مسلسل اللعبة 2 الحلقة الثالثة “لماذا كان ختامها مُوَفَّق جدًا ؟”

رامي يحيى
شاعر عامية وقاص مصري مهتم بالشأن النوبي ونقد الخطاب الديني

كاتب فضي له اكثر من 250+ مقال

الحلقة دي نقدر نعتبرها البداية الفعلية لمسلسل اللعبة 2 ، حيث عودة الثنائي الرئيسي (مازو-وسيم) إلى اللعبة، وبدايتها مبشرة جدًا على مستوى الضحك، بـ”سيكوانس” شنطة الفلوس، هنا الصوت العالي المبالغ فيه من وسيم عادي ومش أوفر.. بالتالي المشهد حلو وفيه شوية إيفيهات حلوة لفظية زي “حتى شنط مدارس”.. أو موتيفات زي الأدان والغنوة.. والموقف بتوبة اللص.

ثم “سيكوانس” فوز وسيم بالتحدي.. بما فيه من إيفيهات جميل متوسطة المستوى للقفلة العالية للمشهد.

بس “سيكوانس” مشاكله غلبت الكوميديا اللي أصلا مش عالية، فمافيش حاجة شالته غير أداء سعدون يليه أداء الموظف (أحمد أسامة)، لو فوتنا أن سعدون راح القسم رغم إنه مايقدرش يضمن مازو.. مش هنقدر نفوت إنه بيحاول فعلا وبنشوف مازو بيسأله هل ضمنه ولا لأ.. ويرد أنه كان هيتقفش. وده مش منطقي يحصل.. وبالنسبة لرخصة الخروج عن المنطق للإضحاك، يبقى كنت فرجتنا مشهد المحاولة ونشوف سعدون بظروفه دي بيكلم الظابط.

مسلسل اللعبة 2

سيكوانس الجارة الرذيلة لعبت بطولته الممثلة القديرة، إنعام الجريتلي، باقتدار.. وظهرت قصادها باقي المشاركين في المشهد بمثابة السنيدة اللي بيسلموها الكيوهات وهي بتوزع عليهم الجُمل، ويؤخذ على رسم المشهد ع الورق عدم تداخل السكان الموجودين في الكادر في الحدث لا على مستوى الحوار أو حتى الميزانسين “الحركة”.

مسلسل اللعبة 2

سيكوانس السوق على حمام السباحة كان يطلع منه ضحك حلو قوي بنفس الجُمل الحوارية دي، لكن برسم مختلف تمامًا، كان محتاج زي المشهد اللي فات تفاعل مع الوسط المحيط.. وهي دي التفصيلة الواضحة المتسببة في عيب ظاهر جدًا وواضح كده أنه مستمر طول المسلسل، وهي أن الأحداث بين الشخصيات مش متضفر ضمن حياة طبيعية للشخصيات أو حتى الأماكن.. عيب جعل العمل أقرب للسيت كوم منه للمسلسل الكوميدي.

فكانت تصلح نهايته بداية جيدة جدًا لمشهد حيوي من إنخراط بعض النزلاء والعاملين في الشراء وأمتعاض بعض النزلاء ومحاولة إسراء السيطرة على الموقف وحفظ برستيجها من هجوم بسيوني وجميل إلخ، تفصيل تعمق من العمل وتسحبه أكتر في اتجاه المسلسل.

إقرأ أيضا