ليه سعاد حسني أهم ممثلة عربية؟

تعالوا أقولكم ليه سعاد حسني أهم ممثلة ممكن جت في تاريخنا العربي المعاصر ..

تعالوا نفكر إيه الدور اللي متعرفش تعمله سعاد ؟؟ مفيش

سعاد تعرف تعمل كل حاجة .. سعاد ممكن تعمل الهانم وتعمل الفلاحة

سعاد تعرف تعمل المؤدبة واللي مش مؤدبة

سعاد تعرف تعمل المتعلمة والجاهلة

سعاد شكلها يجيب أي شكل و أي نوع تمثيل ..

السينما حبت سعاد حسني والناس حبت سعاد حسني عشان كده سعاد حسني أهم ممثلة عربية.

سعاد عملت نصوص سينمائية ضعيفة جدًا بس بسبب أداء سعاد بقت أفلام حلوة و ممتعة

سعاد تعرف تعمل من الفسيخ شربات

قبول وحضور غير عادي

نظرة عين بتغير مع كل دور

سعاد حسني اتخلقت عشان التمثيل

مع حبي لفاتن حمامة …وذكاء فاتن حمامة

موهبة سعاد تكسب

فاتن ذكية وبتعرف هي بتعمل ايه ؟

إنما سعاد فطرية .. بتشتغل بالفطرة .. بتنجح بالفطرة

مفيش ممثلة جت في تاريخنا السينمائي تقدر تقدم تنوع سعاد حسني

سعاد تمثل مع أي حد تحس أن بينهم كيما غريبة

يعني تمثل مع أحمد زكي تحس أنها بتحبه فعلاً ،تمثل مع عادل إمام تحس إنها بتحبه فعلاً

تمثل مع أحمد مظهر تحس أنها بتحبه فعلاً، سعاد مثلت مع رشدي أباظة وشكري سرحان وفريد شوقي وحسن يوسف و أحمد رمزي وكتير جدًا وكل مرة تصدقها فعلاً

قدمت سعاد حسني فى الستينيات ٥٦ فيلمًا، وفى السبعينيات ١٥ فيلمًا، وقدمت بعد ذلك 11 فيلم ومسلسل وكانت بتحلم تقدم مسرحية

يعني لو هنتكلم عن أفلام حلوة لسعاد حسني ممكن تشوفها و تنبسط

• فيلم المشبوه

أنا بحب فيلم المشبوه مع عادل إمام
قدمت دور الزوجة والحبيبة بصورة جميلة أوي ..الحقيقة الفيلم كان بداية تحول عادل إمام من الأدوار الخفيفة إلى الأدوار الجادة

•  فيلم الدرجة الثالثة

فيلم مش مشهور تأليف زوجها ماهر عواد وإخراج شريف عرفة وبطولة أحمد زكي .. فيلم حلو وكوميدي و مش بيتعرض ًساسًا

إقرأ أيضا

ظاهرة هياتم .. “قبضاي” الوسط الفني الذي حيّر الصحافة

•  الاختيار

فيلم من تأليف نجيب محفوظ وإخراج يوسف شاهين .. وبطولة عزت العلايلي ومحمود المليجي و هدي سلطان .. الفيلم يدور في إطار نفسي بوليسي حلو اوي

•   الزوجة الثانية

طبعا لازم الزوجة التانية، واحد من أحلى أفلام سعاد حسني وأحلى أدوار صلاح منصور وعملت دور الفلاحة باقتدار شديد .. الفيلم أيقونة فى السينما المصرية

•  السفيرة عزيزة

فيلم بسيط .. بس شهد تحولات كتير فى الشخصية وإزاي قدرت سعاد تدير الصراع بين زوجها و أخوها .. الفيلم من بطولة شكري سرحان و عدلي كاسب و عبد المنعم ابراهيم

• غريب في بيتي

من أحلى الأفلام الكوميدية التي قدمها نور الشريف .. مع أنه فيلم بس أيقونة سينمائية ومن تأليف وحيد حامد

• فارس بني حمدان

فيلم مش مشهور يحكي عن الشاعر العربي الشهير أبو فراس الحمداني و الفيلم من بطولة فريد شوقي، و يعتبر من الأفلام القليلة العربية اللى قدمتها سعاد حسني

•  المتوحشة

الفيلم من بطولة محمود عبد العزيز عن فكرة سيدتي الجميلة .. اللى قدمت أكثر من مرة .. بس سعاد عملتها حلو جدا و الفيلم برضه منجحيش

•  غصن الزيتون

بحب الرواية دي جدا، أحمد مظهر قدم الدور بصورة رائعة جدا .. الفيلم يعتبر من أحلى أفلام أحمد مظهر وسعاد حسني

•  غروب وشروق

واحد من أحلى أفلام رأفت الميهي البسيطة و السهلة اللى الناس بتقدر تفهمها و بتفاعل معها ، الفيلم من بطولة رشدي اباظة و صلاح ذو الفقار و محمود المليجي ، الفيلم شهد مباراة تمثيلة رائعة بين كل اللى شارك في الفيلم

اقرأ أيضًا
طفولة سعاد حسني المأساوية “ظلت تكره لعب الأطفال حتى موتها”

بعيدا عن اختياراتي الشخصية؛ تم إختيار 9 أفلام لسعاد حسنى فى قائمة أفضل 100 فيلم بذاكرة السينما المصرية حسب استفتاء النقاد عام ١٩٩٦ وهى : القاهرة 30  ، الزوجة الثانية  ، وغروب وشروق   ، زوجتى والكلب ، الإختيار، خلى بالك من زوزو ، الكرنك  على من نطلق الرصاص ، أهل القمة .