ماري باي باي .. طب باي باي ليه بقى ؟

بيقولك ايه بقى..  مفيش صدمة كانت توازي صدمة الدكتور خشبة وهو بيطبق درس منير في اصطياد النساء عن طريق الجزم، لما نزل على ركبه وقال “مدام بوز جزمتك يدل على انوثة طاغية” فنكتشف أنه بيعاكس واحدة من أشهر الوشوش اللي عدت على السينما المصرية، الست اللى اشتهرت بملامحها غير الجميلة وطلعت في كمية أفلام لا حصر لها رغم أن المواقع بتقول غنها اشتغلت في 47 عمل فني بس لكن في الحقيقة ماري ليها أفلام كتير بس كالعادة كانت بتطلع وما تتشافش.

اسمها الحقيقي بهيجة محمد علي اتولد في 29 يوليو سنة 1917، اشتغلت ماري في بداية حياتها سجانه في سجن النساء في القناطر، وهناك أتعرفت على سجان زميلها واتجوزوا، لكن مكملوش مع بعض كتير سابت جوزها و سابت السجن وراحت تشتغل رقاصة في الأفراح.

ماري بعد فترة اشتغلت في فرقة بديعة مصابني، ايوة فرقة بديعة مصابني الأول مش فرقة رمسيس زي ما المواقع بتقول، راحت تشتغل ايه بقى في فرقة بديعة مصابني راحت تشتغل رقاصة ضمن المجاميع اللي بترقص هناك في ورا بديعة مصابني او ورا تحية كاريوكا او ورا سامية جمال، رقاصة في الاستعرضات يعني.

بس شغلها كرقاصة ده الشغل اللى كانت بتعمله في حفلة الماتينية، في حفلة السواريه كانت ماري -زي ما سمت نفسها وقتها-ليها شغلانة تانية، كانت بتقعد مع الزباين، وخصوصا عساكر الاحتلال البريطاني، تلاطف الزبون وتناغشه وتلاعبه، لحد ما هوب يفتحلها قزازة، وبعدين تقوله ما اعطلكشوتسيبه وتمشي، يجي يسأل عليها wheres mary?، يردوا عليه ويقولوله mary bye bye، ومن هنا جه اسمها ماري باي باي.

بتاخدها رجليها في مرة لمكان كان يوسف وهبي بيصور فيه مشاهد من الفيلم اللي بيقوم ببطولته وبيخرجه المخرج الشاب اللي لسه جاي من بلاد برة وعمل فيلمين بس وهو يوسف شاهين وده كان فيلم المهرج الكبير سنة 1952، بتقول ليوسف وهبي انها كانت بتشتغل رقاصة في فرقة بديعة وظهرت في السيما كذا مرة وأنها عايزة تشتغل معاه، وفعلا بيضمها يوسف وهبي لفرقة رمسيس، ودي كانت واحدة من فرق المسرح اللي بدات مع عصر نهضة المسرح المصري وكملت رغم كل الظروف.

من هنا يمكن الدنيا بتتعدل شوية مع ماري باي باي، فتشتغل في مسرحيات الفرقة وتفضل فيها لحد ما تروح فرقة تانية وبعدين تعدي شوية على مسرح فؤاد المهندس وبعدين تسيبه وتروح فرقة الثلاثي وتلف لفتها على فرق وستوديوهات مصر، لكن في كل اللفة دي ماتخدش دور واحد يوحد ربنا اكبر من كونها كومبارس ويوم ما ربنا يكرمها تبقى “سيناية” بلغة أهل الكار، يعني ممثلة تطلع مشهد مش أكتر ممكن تقول جملة ولا بتاع علشان تعمل إفيه وخلاص علي كدة شكرا، أخر فيلم ظهرت فيه ماري باي باي كان فيلم اسمه غيبوبة وده اتعرض سنة 1998، وقبلها كانت ظهرت في فيلم الراية الحمرا سنة 1994، وماري أصلا اتوفت في 5 أكتوبر سنة 1997، وهي عندها مثلا 80 سنة.

عموما.. تعالي هنا يا معدوم الضمير يا معدوم النساء.. إلخ