حكايات خالتي بمبة| عماد حمدي.. جاله اكتئاب بعد وفاة توأمه وفقد نظره أخر أيامه

قالوا عليه فتى شاشة أول، مكنش مشاغب ولا شقي خالص زي أنور وجدي ولا كمال الشناوي وشكري سرحان، معظم أدواره كان الشاب العاقل، الهادي، اللي بيقف جنب البطلة، حتى لو غلط معاها، فهو مش ممكن أبدا ينكر غلطته بس أحيانا الظروف هي اللي بتأجل الجواز، غنت له شادية “أحب الوشوشة”، “وديني مطرح ما توديني”، و”معلش النوبة دي”، طبعا عرفتم خالتكم بمبة هتتكلم عن مين النهاردة، عن الفنان عماد حمدي.

حياة عماد حمدي زي كتير من الفنانين البداية بطولة وأضواء وشهرة وستات حلوة، والنهاية أدوار متناسبش قيمته، وفلوس قليلة، واكتئاب ورغبة في الابتعاد عن كل الناس، عماد حمدي اللي كان بيعمل 12 و14 فيلم في السنة وهو سعيد وكله حماس ونشاط بقى يرفض إنه يشارك في الأعمال اللي بتتعرض عليه، لأنها أقل من اللي يستحقه أو لأنه مبقاش عايز يقف أدام كاميرا تاني، وقرر يقعد في أوضته خاصة بعد رحيل شقيقه التوأم عبدالرحمن واللي كان نسخة منه متفرقهومش عن بعض.

زي ما حكالي نادر ابنه الكبير من مراته الفنانة فتحية شريف، عماد اتأثر أوي بوفاة عبدالرحمن، ونظره راح يا حبة عيني، وده خلاه طبعا لا قادر يقرا ولا يشوف تليفزيون، ودول كانوا تسليته الوحيدة والحاجة اللي بيضيع فيها وقته، وجاله حالة اكتئاب بعد وفاة توأمه، زادت لما أم ابنه نادر ماتت قبله بسنة تقريبا، أيوة أصل العلاقة بينهم كانت رجعت لطيفة، وكانت بتخدمه، طبعا بعد طلاقه من مراته الأخيرة “نجمة الجماهير” نادية الجندي، اللي خلف منها ابنه التاني “هشام”.

وقالي إن أبوه قعد 3 سنين مخرجش من باب الشقة، بعد ما قدم أخر فيلم واللي اسمه “سواق الأتوبيس”، أصله وافق عليه بعد محايلة من ابنه عشان مخرجه عاطف الطيب كان صديق نادر في معهد السينما، كمان كان من بين الحاجات ضايقته إن نقابة الممثلين حددتله معاش شهري 60 جنيه، مطلوب يعيش بيهم ويتعالج، بعد 40 سنة شغل، وده مكنش عاجبه.

الحالة اللي وصلها عماد كانت سبب في إنه يمنع ابنه نادر من الشغل في عالم السينما، رغم إنه كان متخرج من معهد السينما زي ما قلنا قسم التصوير، وخلاه يشتغل مصور صحفي، خاف عليه يقاسي ويعاني زيه، ولأن نادر كان شايف وضع والده، وافق إنه يبعد عن الوسط ده، خاصة وإنه مبقاش معاه بعد كل السنين دي ولا مليم.

حكاية الخالة بمبة عن فتوش  “شادية” والتربية أيام زمان

من بين أكثر من 250 فيلم قدمهم عماد حمدي كان بيحب جدا دوره في فيلم “أم العروسة” أيوة اللي قدمه مع الفنانة تحية كاريوكا، واللي عملوا منه جزء تاني باسم “الحفيد” بس المرة دي بالفنان عبدالمنعم مدبولي والفنانة كريمة مختار، كمان كان بيحب أدوار كلها كانت في المرحلة الأخيرة من شغله، يمكن لأنها كانت بتقدم رسالة مهمة مش بس قصة حب بين البطل والبطلة، زي “سواق الأتوبيس”، و”ثرثرة فوق النيل”، “المذنبون”.

إقرأ أيضا

في مديح بيت الراحة !

عماد حمدي اتجوز اكتر من مرة؛ فتحية وشادية ونادية الجندي، وكانت علاقة شادية بمراته فتحية فيه مشاكل في البداية بس ده كله اتغير واتحولت لحاجة تانية خالص بعد فترة، وكانت دايما بتسأل على نادر، لأنه كان بيعتبرها أم تانية، لكن ده مكنش الوضع مع جوازة والده من نادية الجندي اللي لحد النهاردة في حواراتهم بيبان إن العلاقة بينهم مش على ما يُرام.

عماد حمدي أول بخت شادية.. قصص الحب في حياة الدلوعة

نادر لما سألته هيكون إيه رأيه لو اتعمل فيلم ولا مسلسل عن حياة أبوه، قالي إنه مش هيوافق وإنه بيشوف الحاجات دي بتتنفذ وحش أوي، وبيخلوا شكل الشخصية اللي بيتعمل عنها المسلسل مش حلو، وشايف إن الجمهور فاكره من خلال أفلامه الكتير اللي لسه بتتعرض.