الفنان محمد إسماعيل ناجي ونظرية “هات زبون”

الفنان محمد إسماعيل ناجي وشهرته يوسف الشريف فنان كلاسيكي الشكل ورومانتيكي عتيق الأداء.
فنان محافظ وله جمهور من الناس العادية ال average اللي بيحبوا مصطفى محمود وقليل من أحمد خالد توفيق على خولة حمدي على روايات التنمية البشرية.
الأزمة التي تواجه محمد إسماعيل ناجي وجمهوره إنهم بيحبوا الفن ولكنهم حيرانين هل هو حرام وإلهاء عن ذكر الله ولا هو حلال لو فيه ما لا يغضب الله.
فبيتأرجحوا بحركة بندولية ما بين شيخ رسمي ملفق واعي إن الدولة بتستثمر في الفن وإنه عجلة اقتصادية بيقول لهم الفن مش حرام شريطة ألا يخالف الشرع وبين شيخ سلفي متحرر من الحرج الرسمي الدولتي ويرى الفن حرام برمته والفن مرتبط لدي العامة بفنتازيا العري والدلع والأجساد البضة ويكفي إنك تعرف إن إلهام شاهين لا تزال نموذج يثير أجيال كثيرة حتى اللحظة وأنها شديدة الأيقونية عند طقم مشايخ ولواءات و مستشارين و رتب رغم إنك قد تراها عزيزي اللامكترث العدمي كيان غير مهم من الأصل.
فيوسف المتأرجح بينتج فنا محافظا بيتحسس الاصطدام بالقيم الدينية وله جمهور ولكنه لن يعيش طويلا زي فن حسين صدقي وبعض بدايات يوسف بك.
هو نفسه في حواره مع المذيع رامي ربيعة زوج الفنانة إيمي سمير صبري قال إن الأبقى والأهم من العلم هو العلم الديني فالراجل متسق مع أفكاره واذا كان في بداياته تلامس مع روبي ومنة شلبي فده كان في حالة الارتباك وعدم الرسو على مرفأ الإيمان والله غفور رحيم.
الخلاصة محمد اسماعيل ناجي يوسف الشريف بيعمل فن ثقيل الظل أو مسطح أو فن القيم الكبرى زي التعبير الإسلامي ولعلكم تتذكروا مسرحيات الإخوان على مسرح فيصل ندا اللي كان بيشارك فيها مخيون قبل ٢٠١١ وكمان ممثلين كتير محافظين ومتحفظين وشايفين الفن وسيط للاسترزاق بس بيحتقروه زي ماجد المصري مثلا ف تصريحاته وحواراته وبدءا من جيل هنيدي و من بعده بدأت قيود كتير تتحط ع المنتج الفني عشان بقى مفهوم مين الزبون اللي بيجيب فلوس أكتر هي العائلات المصرية المحافظة المقتدرة اللي مش عايزه جيل إلهام ويسرا و عادل إمام وأحمد زكي وإيناس الدغيدي وسينما التمانينات والتسعينات المنفتحة.
في التسعينات الفكر المحافظ تغلغل وتمكن من عظام المجتمع والطرح والفقس في كل المستويات كان في الألفينات السعيدة مع عبدالكافي وعمرو خالد وما تبقى من الشعراوي ومصطفى محمود وده لسه مستمر و طول ما اسماعيل ناجي له زبون حيحط قواعده وانت عزيري ما تشتريش منه هو كدة كدة بضاعته خنيقة اشتري م السوبر ماركو اللي جنبه.