ما تحسبوش يا بنات.. حكاية الاغنية من الفلكلور لممدوح قاسم.. وبالمرة تصحيح تاريخ الكينج الغنائي

بيقولك إيه بقى.. ” ماتحسبوش يا بنات إن الجواز راحة، ولا تزعلوش يا بنات لو قولنا بصراحة إن الجواز عمره عمره ما كان راحة”، في أواخر عام 1977 قام هاني شنودة وفرقة اسمها المصريين بقنبلة موسيقة من العيار التقيل أوي، قنبلة اسمها ” بحبك لا” الألبوم ده كان في 12 أغنية منهم أغنية ما تحسبوش يا بنات، لكن قبل ما نحكي حكاية ما تحسبوش يا بنات وإزاى اتنقلت من إيقاعها الفلكلوري الشعبي اللي كان بيتغنى في الأرياف، للإيقاع اللي واللحن اللى عمله شنودة، وإزاى الكلام إتغير ومين غيره، تعالوا نحكي الأول إزاى المصريين اتكونت أصلا.

في الأساس هاني شنودة عمل الفرقة دي حتة حتة، ولم شملهم واحد ورا التاني، الفرقة كانت في البداية حوالي 5 أفراد وهم ” هاني شنودة، وإيمان يونس، وتحسين يلمظ، وهاني الأزهري” وانضم عليهم مطرب يدعى “محمد الهندي” ولكنهم غيروا اسمه إلى “عمر جوهر” وبعدين غير اسمه ليصبح “عمر فتحي” بس ده حصل بعد ما ساب الفرقة.

الفرقة في البداية ماكنش ليها اسم، وماكنتش بتقدم أغاني عربي خالص لانهم معترضين على حاجات في الأغاني العربي اللي في السوق وقتها، وكانت بتعيد تقديم أغاني أجنبي مشهوره، والفرقة اتشهرت جدا وكانت بتلف بلاد كتير عربية وأجنبية، لحد ما في يوم جه نجيب محفوظ وقالهم إنتوا ليه مالكوش اسم وليه مش بتغنوا عربي، فردوا في نفس واحد عربي لاء، قالهم جربوا تقدموا نفس الموسيقى دي بس عربي، وجربوا يكون لكم اسم.

في الوقت اللي نجيب محفوظ قالهم كدة كان هاني شنودة جاله اتنين شعرا كبار وهما “شوقي حجاب وعبدالرحيم منصور” وقالوا تعالي عايزينك تعمل ألبوم لمطرب جديد اسمه “محمد منير” وفعلا مسك هاني شنودة الكلام وإبتدي يعمل أول ألبوم لمنير وكان اسمه ” أمانة يا بحر”.

الألبوم ده فشل فشل ذريع بقى، لسببين الأول إن منير كان مطرب شبه مجهول شبه معروف، مفيش أي علامة في حياته نهائي، والسبب التاني هو إن المنتج قرر إنه ما ينزلش الألبوم زي ما كان السوق متعود على اسطونات، وطبع الألبوم على شرايط كاسيت، وده ماكنش منتشر ساعتها خالص.

بس المنتج أعجب ساعتها بهاني شنودة وفرقته، وقرر إن ينتجلهم ألبوم وفي 8 ديسمبر سنة 1977، اتسجلت فرقة المصريين، علشان تكون أول فرقة موسيقية في مصر – زي ما قال هاني شنودة-وعلشان هاني شنودة يخلد التاريخ ده اتعملت اغنية اسمها 8 ديسمبر واتلحنت واتسجلت في أول ألبوم للفرقة اللى هو بحبك لا.

نيجي بقى لحدوتة ماتحسبوش يا بنات، الاغنية أصلا من الفلكلور الشعبي المصري، هاني بيحكي أنه كان بيشوف الستات يوم ما بينقلوا جهاز العروسة، بينقوله على عربية كارو والستات واحدة فيهم تمسك طشت وتعمله طبلة، وتبدأ تغني ماتحسبوش يا بنات” وتبتدي تحكي حكاية الجواز من اول سبوع لحد أخر سبوع واخر سبوع بيخلص بإن البنت بتروح المحكمة وتتسوح فيها علشان تطلق.

هاني خد الكلام وراح لأحد اهم رعاة الفرقة وهو صلاح جاهين، وقاله يا عم صلاح عايزين نغير الكلام ده ونعمل كلام جديد وانا ها اعمل لحن جديد، هوب صلاح جاهين ما كدبش خبر، وراح عامل كلام جديد وهاني لحن وداخلين نسجل بقى، وقتها هاني شنودة جاب ممدوح قاسم وهايغني جملتين صولو، المنتج اتهبل، قاله يا عم إيه اللى انت جايبه ده، ده أخره يبيع كرشة ولا فشة مينفعش يغني، لكن هانش شنودة تربس دماغه وقالك ها يغني وفعلا اتسجلت الاغنية وممدوح قاسم الله يرحمه بيقول الصولو بتاعه ” ماتحسبوش يا بنات إن الجواز راحة” وبعد ما تسجلت الأغنية المنتج اتهبل تاني، وقال لهاني أحلى حاجة في الاغنية هو ممدوح قاسم والتضاد اللي بين صوته وصوت إيمان يونس، وطلعت الغنوة وكسرت الدنيا.

إقرأ أيضا

الواشنطن بوست تصارع الجمهوريين لصالح كاميلا هاريس فلماذا مصر في مرمى الشباك؟

وبعدها نفس المنتج جاب هاني شنودة وعملوا ألبوم ” بنتولد” لمحمد منير، والألبوم نجح وكسر الدنيا، وده اللى شجع المنتج إنه يجيب ألبوم منير الأول اللي هو “أمانة يا بحر” ويغير اسمه وينزله السوق تاني خلى اسمه ايه بقى، صح برافوا، خلى اسمه علموني عينيكي، وبكده يبقى أول ألبوم في تاريخ منير هو ألبوم ” أمانة يا بحر أو علموني عينيكي” وتاني ألبوم هو ” بنتولد”، يلا أدينا حكينا الحدوتة وصلحنا تاريخ منير لعشاقه، واهو كله فدا الفن وأحبابه.

عموما.. ومهما نتعب نقول تعب الحبيب راحة.. إلخ