تحت شعار ” فكرّهم ونكّد عليهم” .. تعرف على “أوشين” إله النكد عند المصريين

مصر، النصف الأول من التسعينات، وقتها كانت مصر في شراكة اقتصادية مع اليابان، اليابان قدمت لمصر مترو الأنفاق، كانت انتهت من بناء دار الأوبرا المصرية، في الوقت اللي العربيات الياباني كانت رايحة جاية في الشوارع زي النحل، كانت المطاعم اليابانية ابتدت تنتشر على خفيف، كانت الحديقة اليابانية ملتقى العشاق وكل المزوغين من المدارس والجامعات، ولكن أهم وأكبر حاجة صدرتها اليابان لمصر كانت أوشين.

مسلسل ياباني اتعرض في اليابان في الفترة من 4 ابريل سنة 1983 لغاية 31 مارس سنة 1984، مسلسل موسم واحد مكون من 297 حلقة، مدة الحلقة كانت ولله الحمد ربع ساعة، لكن إزاى تعدي دي على بتوع التلفزيون المصري الأصيل بتاعنا، قاموا لزقوا 3 أو 4 حلقات في بعض وبقوا بيقدموها على أنها حلقة واحدة، بمعنى انهم بيقدموا جرعة نكد مكثفة، لمدة ساعة تقريبا، إذا كان أصحاب النكد قالوا إن الجرعة المسموح بيها دوليا من المسلسل ده ربع ساعة بس، لكن المصري مصري، زي ما بيقرا روشتة الأدوية ويعمل عكسها بالظبط، عمل كدة مع المسلسل الياباني أوشين.

المسلسل من إنتاج الإذاعة اليابانية ودخل مصر ضمن الدعم اللي كانت بتقدمه اليابان لمصر في الوقت ده، المسلسل بطولة ” أيواكو كوباياشي” في دور أوشين في المرحلة العمرية من ” 6 إلى 10 سنين”، و يوكو تاناكا في دور أوشين برضو بس في المرحلة العمرية من “16 لـ46” وشارك في البطولة “نوبواكو أوتوا” في دور أوشين برضو بس في المرحلة من 50 وحتى 84 سنة، وتقريبا محدش مثل غير التلاتة دول في المسلسل ده كله.

المسلسل بتبتدي أحداثه من بداية العشرينات في القرن الماضي، وبنشوف كل ما مرت به اليابان من احداث مأساوية عن طريق مأساة سيئة الحظ تسير على قدمين اسمها أوشين، فبنشاد زلزال سنة 1923 وبنشوف أثر الحرب العالمية الثانية على اليابان، من خلال رحلة أوشين في البحث عن عمل.

اشتغلت أوشين في المسلسل حوالي 5 أو 6 شغلنات، جليسة أطفال وخدامة في البيوت وكوافيرة وبياعة سمك واشتغل مع الأنفار في المزارع والغيطان، وعلى الرغم من إن الحياة قاسية أوي، لكن تحس إنها كانت مستقصدة أوشين بالذات، البنت يا عيني تخرج من نقرة لدحديرة ومن فخ لفخ، وكل مكان تشتغل فيه يطلع عين ابوها وتنضرب وتنشتم وتتكسر وتنطرد في الأخر.

أوشين ما عملش ثورة في مصر وبس لاء، أوشين اتعرض في حوالي 59 دولة على مستوى العالم، وكان السبب في اعتقال 4 من قيادات التلفزيون الإيراني، بسبب إن في برنامج إذاعي إيراني اتصلت به واحدة من الجمهور واتسألت سؤال وحيد وهو ” من هو الرمز والقدوة لكي من نساء المسلمات؟ قامت الست ردت بسلامة نية وقالت “أوشين” ووصلت الحادثة للزعيم الإيراني آية الله الخميني وأمر باعتقال 4 من قيادات التلفزيون علشان أذاعوا المسلسل، واترحمت إيران من باقي الحلقات، وإحنا لاء.

إقرأ أيضا

“من 40 سنة” كيف كانت البرامج الدينية على القناة الثانية في رمضان

تخيلوا أن المسلسل اتبعت للعراق بعد ما اترجم في مصر علشان يساعد الحالة النفسية للشعب العراقي في محاولات الإعمار، علشان الشعب العراقي يتأكد إن مفيش مستحيل!! بالمناسبة سنة 1993 مسلسل أوشين كان أكثر المسلسلات شعبية في اليابان وسنة 2013 أتعمل فيلم بنفس الاسم “أوشين” عن نفس القصة ونفس الست ونفس المأساة.