ازاي تشتري موبايل كويس.. من غير فذلكة

انا باحب الإلكترونيات، وبافهم فيها، وبطبيعة دراستي، ف أقدر أقول ايه الكويس من المش كويس، وايمانا مني بحب مساعدة الغير، قررت النهاردة أعملكم البرشامة الصغيرة دي، فيها بعض النصايح اللي ممكن تفيدك لو انت نازل تجيب جهاز موبايل جديد، ده لو معاك فلوس طبعا في ظل الظروف الاقتصادية الأخيرة….النصايح دي تنفع للموبايل وللكومبيوترز عامة، وإليكم التفاصيل:
1. حدد هدفك من الشرا..
الخطوة الأولي ف انك تشتري موبايل، انك تحدد هدفك منه، يعني محتاجه للتصوير، محتاجه عشان الشغل، محتاج أداء عالي عشان بتحب الألعاب، محتاج تليفون ميهنجش عشان السوشال نتوركنج، وهكذا، تحديد الغرض من الشرا، بيريحك في الخطوة اللي بعد كدة، الخطوة دي هي التزامك بميزانية.

2. التزم بميزانية مادية..
خلاص عرفت انت هتجيب التليفون ليه؟ الخطوة دي مهمة عشان التليفون اللي الكاميرا بتاعته عالية، مختلف عن أخوه أبو كاميرا عادية، ومختلفين عن التليفون أبو أداء عالي، وهكذا، ف خلاص مادام حطيت هدفك، تقدر تشوف انت محتاج فلوس قد ايه، بس خليك مرن ف موضوع الميزانية، وخلي عندك دايما هامش زيادة أو نقصان، متعرفش السوق هيحصل فيه ايه بردو.

3. سيرش ع النت..
جوجل بجلالة قدرها، عاملة للناس موقع https://www.android.com/phones/ بتعرض فيه أحدث اصداراتها من التليفونات اللي بتشتغل علي اندرويد، أما لو انك من محبي وعشاق Apple ف ممكن تدخل علي لينك Apple.com و من هناك تقدر تشوف أحدث المنتجات، السيرش هيديك كل المعلومات اللي انتا محتاجها.

4. اسأل استشير…
استقريت علي تليفون أو تليفونين؟ ؟ زي الفل، نبدأ نسأل بقي عن الناس اللي بتستخدمه، وبقالهم قد ايه بيستخدموه، وأخبار بطاريته ايه، وايه أهم عيوبه، متتكسفش واسألهم واطلب منهم إجابات صريحة من غير مجاملة، الي هتدفعه مش قليل بردو.

5. ع التوكيل دور..
الشئ الأهم والأخطر هو وجود وكيل رسمي معتمد في خدمة ما بعد البيع والصيانة للموبايل الي اخترته، لأنك ممكن تشتري تليفون بمبلغ صغير، بس ميكونش له توكيل في مصر، ف يبوظ متعرفش تصلحه، أو متلاقيش ليه قطع غيار، وده عيب قاتل، الشركة الكبيرة عامة مبتتعرفش غير من خدمة ما بعد البيع فيها، غير كدة شكليات..!

دول كانو الخطوات الأهم في اختيار التليفون الجديد، ولو تحب تزود عليهم أو تشاركنا بنصايحك، سيب رأيك في الكومنتات، واعمل شير ولايك للمقالة لو عجبتك ?