637 مشاهدة
حكايات خالتي بمبة| صباح أكتر فنانة مسابتهاش الإشاعات وفريد الأطرش وصف صوتها بـ “زي المعزة”
حكاية خالتكم بمبة النهاردة عن واحدة مكنش فيه حد بيحب الحياة قدها، ويمكن محدش انجرح من الحياة لحد أخر يوم في حياته زيها، ميلادها ووفاتها كانوا في شهر نوفمبر يمكن عشان يفضل اسمها مرتبط بالحب، تقدروا تقولوا عليها شبه ست الدنيا بيروت، الذوق والكلمة الحلوة والضحكة عنوانها، حدوتة النهاردة عن “الشحرورة” صباح.
صباح كانت من أكتر الفنانين اللي خرجت عليهم إشاعات وفاة على “المدعوق” بتاعكم اللي اسمه النت وبالذات الفيس بوك ده.
جانو بنت أختها قالتلي إن للأسف كان بيوصلها الكلام اللي بيتقال عليها، وكانت بتضايق وتسأل هما ليه مستعجلين على موتي، من كتر الإشاعات جانو مصدقتش أول ما بلغوها فعلا بخبر وفاة خالتها وافتكرتها هي كمان إشاعة من اللي بيطلعوا كل يوم لكن في 26 نوفمبر عام 2014 كان المرة دي خبر وفاتها صحيح.
حتى بعد وفاتها الإشاعات مسابتهاش في حالها يعني مرة يقولوا دي حطت في قبرها خمرة.
ومرة تانية يقولوا دي انتحرت، وكلها حاجات كدبتها جانو، وقالتلي إن خالتها مكنتش بتشرب لا خمرة.
أما حكاية الانتحار دي لا يمكن تكون حقيقية، وإن خالتها كانت أبعد حد ممكن ياخد قرار زي ده أو حتى يفكر فيه، لإنها كانت بتحب الحياة.
ومع كل المشاعر الوحشة اللي شافتها من ناس معندهاش ضمير كانوا مستنيين موتها ومتعرفش ليه، كان عندها صداقات كتير بكل اللي اشتغلت معاهم، فضلت ذكرياتها معاهم حاجة بتفرحها وبتحكيها دايما، وبينهم الفنان فريد الأطرش اللي اشتغلوا مع بعض أكتر من فيلم، زي “بلبل أفندي” و”لحن حبي” و”إزاي أنساك”، ولحن لها كتير من الأغاني الناجحة.
رشدي أباظة الدنجوان كان هيعتزل التمثيل!
بس العلاقة ما بينهم بدأت بذكرى سيئة، لما كانت في بدايتها وصف فريد صوتها بإنه زي المعزة ومينفعش تغني أصلًا.
أصل لما لما سمعها كان لسه صوتها الطفولي مفارقهاش، وكانت بتقدم في اختبارات الإذاعة وكان هو واحد من لجنة التحكيم.
صباح فضلت فاكرة الموقف ده، وعشان كده لما جت تشتغل معاه اشترطت إن اسمها يتكتب قبل منه، كنوع من رد الاعتبار لكرامتها، بس بعدها صداقة كبيرة فضلت بتجمع بينهم، وكانت دايما تقول عنه لجانو إنه كان كريم وبيحبها وبيحب فنه جدا.
ومن الفنانين اللي فضلوا فاكرينها لحد أخر يوم في حياتها وبيسألوا عليها دايما، كانت الفنانة نبيلة عبيد اللي كانت حريصة على الاطمئنان على صحة “الشحرورة” وتسأل عنها على طول، كمان الموسيقار حلمي بكر، المايسترو ميشيل المصري، المخرج أحمد يحيى، المخرج عمر زهران، الفنانة لبلبة، والفنانة يسرا والفنانة إلهام شاهين، وغيرهم كتير، عدد كبير من فنانين لبنان.
صباح اتولدت في لبنان، وكانت المنتجة آسيا داغر سبب سفرها لمصر، وقدمتها للسينما ولعدد من الملحنين اللي عملولها أغاني كتير عرفها الجمهور من خلالها.
كان أول فيلم ليها اسمه “القلب له واحد” عام 1945 مع الفنان أنور وجدي، والموسيقار رياض السنباطي أول واحد لحن لها، وبقت واحدة من أهم الممثلين والمطربين في الوقت اللي ظهرت فيه، وأخر فيلم قدمته كان في لبنان “أيام اللولو” عام 1986 مع كريم أبو شقرا.
من حكاوي خالتي بمبة عن حليم وعبدالعزيز محمود
الكاتب
ما هو انطباعك؟
