وفي نفس الوقت همه ضد المَد الشيعي في المنطقة.

بالتالي لما يهاجم إسرائيل هنفهمه، بس لما يدعم حزب الله ويقول على قائد مشروع تحويل دولة عربية (لبنان) لمجرد ولاية شيعية تابعة لإيران هنا نعطل، ونبدء نسأل: هو أنتم قوميين عرب ولا بتعرفوا نفسكم بالسلب (أي حاجة ضد إسرائيل) حتى لو احتلال بديل من دولة دينية؟

ملحوظة: أنا مش ضد الشيعة كمعتقد نهائي، فقط بشاور على تناقض الطرح الناصري العروبي.

إقرأ أيضا

حزب الله.. مقاومة لبنانية ولا احتلال إيراني

إزدواجية اليسار

أما اليسار بقى فحالته تصعب ع المؤمن قبل الكافر، فعلى مستوى توافق خطابه مع أيدلوچيته المضادة للدولة الدينية.. نقدر نقول إنه تايه يا وِلّدَاه، وفاتيء نفسه دعم للحركات الدينية المسلحة بوصفها “مقاومة وطنية”، رغم إن ماحدش ضحك عليه ولا ضلله.. والناس من أول لحظة مُعْلِنَة عن أچنداتها “المذهبية الخارجية”.

مش حزب الله بس.. ده حتى قيادات حماس لما تم تصفية حد منهم كان في إيران، والرد كان من إيران، والكبتاجون وكل الأحراز بتاعت إيران.. يعني مافيش أي لمحة مدنية في الموضوع، إحنا من أول لحظة لأخر لحظة بنتعامل مع فاشية دينية واضحة.

ختامًا

مانيش ضد المقاومة في المطلق.. بالعكس مع المقاومة الوطنية، لكني ضد التنظيمات الدينية المسلحة “حماس نموذجًا” وضد المليشيات التابعة لدول خارجية “حزب الله نموذجًا”، ولو كنت واعي كنت هابقى ضد طالبان وهي بتحارف السوفييت لحساب الأمريكان.

كمان أنا متفق تمامًا إن الصراع مابدأش يوم سبعة أكتوبر.. بس برضه التاريخ مابدأش من القرن السادس الميلادي، وفي كل الأحوال تظل عملية سبعة أكتوبر نكسة كبيرة وحلت على راس الشعب الفلسطيني والشعوب المحيطة.. زي ما قال المقاتل في حرب أكتوبر والفنان الواعي لطفي لبيب.

“6 أكتوبر نصر و7 أكتوبر نكسة”.. الفنان المصري لطفي لبيب يؤكد أن 7 أكتوبر هزيمة ونكسة كبيرة في الذكرى السنوية الأولى#مصر#العربية pic.twitter.com/rMBA73ZhPA

— العربية مصر (@AlArabiya_EGY) October 7, 2024