حاجات لما تشوفهم هتعرف إنك أكيد في مصر 5

“مصر بلد كبير وله تاريخ عريض، وشعبه أحد أعجب شعوب الدنيا ” .. ده مش كلامي ده كلام كل المؤرخين والسياسيين اللي مروا بالبلد دي والحقيقي أنا مصدقه ولو حد سألني

حقوله : مصر بلد مليانه عجايب وفيها بدع مختلفة عن كل دول العالم، هاحكيلك على 5 حاجات منهم مش هتلاقيهم غير في مصر بس.

1- اثبت شخصيتك ودوس على زرار الأسانسير

في مصر تلاقي كل واحد جي يقف في طابور الاسانسير لازم يضغط على الزرار على الرغم إن اللي قبله ضغط عليه وواضح جدا إنه في طريقه للنزول، لكن أهو زيادة تأكيد، أو يمكن متخييل كده هينزل أسرع. ولو حاولت تشرح له إنه بالفعل إتسجل واللمبة منورة، هتلاقيه يرد ويقولك ماحصلش حاجه، أو مايضرش.

2- حديدة في اليد

من عجائب الأمور إنك تلاقي شخص ما قرر فجأه إنه يركب قطعتين من الحديد أمام محله أو عمارته ويركب عليهم قفل، من أجل حجز مكان لسيارته، وكأنه اشترى هذا المكان لحسابه الخاص، الأغرب رد فعل أي شخص غير راضي من الجيران، لأنه بدل من إنه يبلغ عن صاحب الحديد، لا بيركب له قفل فوق قفله عشان يمنعه من فتح الحديد كنوع من أنواع العقاب.

3- الفكة بركة

طبعا من العجائب والغرائب الاستهبال والاستحلال، تلاقي أي عامل توصيل أو كاشير في محل، بيتعامل مع الفكة المتبقية من الحساب على إنها سراب او هوا، يبقى حسابك 41 جنيه وميدله 100 يرجعلك 55، والأربعة جنيه المتبقية إتاوة مثلا. لو سألته عنهم يحسسك إنك بخيل وجلده ويبصلك بآرف وهو بيرجعهملك على الرغم من إنهم حقك فعلا.

4- شفت الحادثة

أعتقد أن الشعب المصري هو الشعب الوحيد اللي بيعطل الطريق لمشاهدة حادثة على الجانب الآخر منه، والغريب تلاقي مواطن سايق ومتعفرت وكلكسات بسبب توقف الطريق، وفجأة يختفي هذا الضيق لما يوصل قدام الحادثة اللي على الجانب الآخر، وتلاقيه هو كمان مهدي عشان يتفرج وممكن تلاقيه طلع موبيله وصور الحادثة.

5- سلم الأتوبيس

إقرأ أيضا

“تكررت من 1942م لـ 2013م وفشلت” لماذا المصالحة بين الدولة والإخوان مستحيلة؟

زمان كانت الناس ممكن تقف على سلم الأتوبيس من الإزدحام، لكن في ناس غريبة، حتى لو الأتوبيس فاضي وفي أماكن للجلوس، تلاقيه مصمم على الوقوف على السلم، كان ممكن أفهم الظاهرة دي لو بدات بعد فيلم تيتانك وتأثرالناس بمشهد دي كابريو على مقدمة السفينة، لكن الظاهرة موجودة من قبل، ولا يوحد تفسير علمي ليها، غير إن الناس دي عندها فيتش للسلالم مثلا.

أنا خلصت الخمس نقط ولقيت في نقط تاني كتير وأنا اتكلمت عن 5 حاجات بس.

إقرأ أيضاً

والله العظيم ..مصر لا تنحني