مسلسل النمر .. “أحلى قفلة” للحلقة الثامنة عشر

لو حبينا نحط عنوان للحلقة تمنتاشر من مسلسل النمر.. هيبقى بلا شك “أحلى بداية وأجمد قفلة”، البداية كانت بختام الحلقة اللي فاتت.. وأكتشافنا أن نصر خال نوح أما القفلة كانت باعتراف عامر العقاد لشمس إنه شغال مع النمر.

تصاعد مجنون في الأحداث على مدار حلقتين (18-19)، الحاوي ينطرد من مربع الشر بسبب هسترته وعدم اقتناعه أن المكن أتسرق فعلًا، وده معناه إنه رجع تاني خطر على محور الشر (الشيمي + الأخوان حلق).

كنز دولارات شمس يتسرق وهي تعرف فورًا أن ابنها هو الحرامي، وسكلانس نافوخه يتبطح في السرقة دي.

رغم كل الأحداث السريعة والكتيرة بس في نظري أهم حدث في الدخلة السُخنة دي هو انتقال فريدة لفيلا الشيمي عشان تعيش مع جوزها.. الفتاة من أول 10 خطوات ليها جوه الفيلا كانت حريصة على خلق أمر واقع وتثبيته، وده ظاهر بوضوح في جملتها: طيب يا خالد.. أنا هاطلع أستناك “في أوضتنا”. الأمر الذي نكشُه الشيمي فورًا.

فريدة ماكدبتش خبر وأعلنت من أول قعدة ليها مع جوزها في “أوضتهم” إنها شيطانة.. والجوز انبهر بيها. أما الشيمي فمابطلش لعب للحظة.. واتضح إنه مأمن ع المكن باسم لوحده من ورا باقي الشركا.

من أحلى ألعاب الحلقة أن لحظة شمس ما بتعرف نوح مين اللي سرق فلوسها ويتعامل معاه أزاي.. يكون رزق الحاوي عِتِر في الكنز وقلبه وأتكل ع الله، بس مشي بمعلومة مغلوطة أن علي هو النمر.

أبوخ حاجة في الحلقة هي مشهد عودة أبو نوسة ووصلة الوعظ الديني/القدري عن دعوة المظلوم ومدى تأثيرها في سير دراما الحياة، بشكل عام أنا كمواطن باتقفل من الفن الوعظي وبشوف أن الوعظ الأخلاقي غير قادر على إنتاج أعمال فنية جيدة.. إنما بيلبسنا في حاجات من سكة يوميات ونيس وما شابه من أعمال درامية، الوعظ الأخلاقي دمر أعمال فنية عظيمة أو ع الأقل قلل منها زي العار والكيف و جري الوحوش.. اللي بسبب النزعة الأخلاقية والخطابية عند الكاتب المتميز محمود أبو زيد.. تحولوا من أعمال بديعة إلى وصلات وعظ تقليدية تشبه إلى حد بعيد الإرشادات اللي كانت بتطبع في ضهر كشاكيل وزارة “التربية” والتعليم زمان.

بداية الحلقة تسعتاشر بتنقذنا بسرعة من التوتر.. ونعرف أن عامر العقاد رايح يعمل حوار على شمس، والأهم أننا بنعرف كمان إنه بيطلع مصالح منها وبيتجسس لها على الشيمي.

علي قرب شوية من سما.. وعرفنا أن أبو سالي فَنّْيَخ واتأكدنا أن سما ممثلة على أدها. من ناحية تانية الوصول لمكان إلهام أتعمل بشكل حلو ودمه خفيف جدًا، عابه بس حاجتين: الأولانية.. نوح/النمر بعت سكلانس يتفق مع الحمبولي (لما علي جاله أوضته) قبل ما يستلم مكالمة سعفان بالمعلومات (وهمه في بيت الحاوي) والتانية.. مفاجأة ملك بوجود نصر مش قد الحدث، غير أنها ماخدتش أي رد فعل على كلمة “خالي”، بس ظريف أن إلهام طلعت تعرف نصر.. ده معناه أن فيه مفاجأة جديدة، أو أن الماضي فيه تعقيدات أكتر وأكتر.

التصعيد في توتر العلاقات بين الشخصيات مستمر ببراعة، بيت الشيمي وبيت عنتر بقوا حريقة، وده تم بحرفية شديدة لكون كل تفصيلة متسقة ومنطق عالم المسلسل، بيت الشيمي على وشك الإنفجار بعد مواجهة ملك لأبوها وإصراره ع الإنكار لأخر لحظة، فهي بمساعدة نوح/النمر تعرف توصل لها وترجع تاني تواجهه. ومن الناحية التانية شمس تكتشف لعبة التأمين وتواجهه بيها هي كمان.. بس في السكة ترمي فقلبه بذرة الشك ناحية أبنه، وطبعًا ماننساش أن فريدة مازالت حية تسعى في قلب البيت.

أما بيت عنتر الحلق فبيولع بسبب زيادة غضب صفية على جوزها عشان حالة جودي من ناحية وخالد اللي كان هيموت على أيد النمر من ناحية تانية، ده طبعًا غير الضربة المالية الكبيرة بسرقة السبايك ووراهم خلعان عبير منه وأخيرا سرقة المكن، وأخيرًا وقوع عنتر تحت وطأ الضربات المتتالية. بس للآسف الوقعة اتعملت بشكل وعظي أخلاقي كشاكيلي.. زي اللي أتكلمنا عنه فوق.

إقرأ أيضا

تحريم التصوير 2) من المفسديون إلى شاشة تأخذنا للجنة

أما قفلة الحلقة في نظري هي مشهد زيارة فريدة لخالد في المعرض بعد كشفها لعلاقة سكلانس بالنمر، التكة دي تقدر تنقل الأحداث كمان نقلة قوية من مرحلة السقوط الحُر في اتجاه النهاية إلى التوتر والتأزيم من جديد.

اقرأ أيضا

كيف خدع محمد سامي السقا وكرارة في مسلسل نسل الأغراب؟