921 مشاهدة
خالتي بمبة || حكاية رشدي وشقيق أسامة بن لادن.. كلمة السر “عدوية”!
يمكن أكون كلمتكم عنه كتير، ما أنا قولتلكم إن حكايات فنانين زمان مبتخلصش ومهما عاشوا كتير أو قليل، حياتهم مليانة مواقف وأسرار، أثرت فيهم وغيرت منهم، وادتهم القوة إنهم يكملوا مش زي كتير من فنانين اليومين دول، تلاقيه ابن امبارح ويقولك أنا اتبهدلت ووصلت للي أنا فيه بتعب ويدمعلك دمعتين من بتوع التماسيح قال يعني احنا كده هنصدقه، يالا ما علينا، حكاية النهاردة مش هتلاقوا حرف عنها لا في موقع ولا في تليفزيون.. “إكسكلوسوف” يعني.
حكايتنا عن الفنان محمد رشدي وعلاقته بأخو أسامة بن لادن ، أيوة زي ما سمعتم بالظبط بس متخلوش دماغكم توديكم لبعيد، واقروا الحكاية الأول:
نرجع لورا شوية كدا، كان يا ما كان في سالف العصر والآوان، شهدت نهاية السبعينيات تغيير كبير أوي، وبين يوم وليلة لقى رشدي هو وصديقه الفنان محرم فؤاد إن الحال في مصر مبقاش زي الأول، فيه ناس تانية بقت محتلة المشهد، ففكروا يسافروا ويغنوا في لندن وباريس، معتمدين على الوجود الكبير للعرب والخلايجة.
بصراحة مكنش مبسوط أوي إنه هيغني في كباريه، بس ده أكل عيش برضه، وهو عنده أسرة مسؤول عنها، وأهي حاجة مدارية كده بتحصل برا مصر، يعني كان لا يمكن أبدًا يفكر يجرب يغني في كباريهات مصر ولا يهوب ناحيتها.
ابنه طارق حكالي إن أبوه رشدي بدأ يسافر عام 1978 ولحد 1982، يقعد في لندن من أربع لخمس شهور، وبعدين يجي يقعد مع أولاده شوية، وفي سفرية من السفريات اتعرف في لندن على واحد اسمه الشيخ حسن.. الشيخ حسن بن لادن، أيوة أخو أسامة بن لادن، وربنا زرع في قلبه محبة رشدي، وأغنيته “عدوية” كان كل ما يروح يسهر في المكان اللي بيغني فيه رشدي يطلب من أي حد بيغني إنه يقول الأغنية دي، ويا سلام بقى لو كان رشدي هو اللي هيغنيها.
حكايات خالتي بمبة.. “حليم ورشدي” اتكسر عليهم الإيجار فهربوا من البيت
رشدي كان حاسس إن ربنا بعتله حسن بن لادن عشان يعرف يجوز أولاده، خاصة وإنه رغم كل السنين اللي اشتغلها في الغنا والأفراح اللي أحياها والسينما اللي اشتغل فيها، مقدرش يعمل ثروة كبيرة لأولاده، تخليه يقدر يجوزهم، وده كان سبب من أسباب سفره.
نرجع للشيخ حسن اللي كان كل ما بيرجع لبلده عشان يتابع شغله ويتطمن على أسرته، يتصل يوميا بالتليفون بالليل، ويسأل إذا كان رشدي قدم فقرته ولا لأ، ويفضل معاهم على التليفون عشان يسمع منه “عدوية”، وبعدها يطلب منهم يدوله ظرف فيه “500 جنيه”.
الصلة بين رشدي والشيخ حسن منقطعتش برجوع الأول لمصر وتوقفه عن السفر، فضلت مستمرة، وكان كل ما الشيخ حسن يزور مصر، يتصل بالموسيقار حسن أبو السعود، ويطلب منه إنه يجي يزوره ويكون معاه محمد رشدي عشان يسلم عليهم.
حكاية غنا رشدي في كباريهات لندن بدأت تقل، لما الدنيا انصلح حالها في مصر، وتحديدا لما أغنيته “كعب الغزال” اتعاد استخدامها في فيلم جديد، الناس افتكرت إنها أغنية جديدة، وبدأوا يدوروا عليه من تاني، وأعاد توزيع أغانيه القديمة في أربع ألبومات، وحققت نجاحات ومبيعات كبيرة.
وبعدها فكر مع المنتج محروس عبدالمسيح على تقديم أغاني جديدة، وده اللي حصل، وغنا “دامت لمين” وبعدين “قطر الحياة” و”شقا عمري يابا”، على فكرة هو مات قبل ما يشوف نجاح ألبومه الأخير، وقت تسجيل الأغاني كان عيان يا حبة عيني كان عنده فشل كلوي، وسرطان في العضم بس مكنش يعرف بيه، خبوه عنه، وكان فاكره هشاشة عظام، وعايش بالمسكنات، ومات في 2 مايو 2005.
باقي حكايات خالتكم بمبة من هنا
الكاتب
ما هو انطباعك؟
