1٬235 مشاهدة
بعد مرحلة الأخطاء التاريخية دخلنا مرحلة تأليفه.. يا أخي أحمُس
(قال أمير صلاح الدين في تصريح خاص لـ خبر أبيض : بدأت تصوير مسلسل الملك، وأجسد من خلاله شخصية الملك كوش ، وهو قائد ومؤسس الحضارة النوبية، والعمل يحمل العديد من المفاجأت للجمهور، وأتمنى أن ينال إعجابهم عند عرضه).
الواحد مبقاش عارف هيلاقيها منين ولا منين، صناع عمل بممثل بإعلام فني كل دول ماحدش فيهم عنده فكرة عن تاريخ البلد اللي عايشين فيها؟! طب بتعملوا أعمال تاريخية ليه يا جماعة؟؟ عشان تنقطونا مثلًا؟
اقرأ أيضًا
أحمس لم يطرد الهكسوس نهائيًا “قصة ما بعد عصر ظهور العجلات الحربية”
مش قادر أتخيل أن ممكن يكون مؤلفة العمل ماعندهاش فكرة عن التاريخ للدرجة دي، أو أن مخرج العمل واللي أعرف عنه توخي الدقة في التفاصيل.. ماينتبهش لخطأ بالحجم ده، كمان برضه صعب جدًا يكون الممثل مش عارف اسم الشخصية اللي هيلعبها أو مش متابع ما ينشر على لسانه في الميديا عشان يصحح خطأ الموقع (محرر أو ديسك). مهم نعرف يا جماعة دخل منين سرسوب الهوا ده.
جرت العادة أن تكون الأخطاء التاريخية في الأعمال الفنية تتحرك في حيز ملامح الشخصية أو تكوينها الجسماني.. الملابس.. الأكسسوار، فنجد مثلًا أحمس ابن طيبة (الأقصر) البار أشقر وعيونه ملونة، وهي أخطاء جسيمة.. صارت للأسف معتادة، لكن إننا نوصل لمستوى تقديم شخصية رعنا ماخلقهاش أصلًا.. ده ليفيل جديد من نوعه في عالم الأخطاء.
فمبدئيًا يا جماعة مافيش حد في التاريخ اسم “كوش”، كوش دي منطقة جغرافية عرفت بالاسم ده، فالموضوع كده شبه أن المسلسل فيه شخصية اسمها “الملك دلتا” أو “الملك أول فيصل”.. حاجة خزعبلية جدًا يعني.
مش بس الشخصية وهمية.. إنما كان ينسب ليها أو تم تعريفها بشكل خاطئ تاريخيًا، فتأسيس الحضارة النوبية أكيد ماكنش على أيام “أحمس”، ابن الأسرة الـ17، النوبة مش مواليد أول أمبارح يا جماعة حرام عليكم.. ده لو تغاضينا عن المعرفة عن النوبة من خلال تاريخ الحضارة النوبية نفسها وأكتفينا بالبحث في تاريخ الدولة المصرية القديمة، هنلاقي أن أقدم ذِكر لأرض كوش يرجع لعصر الأسرة الـ12، والمعروف باسم لوح الملك “سنوسرت الأول”.
الملك سونسرت الأول قابل وجه رع كريم قبل ميلاد الملك أحمس بحوالي 4 قرون كاملة، واللوح بتاعه كان بيتكلم فيه عن حرب خاضها ضد الكوشيين وانتصر عليهم، يعني في الوقت ده كانوا كيان كبير داخل حرب مع كيان بحجم الدولة المصرية القديمة.
كنت أتمنى يكون خطأ في الكتابة الصحفية، بوصفه الخطأ الأسهل تداركًا والشخص المعذور نسبيًا، لكن للأسف الخطأ منشور على صفحة أمير صلاح الدين، فياريت صناع العمل يشتغلوا بسرعة على تصحيحه.. ويجيبوا متخصص في تاريخ المرحلة للمراجعة العلمية.
الكارثة الأكبر بالنسبة ليا، واللي أحزنتني جدًا، هي نفسها سبب انتباهي للموضوع أساسًا، أن صفحة مهتمة بالتعريف بالنوبة وبأخبار النوبيين مشيرة الخبر باحتفاء شديد.. وتحت منه عشرات التعليقات المهللة فرحًا، باستثناء شخص واحد اللي كتب لتوضيح أن الحضارة النوبية أقدم من الكوشية ذاتها.
فمش عارف إزاي صفحة تحمل اسم “النوبة” القائمين عليها مايعرفوش أ .. ب تاريخ النوبة، وهو حسب علمي إنحدار في مستوى الصفحة التي كانت من أهم الصفحات النوبية من أعوام قليلة جدًا.
ده هو الخطأ التاني في تعريف الممثل للشخصية اللي بيلعبها، فمش بس مافيش حد اسمه كوش ومش بس أن مملكة كوش موجودة وقوية من قبل ميلاد أحمس بقرون.. إنما كمان الحضارة النوبية أقدم من مملكة كوش زي كده ما الدولة المصرية القديمة أقدم من الملك أحمس، مملكة كوش هي حلقة من حلقات الحضارة النوبية اللي سبقها حلقات أخرى من ممالك كبرى لها آثارها وتاريخها العريق زي مملكة تا-سيتي أو (أرض الأقواس) كما سماها قدماء المصريين.
الكاتب
ما هو انطباعك؟
