كيف تصبح مطربا عالميا في خمس خطوات؟

منذ فوز الهضبة عمرو دياب بجائزة “وورلد ميوزيك اورود عام” 1996 عن ألبوم “نور العين” وهوس العالمية أصبح يطارد غالبية المطربين حتى لو بجوائز مشبوهة أو تكريمات غير معترف بيها وساهم فيه بنسبة كبيرة انتشار وسائل التواصل الاجتماعي التي تستطيع أن تجعلك نجمًا عالميًا مشهورًا في لحظات حتى لو بخبر مفبرك مثل حصولك على جائزة عالمية أو حتى بخبر عادي مثل “إنك رايح تغنى لجالية عربية في أي دولة أوروبية”.

العجيب إن تسجيل الألبومات الموسيقية خارج البلاد يُعتبر الآن من ضمن الوجاهة والتفاخر بالعالمية، وأصبح الهوس لا بنجوميتك داخل بلدك بقدر ما أصبح هوسًا بإقناع الناس أنك نجم بالخارج أيضًا، “للأسف الفخ ده بيقع فيه المعجبين والمهوسين المضحوك عليهم”.

الحقيقة المرة إن رصيدنا من الجوائز العالمية في فئة الموسيقى لايتعدى جائزة واحدة حصل عليها الموسيقار فتحي سلامة عن ألبوم للمطرب السنغالي يوسى ندور، وهي جائزة جرامي رفيعة الصيت التي تعادل الأوسكار في السينما.

في هذا الزمن لايحتاج المطرب سوى خمس خُطوات؛ كي يخدع جمهوره بأنه أصبح نجمًا عالميًا والمسألة بسيطة فالجمهور لايبحث عن الحقيقة، بقدر مايبحث عن الانتصار على جمهور نجم آخر حتى لو كان انتصارًا مزيفًا.

تعالوا نشوف إزاي مطرب يقدر يبقى نجم عالمي في خمس خطوات:

الخطوة الأولى ( الاستايلست )

عمرك ماهتبقى نجم عشان صوتك حلو. تبقى نجم عشان شكلك حلو وروش وسكسي، لو شعرك طويل قصره ولو قصير طوله واعمل جلسة تصوير مع أشهر المصورين، واستعين بستايلست شاطر يعمل لك لوك جديد وصادم وماتنساش التاتو أهم حاجة. كدا بقى معانا بوستر الألبوم اللى الناس هتتكلم عنه أكتر من الألبوم نفسه.

الخطوة التانية ( المزيج العميق )

جمهورك مش هيقعد يحلل في مزيكتك إن كانت حلوة ولا وحشة، المهم إنك تكون عامل مزيج يبان إنه عميق بكواليتي كويس، شوية جمل شرقية على شوية أرتام غربية ترانسات وتكنو وهاوس، واطلع قول في حوار مقتضب إن الألبوم مكسر الدنيا وإنك بذلت مجهود في إنك تضفر الحلو من هنا على الحلو من هناك وعملت مزيج موسيقي تقدمي يرضي جميع الأذواق وماتنساش إنك تخص جمهورك بإهدائه أغنية شرقي خالصة مخلصة لزوم إنك برضه بتفضل مزيكة بلدك وإنك بتحافظ على أصالة الموسيقى.

الخطوة التالتة ( دويتو وفيديو كليب )

سرب أخبار إن في دويتو هيجمعك مع مطرب عالمي -حتى لو مش هتعمله- وجاري الاتفاق بين شركات الإنتاج وإنه هيكون مفاجأة فنية مدوية ولو حصل إنك اتدبست خلاص في موضوع الدويتو ممكن تدورلك على أي نجم انطفى بريقه أو أي مطرب محدش سمع عنه حاجة ان شالله في بلده ياخد له قرشين وتعمل الدويتو وتصوره مع مخرج أجبني وحط الميكنج في أخر الكليب وأنت بتهزر مع المطرب الأجنبي وبتحاول تخليه يتكلم عربي، خلي الناس تعرف إنكم أنتيم وماتنساش في أخر الدويتو تنزل أسامي فريق العمل بفونت صغير وبالإنجليزي مع وضع اسم المخرج بفونت كبير عشان يبان إنه مخرج مهم.

الخطوة الرابعة ( السوشيال ميديا والغموض )

إقرأ أيضا

عندما يأمرك الطبيب بالدواء فلا تعارض ..في علاج الاكتئاب

من غير السوشيال ميديا الخطوات اللي فاتت مالهاش أي قيمة، لازم صفحتك على فيس بوك وقناتك على اليوتيوب تتوثق بأى شكل من الأشكال، ومفيش مانع من شراء متابعين ولايكات وشيرات ممكن تسرب إشاعة عنك وتطلع تنفيها على صفحتك الرسمية اللي هتبقى هي المتحدث الرسمي بتاعك، قلل من ظهورك على الميديا لازم تعزز نفسك على الجمهور مش هتبقى مرطرط وكل يوم بتظهر لازم توصل لمرحلة الغموض وتخلي الجمهور يعتقد إنك راجل جد بتركز في شغلك وبتفضله على الظهور عمال على بطال.

الخطوة الخامسة ( الجوائز العالمية )

نزل خبر إنك رايح تتكرم من مهرجان فني كبير أو هتغني في حفلة مع نخبة من ألمع نجوم العالم. مع التأكيد إن أغنيتك الفلانية دخلت أفضل أغنيات السنة على مستوى العالم -بحسب موقع فلان العالمي ومجلة علانة العالمية- وأكد إنك حصلت على جايزة أفضل نجم وأحسن ألبوم وأكتر مبيعات، وكتر من أفعل التفضيل على قد ماتقدر ومفيش مانع إنك تروح تشتري جايزة من أي مكان في أمريكا أو أوروبا وتتصور وتعمل لك فرشة محترمة في كل المواقع الإخبارية، وسيب الناس تهري في كون جوايزك دي حقيقية ولا لاء، عندك متابعينك اللي عارفين قيمتك كويس وهيدخلوا يفشلوا أي محاولة هدم لنجاحك ومبروك يا معلم بقيت نجم عالمي.