وأنا كمان لغتي

أنا لغتي
وأنا معلقةٌ..
معلقتان..
عشرٌ
هذه لغتي.. أنا لغتي

الكلمات دي من قصيدة قافية من أجل المعلّقات للشاعر الكبير محمود درويش، واللي بيتكلم فيها عن علاقته، كعربي، بلغته، وهي فعلًا تمثل أعتداد العرب بلغتهم، وعلاقتهم النفسية والوجودية بيها، وبكل بالتأكيد ماحدش يقدر يعيب على العرب أرتباطهم ده بلغتهم، على الأقل من مبدء (هُمَّه ولغتهم أحرار مع بعض يا أخي).

اقرأ أيضًا
عن محمود درويش الذي شارك في قتل ناجي العلي

درويش اسم في الشعر العربي مش مستني كلامي، والقصيدة من قصايده المشهورة، ومامرش عليا حد من النقاد كتب عنها أو حد من المثقفين بشكل عام علق عليها بشكل سلبي، بالعكس أتكتب فيها مقالات كتير تمدحها، وكونها قصيدة مشهورة وكمان نالت إعجاب ناس كتير، أنا واحد منهم على فكرة، ده معناه الإجماع على أنها قصيدة جيدة على كافة مستوياتها، وأهمها الفكرة/المضمون.

بس المثقف العربي، اللي بيحتفل اليومين دول باليوم العالمي للغة العربية، رغم إعجابه بالقصيدة وبشاعرها العظيم.. يفضل عنده حساسية لمجرد سماع أن فيه مجموعة ثقافية تانية مهتمة بثقافتها ومعتدة بلغتها زيه، فورًا يتحسس مسدسه، ومايجيش في باله غير كل شر.

فمثلا اعتراف دولة ناطقة بالعربية بلغات تانية كلغات محلية، مجرد طرح فكرة زي دي بتجيب لأغلب المثقفين العرب هيستيريا قومية عجيبة، ومابيعرفش يشوف الموضوع إلا من خلال نضارة المؤامرة الكونية ضد العروبة.

خلال صياغة الدستور الحالي، دستور 2014، شرُفت أني أكون جزء من تجربة باعتبرها ألطف تجرب عمل جماعي عشتها، بتقسيم عمل بيحصل بناء على مهارات ونقاط قوة وتميز كل فرد مع مراعاة ظروفه الشخصية، ومع مجموعة من أصدق ناس عرفتها.. باستماتتهم في الإنجاز وصدقهم في الطرح وتفانيهم في الإخلاص لعمل مجهد وحساس دون مقابل أو دعم، المكتب الاستشاري لحجاج أدول، اللي بدوره كان ملهم بشكل كبير.. خصوصًا بإيمانه العميق وحماسه لطرح أكثر الأفكار تقدمية أو حتى ثورية وتبنى أجرء الصيغ.

أفتكر خلال الفترة دي طرح قضية اللغات الشعبية المصرية، من خلال مقترح تقدم به أ. حجاج، بإضافة الاعتراف باللغات المصرية زي (الأمازيغية، القبطية، النوبية) كلغات شعبية.

قوبل المقترح بهجوم من النخب الثقافية قبل السياسية، زي الفنان الراحل حمدي أحمد وهجومه الرهيب على الفكرة وعلى النوبيين كفكرة، طبعًا الفنان الكبير مش حالة فردية.. ويقدر أ. حجاج أدول والفنان محمد عبلة وغيرهم من أعضاء لجنة الخمسين يحكوا لنا عن مستوى الرفض السياسي في أروقة اللجنة.

الرفض العنيف متوقع من الوسط السياسي العروبي ككل، الوسط ده وخلال عقود طويلة اعترف وتعامل ولسه بيتعامل مع أحزاب قومية عروبية، زي البعث في العراق وفي سوريا، واللي له أمتداد في دول تانية، وهنا في مصر عندنا أحزاب زي الكرامة والناصري وغيرهم من الأحزاب القومية العربية، وطبعًا نفس السياسي اللي بيتعامل مع الأحزاب دي كجزء طبيعي من الحركة السياسية في المنطقة، بس هيتم التعامل مع أي قومية تانية تفكر تكون حزب إنهم خونة.. ووقتها هنكتشف أن تأسيس الأحزاب على أساس عرقي فكرة مستنكرة ويمكن ممنوعة في دول كتير.

نفس المثقف اللي بيحتفل اليومين دول بيوم اللغة العربية وبيتفاخر بوجود مقر مجمع اللغة العربية في مصر، ماعندهوش أي أزمة أن مافيش أي مؤسسة رسمية أو مستقلة تهتم باللغات المصرية سالفة الذكر، مش شايف أن رغم وجود عدد من الكليات والمعاهد العليا بتضم أقسام للغات الأفريقية.. بس مافيش ولا قسم منهم بيدرس أي لغة من الموجودة في مصر.

المثقف المؤمن بضرورة وأهمية الحفاظ على لغته العربية، هو نفسه مش شايف مبرر لخوفي على لغتي النوبية من الإندثار، ومش قادر يقتنع بحق الطبيعي والشرعي في الخوف لما أشوفها مهددة ولا قادر يحس بشعوري وأنا مش قادر أقمها أو أتكلمها.

نفس المثقف العربي المحتفي بالقصيدة وبيحتفل بلغته.. هيتنفض فزعًا وهيطرطش أستنكار لو مواطن زيه بس نوبي ولا أمازيغي ولا قبطي كتب قصيدة قال فيها:

فلتنتصر لغتي على الدهر العدو

على سلالاتي..

على..

وعلى أبي..

وعلى زوالٍ لا يزولُ.

إقرأ أيضا

زغرطي ياللي أنتي مش غرمانة

هذه لغتي ومعجزتي..

عصا سحري..

حدائق بابلي..

ومسلتي..

وهويتي الأولى..

ومعدني الثقيل.

ع الأقل وارد تكون واحد من أمثال المعجزة التلاتة المذكورة في القصيدة تكون بنت ثقافته فعلا.