مسلسل اللعبة الجزء الثاني .. تحدي الموسوعة (الحلقات: 10-11)

الضحك هو نشاط حيوي تقوم به الكثير من الثدييات، وكل القردة العليا، يختلف الإنسان عن باقي القردة العليا في الضحك عن طريق الجهاز التنفسي وليس الأمعاء، عشان كده لو حاولنا نتكلم وأثناء الضحك بنهوهو.

اقرأ أيضًا 
اللعبة الجزء الثاني : الحلقة الأولى .. الضحك للضحك

الضحك بيكون رد فعل على الزغزغة أو تعبير عن السعادة، ودي عند أغلب الحيوانات مصدرها اللعب.. إنما الإنسان لأنه معقد حبتين فأسباب الضحك عنده متنوعة أكتر، عشان كده الكوميديا أشكالها وأنواعها كتير، التنوع في الكوميديا مش على مسار واحد إنما كمان على مسارات متعددة.

فيه مثلا كوميدية اجتماعية وسياسية وجنسية وأكشن.. إلخ، كل أشكال الدراما تقريبا ينفع تتقدم بشكل كوميدي، وفيه أنواع الكوميديا اللي سبق ذكرناها، فيه كمان بقى ما يمكن تسميته بالمسارات (الطرق)، إيه الطرق اللي بيختارها صناع العمل الكوميدي في محاولة إضحاك المتلقي.

اقرأ أيضًا 
مسلسل اللعبة 2 .. حكاية الأخطاء الستة الموجودة في الحلقة الثانية

أو لما نبصلها من الناحية التانية تبقى.. المتلقي هيستقبل الإيفيه عبر إيه؟ سمعه ولا بصره ولا فهمه، وأنا عن نفسي باشوف أن ده هو ترتيبهم من الأسهل للأصعب بالنسبة لعملية صناعة الإيفيه. عشان كده أكتر إيفيه ضحكني في مسلسل اللعبة الجزء الثاني هو جملة وسيم لمراته الجديدة سوسن يوم صباحيتهم، افتتاح الحلقة رقم عشرة.

وسيم بعد صدمته بأزمة القايمة أصبح قدام حقيقة واقعة إنه مش هيقدر يطلق، وقايم يخرج يبلغ باقي المجموعة بره، وهو بيقوم مسك وسطه متوجعًا:

• آه
• مالك؟… أنت كويس؟
• أنا هابقى كويس.. بس أنتِ كويسة قوي.

حوار سريع بسيط مافهوش أي إيفيهات لفظية ولا حتى إيحاءات حركية، بس المعنى وصل بسهولة ويسر، وده أن دل على شئ يدل على ذكاء صانع الإيفيه، إيفيه مايقدرش يفهمه غير اللي متابع المسلسل ككل وعارف تركيبة إن وسيم الغارق في حب مراته لحد ودانه أصبح مضطر يحتفظ بجوازه من المزة الجامدة جدًا وعجباه جدًا.

اقرأ أيضًا 
مسلسل اللعبة 2 الحلقة الثالثة “لماذا كان ختامها مُوَفَّق جدًا ؟”

بشكل عام التعقيدة دي فتحت عالم جديد جوه المسلسل هيزيده ثراء على كل المحاور، لإنه مش بس بيعقد الأحداث إنما بيحطنا على تراك أخره مفاجأة عند الوصول لإجابة سؤال: نسرين بتعمل كده ليه؟

عالم السنتر مش عالي، لو قارناه مثلًا بعالم الفندق الحقير هنلاق التاني منور أكتر، وده في ظني سببه سطحية عالم العمل ككل وعدم اندماجه في العالم المحيط به غير في أضيق الحدود وبسطحية شديدة.

مثال: المعلومات المطورة للدراما اللي وصلت لنا خلال مشهد السنتر كان ممكن توصل لنا لو المشهد ده أتصور في حديقة عامة أو شقة حد منهم أو مواصلة عامة.

اقرأ أيضًا 
مسلسل اللعبة الجزء الثاني .. قراءة نقدية للحلقة الرابعة والخامسة

بالتالي أغلب مهمة الإضحاك واقعة على عاتق الحوار، الأمر اللي بيترجم باعتماد صناع العمل على الإيفيهات اللفظية أكتر كوسيلة للوصل إلى الضحك.

فلما نرجع للمقارنة بتاعتنا نلاقي تفوق عالم الفندق الحقير له سببين:

• عالم الفندق الحقير حي أكتر من السنتر، بفضل التركيبة المجتمعية الطبيعية لكل عالم (طلبة/صيع).
• الشخصيات المساعدة في الفندق الحقير أنجح من مثيلتها في السنتر.

لما نبص ع الشخصيات المساعدة هنلاقي عندنا عالم رجب ابن شناكل وعالم عصفورة وتهاني، حسام داغر خد الناقة وشرخ، أتمنى بس السوق مايهجمش عليه بشغل من سكة (وتعمل الشوية بتوعك) الراجل واضح إن عنده كتير بلاش تركوروا الناس والنبي.

في المقابل عصفورة نايم نِنة خالص.. لدرجة أني ماهتمتش أدور على اسمه.

أما تهاني فأظن مساحة الشخصية  ع الورق حكمت دعاء رجب شوية في تنفيذها، وعملية توسيع الدور مش حاجة سهلة ومجرد اقتراحها من قبل الممثل بيتوقف على حاجات كتير قوي مالهاش علاقة بجودة العمل قد ما هي مرتبطة بكواليسه.

ما سبق بيخليني أتحمس أكتر لمشاهد الفندق الحقير أكتر من مشاهد السنتر، بيساعدني على ده أن الأخطاء المرتبطة بعالم السنتر بتقفلني منه، ناخد مثلا مشهد إجبار مازو على قبول شويكار في فرقته.. موافقة مازو متمررة برضوخه خوفًا من تهديدها هي وبسيوني له بكشف مخالافاته المالية بالسنتر، وهي كلها غير منطقية الحدوث مع مشروع الغرض منه غسيل الأموال، إلا إذا كان المقصود إنه أهبل ومش عارف الغسالات دي بتشتغل أزاي.. هنا هنبقى مفتقدين أي توضيح أو بروزة لفكرة دي.

إقرأ أيضا

بُنيَ الدين الموازي على أربع

من الناحية التانية عالم الفندق الحقير أكتر تماسكًا على مستوى البناء المنطقي للعالم نفسه، صحيح مفارقة أمتلاك نفس الشخص، مستر مالك، للفندقين غريب سيكا.. لكنها أكتر منطقية من مشروع غسيل أموال صاحبه بيتهرب من الضرايب والفواتير اللي فاتح المشروع مخصوص عشان يحصل عليها.

أول مشهد لعالم الفندق الحقير في الحلقة العاشرة بدء بغلطة عجيبة شوية، فجأة وسيم بيقود حملة احتياطية من ظهور وليد.. من غير ما نعرف حصل إيه جديد يستدعي اللي بيحصل؟ اللي هو دمكم خفيف وكل حاجة يا جماعة.. بس أنتوا بتعملوا كده ليه؟ فحسيت أني حسدتهم سيكا.

فكرة تحدي الموسوعة حلوة في اللعبة الجزء الثاني ، مشهد انتظار الخبير معمول حلو، أما محاولات دخول الموسوعة (المستمرة معَنا من الحلقة 10 للحلقة 11) جت متنوعة بين الظُرف والاستظراف.

أظرفهم محاولة تغطيس شويكار ثم طبق الفتة العملاق.. الأتنين قفلتهم عالية قوي، عاب محاولة الفتة الخلط بين وزن الطبق وعدد الرز، أما أسخف المحاولات كانت النط من فوق العمارة ثم التاتو، أخيرًا خط تخزين شيماء في التلاجة ظريف جدًا.

نهاية التحدي عبقرية، خصوصًا المفارقة بين الأفكار العتيقة بتاعت زيكا وإنه يكون مفتاح الحل كل مرة، عابها بس خطأين، أتقال أن عدد سنوات الرسوب 29 سنة رغم أن زيكا في الحلقة الرابعة قال أنهم 22 سنة بس.. الخطأ التاني أن اللعبة كان المفروض ترن عند مازو عادي جدا.. ولما يفتح بثقة الكسبان يبقى يتفاجئ بالنتيجة.

اقرأ أيضًا 
مسلسل اللعبة 2 وتحدي الجواز .. قراءة نقدية من الحلقة السادسة إلى التاسعة