3٬846 مشاهدة
بيرة في شعبان
في ليلة من ذات ليالي شارع كلوت بك الساحرة، وفي طريقي للبيت قابلت “الشِّكة”، أحد شباب المنطقة الأبرار، مسا على فخادي.. مسيت على فخاده، هوووب شم ريحة أزازتين بيرة الـ”ستلا” اللي أنا شاربهم.
فمشكورًا تطوع ينبهني لحرمانية شرب “الخمرة” خصوصًا عشان شهر رمضان، أنا صحيح مهرب زمن وبعاني في معرفة “النهارده إيه” بس قطعًا إحنا مش في رمضان.. وإلا البار أصلا هيكون قافل مراعاة لمشاعر أبناء الوطن من الصايمين.
فوضحت له أننا مش في رمضان ولا حاجة، راح هابدني واحدة: بؤك اتنجس 40 يوم.
كتمت غيظي وسألته عن مصدر الكلام ده.. فبصلي بتعالي إيماني ونهى وقفتنا العفوية بجملة مقتطبة: تصبح على خير يا ميمي.. ربنا يهيدك.
أنتهى شعبان وجاء رمضان ذات نفسه.. فـ غُلقت البارات وسُلسِلت الزجاجات، وطبعًا فضلت المطاعم والقهاوي مفتوحة.. بس مش ده المهم، المهم أني في يوم من أيام رمضان وبالنهار قابلت نفس السيد الشِّكّة.. وكان طبعًا صايم.
ممكن ناس تفتكر أني قابلته في الجامع ولا بيبل بلح.. أبدًا، أنا قابلته في الشارع راكب “الفسبا” وبيشقط مُزة تبدو “ضرب”؛ فرشقت في المنطقة أتابع الأحداث. فكان ما يلي:
جاري العزيز خد المُزة وراه ع “الفسبا” وطلع بيها ع الشقة.. مَكِّنها وسَكّ عليها من بره بالمفتاح، وهو راجع ع المحل.. الموبايلات أشتغلت لباقى أعضاء الشِلة الأبرار، اللي كلهم زي حالاته.. صايمين.
ثم مكالمة طويلة مع السيد الديلر.. اللي أصر إنه مابيشتغلش بالنهار عشان الصايم، بس وعده إن أول ما يكسر صيامه هيجيب له الشغل.
مع آدان المغرب.. الشباب فطروا ع السخان واتلموا في شقة جاري العزيز، ضربوا المخدرات ورفعوا المنشطات.. وبدلوا ع المُزة.. وفي الأخر ماحدش فيهم حاسبها.
أنا بقى عرفت كل ده منين؟؟
الشباب الطاهر نزلوا بالليل ع القهوة يلعبوا كوتشينة ع المشاريب، وقعدوا يتباهوا بالغزوة المعتبرة، بس الشهادة لله.. أو ما الجامع شغل قرآن الفجر لموا الليلة وكل واحد جري على بيته يلحق السحور.. عشان يعرف يصوم بكرة.
قضوا سهرة “فول أوبشن” وسابوني أنا غرقان في بحر أسئلة مالهوش شط.. ليه محلات بيع وشرب الخمور لازم تتقفل في رمضان في حين محلات الأكل والشرب شغالة عادي؟؟
ليه الخمور المُرَخَّصَة قانونًا تنجس البوء في حين المخدرات المُجَرَّمَة قانونًا يتم تداولها عادي بدون ما تشكل أي خطر على بوء أي صايم كان بيبيعها أو يتعاطاها؟!
هل فعلا شرب ازازة بيرة في شعبان يفسد الصيام في رمضان.. في حين الزنا التشاركي وأكل حق الناس خلال ليل رمضان مالوش أي تأثير على الصيام في نهاره؟!
معقولة الشِكَّة وخلال نهار رمضان يعلق مومس ويرتب لسهرة ماجنة.. ثم يشرب مخدرات ويزني ويعزم أصدقائه يشاركوه جزاء الجروب.. ويلعبوا قمار ويتباهوا بالمعصية ويفضحوا ما ستره الله، كل ده وفي الأخر يتقبل منهم صيامهم عادي وأنا اللي ابقى نجس 40 يوم عشان شربت بيرة فـ شعبان.
الكاتب
ما هو انطباعك؟
بص انا شايف ان الانسان كل ما يتحكم في شهواته كل ما يكون افضل وأحكام الدين في كل الاديان بتقول كدا علينا التحكم في الشهوة اي كانت .. ومش معني التصرف الي حصل ده من شاب مسلم او اي كان اعتقاده فده يسئ لدينه او لأى دين اخر كل إنسان حر . وعليك انت تميز وتحكم عقلك كلنا خطائين وبنغلط بس احنا لازم نفهم ان العمر رحلة قصيرة اووي والعمر ده مش كله متعه .
انا ملاحظ اوووي في كل مقالاتك رابط موضوع الدين بتصرفات أصحابه او الي بينتسب له وده غلط