169 مشاهدة
طالما لسه منجحتش بتكتب ليه؟ غلاسة
كان عندي أحلام كبيرة فى الكتابة، كنت فاكر أن الطريق هيكون أسهل، والحمد لله أعتقد أنني حققت جزء منها، بس الحياة والسوق طلع صعب جدا، الموضوع مش سهل خالص، بدون الدخول فى تفاصيل كتير، دايما بقول لنفسي أن كبار الكتاب حققوا أنفسهم بعد الأربعين .
نجحت وفشلت، حاجات وصلت وحاجات محدش يعرف عنها حاجة، حاجات عملت مبيعات عالية ونجاح جماهيري وحاجات مفيش سمع عنها، يلا مش مهم، كلها تجربة، النجاح السريع بيولد الغرور، النجاح البطئ بيصنع الشخصية .
المهم بقا أنا بقيت مؤمن أن نهاية الكتاب الورقي مسألة وقت، الكتاب الورقي بينتهي بسبب حاجات كتير منها طغيان الانترنت فى حياتنا وسهولة الحصول على المادة، عشان كدا مش قادر أخوض تجربة أي شغل ورقي تاني.
اقرأ أيضًا
الكتابة كأداة للإقلاع عن التدخين
المهم، النجاح بنسبة كبيرة اجتهاد ورزق من ربنا و يمكن اكون مش مجتهد كفاية، أيوة مش هقعد أبرر لا .. أنا فاشل عادي يعني
السؤال هنا؟ أنا بكتب ليه
بكتب غلاسة يمكن فى يوم أنجح وأكون كاتب مهم، مين عارف، مش جيكي رولينغ اللى كتبت هاري بوتر كانت فاشلة برضة ومرة واحدة عملت مبيعات تاريخية، عادي يعني، مفروض أنك قبل ما تدخل عالم الكتاب تسأل نفسك إنت عايز تكتب ليه؟ بتكون الاجابات محصورة بين التالي : الشهرة والفلوس والتعبير عن الذات بس حبيت أضيف إجابة رابعة غلاسة
الحقيقة أنا مش مهتم أوي بالنجاح .. لأن للنجاح صور مختلفة .. النجاح مش صورة واحدة ولا حاجة واحدة .. لو قلنا إن النجاح مرتبط بالسعادة، يعني المفروض هدف النجاح أنك تبقي سعيد وراضي
وهنا هحكي لك قصة الصياد بيأكل اللى بيصطاده ومتزوج وعنده أولاده، جه له موظف من البنك قال له لازم تاخد قرض عشان تكبر شغلك .. عشان تشغل ناس عشان لما تعجز يبقي معاك تعيش مع أسرتك و تسريح .. الصياد قال له طيب ما أنا بعمل كدا دلوقتي.
عمر الشريف في آخر أيامه سأل سؤال مهم ؟ قال السعادة مش إني أبقى معروف في كل حتة، قال أنا استفدت أيام أن الناس تعرفني في الصين ولا اليابان، وقال إن السعادة أني اقعد مع أسرتي وأحفادي على رأس سفرة وقال ياريتني كنت اكتفيت بالنجاح فى مصر، أو نجاح قصير فى هوليود، وندم على رحلة النجومية العالمية والشهرة.
في النهاية أنا بحب الكتابة وشايف إنى فى يوم من الايام ممكن أعمل أفلام ومسلسلات حلوة مين عارف .. يا راجل نجيب محفوظ نشر أول رواية له بعد الأربعين.
الكاتب
ما هو انطباعك؟
