اسم محمد = New folder

إيه الفكرة من الأسماء، ليه كل حاجة في الدنيا ليها اسم، وبالنسبة للبشر كل شخص ضروري يكون له اسم، حتى لما نربي حيوان بيبقى لازم نحدد له اسم.

وبسؤال 4 شخصيات أكاديمية عُدُول وصلت أن الاسم كفكرة مهمته التمييز بين الأشياء وبين البشر وبعضهم البعض، تعالوا بقى نشوف طريقة استخدامنا للأسماء.

على مستوى الموسيقى مثلًا مين يقدر ينسى موسيقار الأجيال، ومش مهتم هنا هو حرامي ولا عبقري المهم بالنسبة لي إنه “محمد”، زيه زي صاحب نفس الاسم العبقري سابق جيله وصاحب أول شركة أسطوانات في البلد، وزي المطرب الشعبي “محمد” صاحب الأصطباحة الخالدة (يا حلو صبح)، وعلى ذكر الأغاني الخالدة مستحيل ننسى الأغنية الاحتفالية بشهر رمضان للمطرب العظيم “محمد”، كمان أحب أذكر الموسيقار المصري الصميم اللي برضو كان بنفس الاسم.. المشهور بين الجمهور بأغنية (مدد مدد شدي حيلك يا بلد).

وفي الأجيال الأحدث هنلاقي المطرب الشاب بنفس الاسم اللي اشتهر عبر شريط “في السكة”، والمطرب صاحب التجربة المختلفة والمميزة “محمد” الملقب بين محبيه بـ الكينج، والمطرب الشعبي وملك الكاسيت “محمد”.. ومؤخرًا تصدر ممثل بنفس الاسم  المشهد التمثيلي والغناءي على بؤ واحد ولقب نفسه بـ”نمبر وان”، وغيره وغيرهم كتير من المحمدات في مجال الموسيقى والغناء والفن بشكل عام وشتى المجالات والأوساط والأتوبيسات.

موضوع الـ”محمد” مش مقتصر ع الوسط الفني بس.. لا ده مسيطر على كل المجالات وعبر العصور.. عندنا مثلا العسكري الألباني اللي حكم بلدنا وحاول يستقل بيها عن الخلافة الإسلامية التركية “العثمانية”، وكتير من المؤرخين المصريين بيعتبروه “مؤسس مصر الحديثة”، وإن كنت اختلف معاهم خلاف فلسفي مش موضوعنا دلوقتي، المهم أن العسكري الألباني ده بنفس الاسم”.
استمرت أسرته تتوارث عرش مصر عشرات السنين لغاية ما الجيش عمل إنقلاب أبيض استرد به السلطة للمصريين لأول مرة منذ سقوط الدولة الكميتية، عشان أخيرًا يحكم مصر رجل مصري هو صحيح برضه عسكري زي الألباني سالف الذكر.. بس المهم إنه مصري، واللواء المصري ده اسمه “محمد”.

في ظروف سياسية مش محل نقاشنا هنا تم تحديد إقامة اللواء “محمد” واستلم مكانه السلطة البكباشي “جمال” ووقتها كان المدني المقرب منه جدًا هو الصحفي والكاتب “محمد”، وده ماسابش السلطة غير عشان يقابل ربه شخصيًا.. واستلم السلطة بعده جنرال تاني بنفس الاسم، ومش مهم الجنرال ده عمل إيه في سياسته.. المهم إنه لما حب يعين له نائب اختار جنرال تاني بالصدفة اسمه “محمد”، وده لما مسك السلطة رشق فيها 30 سنة لغاية ما الناس نزلت نامت في الشوارع بالملايين عشان يسيب السلطة، مش مهم إنه سلمها لمجلس جنرالات ولا إيه الأحداث اللي حصلت.. المهم أن أول انتخابات رئاسية كانت نتيجتها اختيار رئيس إخوانجي بنفس الاسم”، ومش موضوعنا إنه قضا أخر كام سنة في حياته لابس البدلة الحمرا.

نسيبنا من السياسة ونخش على أكتر مجال له جمهور -وهو الكورة-، هنلاقي أحسن لاعب أنجبته ملاعبنا عبر العصور صاحب رقم 22 “محمد”، وابوه وجده راخرين اسمهم “محمد”، من أشهر إنجازاته إنه أحرز هدف فوز منتخبنا ببطولة الأمم الأفريقية في النهائي الصعب قدام أسود الكاميرون.. بعد تمريرة سحرية من نجمنا المحترف وقتها في بروسيا دورتموند “محمد”، أما أحسن لعيب محترف حصل في تاريخنا هو نجم ليفربول الحالي “محمد”.

باختصار يا سادة إحنا مش مدركين الغاية الأساسية من الأسماء، رغم إننا في التعامل اليومي بنتحايل على الأزمة بتسمية أي “محمد” أو “محمود” أو “أحمد” باسم أبوه أو جده أو أي اسم يقدر يقوم بالوظيفة الحقيقية للأسماء، ورغم كده مستمرين في إنتاج المزيد من البشر عديمي الأسماء.

فمثلًا لو مواطن1 بيكلم أخوه المواطن2 عن مواطن تالت.. والمواطن2 سأل عن اسم المواطن التالت وكانت الإجابة “محمد”.. بديهي بيكون السؤال التالي: “محمد” مين؟، يعني اسمه هنا ماكنش له قدرة على أداء مهمته الأساسية وهي التمييز.

أنا مثلا خلال كاس العالم اللي فات كنت باشوف ماتش لمنتخب كرواتيا على قهوة جنب البيت، بين الشوطين قعد مجموعة من شباب المنطقة يهزروا ويضحكوا على اسماء لعيبة كرواتيا عشان معظمها بينتهي بالمقطع الشهير “تش”، ولأني أعرفهم كلهم.. وقفت جنبهم وندهت بثقة: محمد.. فالأربعة اتلفتوا باستجابة طبيعية جدا.. لأن كلهم فعلا بنفس الاسم، فحدفتلهم بوسة ع الهوا ومشيت أضحك لوحدي على إيفيه مش عارف لحد النهارده حد فيهم لقطه ولا لأ.

إقرأ أيضا

حوار مع صديقي الطفل

وعلى فكرة من غير مونديلات ولا كرواتيا ينفع أي حد يعيش التجربة دي بس بشكل مختلف شوية، أي حد يحب يجرب كده ينده في مكان عام وبصوت عالي: يا محمد. ويشوف كم البشر اللي هتبص.. طب ورحمة النعمة مستعد أراهن أي حد على أي حاجة أن فيه ستات هتبص.

الموضوع فعلا مربك جدًا.. تخيلوا معايا كده لو كل حاجة حوالينا اسمها مثلًا “كمودينو”.. كنا هنتصرف أزاي، أو تخيلوا جهاز كمبيوتر كل الملفات اللي عليه اسمها New folder هنعرف نتعامل معاه؟؟؟

أهو اللي بيسمي أبنه “محمد” بالظبط زي اللي بيسمي ملف New folder.