رئيس مجلس الادارة: رشا الشامي
رئيس التحرير: أسامة الشاذلي

همتك معانا نعدل الكفة
769   مشاهدة  

رمضان 1997 وانت عامل ايه؟! أول سيت كوم في مصر

رمضان


رمضان 1997، السنوات الأخيرة لسيادة التلفزيون المصري الإعلامية، وقت ما كنا بنستى برامج زي بدون مونتاج وحوار صريح، طلع علينا فجأة من حيث لا ندري ولا نحتسب مسلسل كوميدي كان بيتذاع وقت الفطار، المسلسل مش نجح لا ده أكتسح، ده كان البريمو في كل مسلسلات السنة ده، البريمو لدرجة إن كل اللي شافوه لسه حافظين التيتر بتاعه لغاية اللحظة دي بس وانت عامل ايه ماكنش مسلسل على فكرة.

في مرة كنت بتكلم مع السيناريست عمرو سمير عاطف حول الفرق بين المسلسل والسيت كوم، وفي رأيي لا أحد أعلم بدهاليز السيت كوم من أبو تامر وشوقيه عمنا عمرو سمير عاطف فقالي إن الفرق أن المسلسل أحداثه وشخصياته بتطور دايما ويبدا من نقطة وبينتهي في نقطة مهما طالت المسافة بين النقطتين، في حين أن السيت كوم القاعدة الأساسية فيه إن مفيش تطور أصلا، يعني في أحداث بتتغير لكن الشخصيات ثابته ما بتتطورش دراميا ولا بتتحول ولا بتتغير ممكن تزيد او تنقص لكنها في الأصل ثابتة.

تعالوا بقى نقيس قواعد السيت كوم على وانت عامل ايه ، احنا بندور في لوكيشن واحد أو اتنين وهما البيت والحارة بكل ديكوراتهم الداخلية والخارجية، وكمان الشخصيات ثابته بيبيتو وجعيدي وكريم وأبو النجا وبسبوسة وصاحب القهوة والقهوجي، بيدخل عليهم شخصيات ثانوية تعمل دور له علاقة بالحدث و تخرج لكن دول أساس الدراما في السيت كوم، والشخصيات دي مش بتطور خالص شخصيات ثابتة زائد إن مدة الحلقة الدرامية وقتها كانت 45 دقيقة ومدة الحلقة في وانت عامل ايه حوالي 25 دقيقة، بالبلدي كدة ده سيت كوم فهمي رسمي نظمي ولا جدال في ان المسلسل ممكن نقول عليه اول سيت كوم في مصر.

الفكرة بتطلع من قعدات صحاب وبتلاقي موافقة من الجميع وبيتلم 5 نجوم صف تاني وقتها، كان أصلا اتنين منهم بيعملوا مسرحية وقتها سوا وهما هنيدي وعلاء ولي الدين الله يرحمه، واتضاف عليهم صلاح عبدالله وعلاء مرسي، واللي كتب المسلسل أصلا هو خالد جمال الدين، وأخرجه شريف مندور.

YouTube player

بيتقال إن في اتنين غير عم صلاح عبدالله وغير علاء مرسي اللى كانوا مترشحين للأدوار دي بس محصلش نصيب، رمضان بقى ، وثبتت على دول وطبعا معاهم هالة فاخر في دور بسبوسة وعم سعيد طرابيك الله يرحمه في دور صاحب القهوة وحسن عبدالفتاح في دور القهوجي، وخلاص دمتم على كدة، ونقدر نقول إن السيت كوم ده كان فاتحة خير على أتنين من ابطاله في حين إن الباقي إما تراجع أو فضل في مكانه أو غير مساره أصلا.

خالد جمال الدين ماكتبش غير فيلم واحد وهو اللبيس وبعدين اتجه للتمثيل في أدوار صغيره أخرها كان في مسلسل شطرنج، شريف مندور عافر وحاول وقدم نفسه كمخرج في حاجات يمكن من بينهم هو فيه ايه و غيرها من أفلام، ده غير شركة انتاج وكمان دعم تقني للمهرجانات السينمائية في مصر، هنيدي بقى سوبر ستار، وعلاء داق النجومية قبل ما يخطفه القدر مننا بعد سنوات قليلة من السيت كوم ده.

اقرأ ايضا

كيف ينقذ تركي آل الشيخ المتهم بمحاولة تخريب الكرة المصرية الفن المصري

إقرأ أيضا
تحت الوصاية

صلاح عبدالله اكتشفناه ممثل درامي تقيل زي ما هو كوميديان تقيل، وهالة فاخر فضلت في نفس الحته مع تطورات خفيفة، وكمان عمنا سعيد طرابيك برضوا فضل في نفس الحته، وفي نفس الوقت اللي أتراجع فيه حسن عبدالفتاح وبقى بيطلع بينضرب بس في الأفلام، وفي الوقت نفسه علاء مرسي اتحط في نفس المنطقة بتاعة محمد شرف الله يرحمه ادعوله في رمضان وسليمان عيد وعم يوسف عيد الله يرحمه الكاركتير اللي بيطلع مشهدين أو تلاته ويعلم، وبيني وبينكوا لو علاء معملش حاجة غير مكالمة البنك إياها لكفته والله.

أه قبل ما أمشي اللي لحن اغنية التيتر ووزعها هو طارق مدكور وعموما بقى انا طالب في القضية اعدام للواد وأبوه، نشوفكوا بكرة بقى.

الكاتب






ما هو انطباعك؟
أحببته
2
أحزنني
0
أعجبني
1
أغضبني
0
هاهاها
0
واااو
0


Slide
Slide
Slide
Slide
Slide
Slide
‫إظهار التعليقات (2)

أكتب تعليقك

Your email address will not be published.







حقوق الملكية والتشغيل © 2022   كافه الحقوق محفوظة
موقع إلكتروني متخصص .. يلقي حجرا في مياه راكدة

error: © غير مسموح , حقوق النشر محفوظة لـ الميزان