رئيس مجلس الادارة: رشا الشامي
رئيس التحرير: أسامة الشاذلي

همتك معانا نعدل الكفة
431   مشاهدة  

رؤية نقدية للحلقتين 16 و 17 من مسلسل النـمـر ” تطورات إيجابية مع تأكيد على الكروتة

مسلسل النـمـر
  • شاعر عامية وقاص مصري مهتم بالشأن النوبي ونقد الخطاب الديني

    كاتب فضي له اكثر من 250+ مقال



الحلقة ستاشر من مسلسل النـمـر كلها تجميعات تليق ببوادر مرحلة جديدة.. إن كان على مستوى العلاقات بين الشخصيات أو على مستوى علاقتنا إحنا كمشاهدين بيهم.

اقرأ أيضًا 
متابعة موقع الميزان لـ حلقات مسلسل النمر

رباعي الشر اتفقوا على الشغل سوا إن كان في التصنيع أو في البيع (مشروع المول)، والشيمي تدخل وأقنع عنتر يطلق سراح سما.. وحسن مشي وراها وخطفوا جودي وهوب في الدربكة دي حسن هبد أبو سالي زُغد كومُه.. نزل ماحطش منطق، ورزع علي الحاوي واحدة خطافية جابته أرض.. بوكس تسبب في بوظان علاقة علي بأمه.

حسن خد خطوة جريئة مع نفسه وعرض الجواز الرسمي على فريدة.. وهي خدت يومين تفكر، بس الواضح إنها بتحضر له مغرز.. وهتكمل طريقها مع خالد الشيمي. كل ده تغيرات في علاقات الشخصيات ببعضها يتضاف جنب علاقة ملك بأبوها بعد ما عرفت موضوع أمها.. فنقدر نقول أن علاقات الشخصيات الرئيسية ببعض كلها خدت شكل جديد.

مسلسل النـمـر

كم المعلومات اللي عرفناها خلال المشهد ده يطور موقفنا إحنا من مختلف شخصيات الحدوتة، عرفنا إن خالد وملك أخوات من الأب بس، وأن الجزء الأكبر من راس مال الأسرة هي في الأساس وِرث ملك من أمها اللي لسه عايشة.. وفلوس ماهر رضوان (الأخ المقتول).

فبقينا عارفين أن الشيمي ده قاتل أخوه ودافن مراته بالحيا.. وغالبا المعلومات دي مش خفية عن باقي العصابة، بالعكس ده وارد يكون بينهم أشنع من كده، ده يجوز تكون ملك بنت ماهر.. زي ما علي مهواش ابن الحاوي.

حلقة تقريبا كلها موفقة إن كان على مستوى الفعل الدرامي أو التنفيذ، عابها تفصيلتين صغيرين:

  • علي جايب الحمبولي ورجالته وطالع يعمل نمرة في بيت خاله “عنتر الحلق”.. وأظن ده صعب على مستوى توازن القوة في المنطقة، أكيد التهجم على بيت عنتر مش حاجة بسيطة.
  • نوح وملك جايين في قلب حواري الصاغة ويتكلموا في إنها ينبغي لها أن تتماسك وتبدو طبيعية.. إلخ، اللي هو مش مكانه خالص.. ده كلام المفروض خلصان بالكتير أوي وهي بتركن.

مسلسل النـمـر

حلقة سبعتاشر من مسلسل النـمـر بدأت بتأكيد استنتاجي في الحلقة الحداشر (الكروتة حرام شرعًا)، والنمر بذات نفسه اعترف لملك إن هو صاحب الرسالة المحركة لكل الأحداث دي، وقرر يحكي لها على الحدوتة كلها.. في اللحظة دي أكتشفنا معاها إنه مش صعيدي وأن دي مش لهجته الطبيعية، واكتشفت لوحدها اللي يخلي شكلها بالمنظر ده.

مسلسل النـمـر

مفهوم أن اللي ملك عرفته يخليها تتجسس على الشيمي، بس مش مفهوم إنها تعمل ده بكثير من الغباوة.. فتاخد لقطتين يثبتوا عليها إنها بتفتش وراه، ولو كانت مستبيعة ماكنتش طلبت من نصر يفصل الكاميرات.

مسلسل النـمـر

غريب شوية موضوع أن المجموعة دي يبقوا مضروبين بالاحتفاظ بهدوم مرتبطة بجريمتهم التاريخية، دلوقتي الشيمي محتفظ بقميص محروق.. وفي الحلقة العاشرة الحاوي شايل حتة هدوم مع القسايم وشهدات الميلاد. كمان فيه حاجة مش حلوة في التنفيذ.. موضوع أني أجيب قميص ماتلبسشي ولا لسه راجع من عند المكوجي وأمرمطه في التراب شوية مستحيل توصل نفس حالة القميص المستعمل مفعلًا. ياريت نركز في التفصيلة دي عشان بتضايق جدًا.. زي القلل الجديدة ولمبة الجاز اللي أول مرة تنور.. إلخ.

مسلسل النـمـر

نرجع بسرعة للإيجابيات والتطوير المتسارع لعلاقة ملك بأسرتها في مسلسل النـمـر ، مشهدين ورا بعض كان طبيعي جدًا يكون تالتهم إنها تحسم ترددها وتتعاون مع النمر ضد أبوها وأخوها.. مشهد اختفاء أمها وإنكار المصحة لوجودها أصلا، والمشهد السحري… الفرح.

إقرأ أيضا
الحلقة الثانية من مسلسل الحشاشين

مسلسل النـمـر

كتب كتاب خالد/فريدة بمثابة صناع العمل عملوا منه مشهد/طوبة ضربوا بيه/ا كذا عصفورة مع بعض، ملك أعلنت خناقتها مع أبوها وخرجت من الصاغة على مخبأ النمر تنضم لفريقه.. وفريدة خدت سيلفي نزلت به على وش حسن الحلق، وإحنا شوفنا نظرة الحاوي.. اللي بتقول إنه عارف قصة إلهام أو ع الأقل كان متوقعها.

مسلسل النـمـر

التقطيع بين اجتماع رباعي الشر يتشرح لهم المشروع اللي داخلين عليه وبين النمر وفرقته وشرح العملية الجديدة اتعمل حلو.. وفكرته منطقية جدًا. العملية نفسها اتخطط لها كويس أوي وأتنفذت بشكل حلو (باستثناء الطلقة اللي اتضربت فوق الكونتينر).. تشويق وإثارة وأشتباكات وخطوات مدروسة، فعلًا ماتخورش المية. لكن المفاجأة الحقيقة كانت بعد ما العملية تمت بنجاح.. وعرفنا أهم داعم للنمر، وأنا لقيت تفسير لمشهد مؤامرة خالد/حامد ضد نوح.. اللي كنت بسأل عليه الحلقة اللي فاتت.

مسلسل النـمـر

الكاتب

  • مسلسل النـمـر رامي يحيى

    شاعر عامية وقاص مصري مهتم بالشأن النوبي ونقد الخطاب الديني

    كاتب فضي له اكثر من 250+ مقال






ما هو انطباعك؟
أحببته
0
أحزنني
0
أعجبني
0
أغضبني
0
هاهاها
0
واااو
0


Slide
Slide
Slide
Slide
Slide
Slide
‫إظهار التعليقات (2)

أكتب تعليقك

Your email address will not be published.







حقوق الملكية والتشغيل © 2022   كافه الحقوق محفوظة
موقع إلكتروني متخصص .. يلقي حجرا في مياه راكدة

error: © غير مسموح , حقوق النشر محفوظة لـ الميزان