475 مشاهدة
تعلم الرقص الشرقي من غير موسيقى على أيدي الموتى .. رايحة بينا على فين يا دنيا
بحكم إني بحب الرقص أتابع كل الجديد في عالم الرقص وخاصة الرقص الشرقي ، وطبعا أنا طول عمري متحيزة للراقصات المصريات، لأن إحنا طول عمرنا اسطوات الرقص، وحد ينسى الست تحية ولا الست سامية.
المهم من كام سنة كنت شفت فيديو لراجل بيعلم رقص شرقي، وبيني وبين نفسي مكنتش مقتنعة، لكن تقمصت أداء يسرا وقلت ياختي كده ينفع وكده ينفع.
لكن بقى اللي شوفته المره دي خلاني كنت خلاص هاخرج من جلابيتي ويقولوا الغازية إتجنت.
فيديو على موقع يوتيوب عنوانه تعليم الرقص الشرقي بدون مخالفات شرعية، قعدت أعصر دماغي وأحاول افهم مفهمتش قلت خلاص يابت اتفرجي عليه.
لقيت الفيديو من غير صوت أجيبه يمين أجيبه شمال مفيش صوت، وطلع إنه فعلا معمول من غير موسيقى لانها قال إيه مخالفات شرعية.
قلت يابت وماله اللي يعيش ياما يشوف.
لكن يبقى اللي بيعلم الرقص هياكل عظمية لأ بقا، هي وصلت لكده.
ليه هي دى دروس لتعليم الزومبي الرقص، ولا دروس لتعليم الرقص بعد الممات. ودي اللي تتعلمها بترقصها فين في المقابر ولا يمكن دي معموله للهالوين وانا اللى مش فاهمة
تفيت في عبي وقفلت المصيبة دي وكل اللي خطر على بالي، هو إحنا إيه اللي وصلنا لكده، أد كده غزو البدو مآثر فينا!
الرقص اللي كله حياة، يبقا هياكل عظمية بتعلم حركاته ومن غير مزيكا
الموسيقى اللي غذاء للروح بقت مخالفات شرعية؟!
الفن حياة، الفن عمره ماكان موت ولا هيكون.
للي عايز يشوف الفيديو ليفتكرني كبرت وخرفت وبيجيلي تهيؤات
الكاتب
ما هو انطباعك؟
