عربيات الكبدة في مصر .. أسماء تسد النفس وأسعار تفتحها تاني؟

في جزء كدا من معدة المصريين مخصص لأكل العربيات، سواء كانت العربيات دي بقى كبدا أوسجق أو فول، لكن عربيات الكبدة تحديدًا لها مكانة كبيرة عند المصريين ممكن تلاقي في شارع واحد أكتر من 3 عربيات وكلهم عليهم زحمة، ومابتفرقش مع أي حد من أكيلة الكبدة إنها يتقال عليها كبدة فاسدة أو منتيهة الصلاحية:

خلال الكام يوم اللي فاتوا دول قررت أعيد أمجاد الشباب تاني وكلت عند معظم عربيات الكبدة في مصر، واخترت لكم 8 عربيات كبدة نتكلم عن ساندوتشاتها وأسمائها اللي تسد النفس وأسعارها اللي تفتحها وتخليك تفكر فيها حفاظًا على جيبك:

إمبابة يا بلد وشارع طلعت حرب

أشهر عربية كبدة في إمبابة هي عربية برنس الغلابة زي ما بيقول الناس هناك عليها، وسبب تسمية العربية بالاسم ده إنه بيتقال عليها إنها كانت عربية البرنس قبل ما ربنا يفتحها عليه، ويفتح محل البرنس، وبالمناسبة هي واقفة على الرصيف اللي قدام البرنس، بس فرق السعر بينهم كبير جدًا.

الساندوتش معظمه فلفل أخضر حراق جدًا، وطعم الكبدة مش أحسن حاجة يعني بس شغال، أحيانًا بتكون الكبدة بايتة فبتفرول منه، ساندوتش الفينو ما يشبعش لوحده، لازم على الأقل تاكل 3 ساندوتشات.

الربيعي

على بعد كام متر من عربية برنس إمبابة بطلعت حرب، هتلاقي الربيعي ودي عربية كبدة من أقدم العربيات في إمبابة، وبصراحة أحلى حاجة في الساندوتش عنده الطحينة، مش هتقف مرة على العربية غير لما تسمع الزباين بتقول له “وزود الطحينة يا صاحبي”، الكبدة بتاعته أفضل من كبدة برنس الغلابة بس برضه نقول عليها متوسطة، ورغفين ممكن يشبعوك، أسوأ حاجة عنده برضه لما يعمل لك كبدا بايتة من إمبارح نحسها اتحروقت من التسخين.

الربيعي كان مجرد عربية في محل وربنا فتحها عليه وبقى بيعمل كريب وشاورما وبرجر كمان، نصيحة من معلم خبرة في الكبدة جرب الربيعي ومش هتندم واضرب خيار مخلل مع الساندوتش.

الكحلاوي علامة هدى شعراوي

في شارع جانبي من طلعت حرب “هدى شعراوي” هتلاقي زحمة كدا، اعرف على طول إن ده الكحلاوي، بصراحة ماعجبنيش كبدة الكحلاوي أوي، ساندوتش عادي مافيهوش أي افتكاسات، بس أمانة الراجل نزيه ومكلف نفسه وعامل كيس بلاسيتك عليه اللوجو بتاعه واسمه وهو راجل نضيف في عربيته وهتشوف أجانب بياكلوا عنده عادي.

على بركة الله

أشهر محل كبدة في وسط البلد في في شارع رمسيس تحديدًا، عنده بلدي أو فينو، ساندوتش معقول 4 منه هيشبعوك، لأن الناس اللي واقفين بخلة أوي بينقطوا الساندوتش كبدة.

تلوث الزيتون

تلوث ده اسم أطلقه أهل الزيتون على العربية اللي قبل محطة مترو حدائق الزيتون عند سوبر ماركت الفرجاني كدا، الناس سمته كدا عشان سعر الرغيف رخيص أوي مش بيغلى، العربية كبرت ونقل من على الرصيف لجوا محل في نفس المكان، وسمى نفسه الإخلاص وبصراحة هو مخلص جدًا مع زباينه كل عربيات الكبدة غلت الساندوتش إلا هو ثابت على موقفه، تلوث بيحط بهارات بتدي طعم حلو أوي، لكن للأسف لازم بعدها مباشرة تدخل الحمام وتحس بألم بسيط كدا، هو تقريبًا أقل سعر سانوتش كبدة في مصر .

خلي أنتينالك معاك، واشرب ليمون ونعناع بالكمون عشان تطهر معدتك وتعالج الاضطرابات اللي هتتعرض ليها.

عز المنوفي

فعلا الغالي تمنه فيه يا جدعان أحلى ساندوتش كبدة وأحلى طحينة وساندوتش كبير ويشبع ونضيف، والكبدة ليها طعم حلو أوي، أنا كنت مبسوط وأنا باكل من عنده، وهكررها تاني، عيبه الوحيد إن المخلل والقوطة المخللة والسلطة بفلوس.

إقرأ أيضا

حوار مع صديقي الـAI

عبادة  (هوهو) شارع البحوث الدقي

بص هو أعلى من المتوسط والفينو بتاعه حلو جدًا، بس بصراحة ما يستحقش سعره الساندوتش فاضي والكبدة ما كنتش طازة، عز المنوفي أحسن منه وأرخص، وكمان القوطة المخللة بفلوس غير تمن الساندوتش، عدد من الآكيلة اللي بيروحوا هناك مسمينه “هو هو”.

المتوكل على الله في الدقي

أسوأ محل كبدة أكلت عنده بصراحة السندوتش وحش جدًا حاجة كدا شبه الكبدة ومالهاش طعم،  في أحد الشوارع الجانبية في شارع البحوث الدقي.

أكيد دي مش كل عربيات الكبدة اللي في القاهرة والجيزة، لكن كفاية أوي 8 عربيات عليا في أسبوع.

اقرأ أيضًا: كبدة العربيات بتيجي منين؟ .. رحلة “ساندوتش مستورد” يهدد حياتك