6٬854 مشاهدة
السيرة الهلالية .. قصة ملحمة شعبية من نواحيها التاريخية والفنية
السيرة الهلالية هي أكبر ملحمة عربية مسجلة شعريًا، يعني تقريبا في حدود مليون بيت شعر، كان زمان المصريين بيقعدوا يسمعوها على القهاوي، بييجي الرواي يحكي السيرة على مدار 30 حلقة – 40 حلقة زي ما هو حافظ، الناس تتابع من خلال القهوة … وكأن الموضوع ده زي ماتشات الكورة دلوقتي، الراوي يروح من قهوة لقهوة، وهكذا ، كانت أشهر السير الشعبية سيرة الهلالية وسيرة بيبرس .
السيرة الهلالية مش قصة واحدة ثابتة السيرة الهلالية أكتر من حكاية وأكتر من وجه نظر، والسيرة بتختلف باختلاف المؤدي واختلاف البلد، بس طبعًا فيه وقائع ثابتة، يعني في المغرب العربي وتونس البطل هو الزناتي خليفة، في الشرق العربي البطل أبو زيد الهلالي في الجنوب البطل هو دياب بن غانم.
طب هي إيه السيرة الهلالية ؟
السيرة الهلالية مليانه قصص فرعية كتير قصص عن أبو زيد وقصص عن دياب و قصص عن الزناتي خليفة وعن السلطان حسن وعن يونس اللى غني له محمد منير ..أنا يونس في بلاد الشوق.
اقرأ أيضًا
الجريمة التي ارتكبها محمد منير .. عيب قوي يا كنج
السيرة الهلالية في سطرين : بتحكي عن نجد اللي بتتعرض لجفاف ومجاعة، فيخرج أبو زيد بحثا عن أرض بديلة، فيجد تونس الخضراء، فيقرر الهجرة فيذهب غازيا لتونس الخضراء ومعه الهلالية؛ ولكن يتصدي له حاكم تونس الزناتي خليفة ،حتى ينتصر عليه دياب ” احد أمراء بني هلال ” و يحكم تونس
طب إيه هي حكاية أبو زيد الهلالي ؟
والدة أبو زيد خضرا الشريفة وهي حامل بتروح جزيرة بتشوف غراب أسود بيتحول لغراب نار بيكون أقوي من كل الطيور و بتتأثر بالغراب جدا و لكن والدة دياب بتروح الجزيرة بتشوف صقر قوي ، ومن هنا تبدأ الحكاية
لما تولد خضرا طفل أسمر زوجها رزق الهلالي فارس بني هلال في عصره بيرفض الأعتراف بالطفل
يقول مش ابني، وبيتهم زوجته بالزنا و بيطردها ، فتخرج مع الطفل مهاجرة الي ملك بني زحلان وبيربي أبو زيد
لحد ما يوم تقوم معركة بين الهلالية و بني زحلان و بينتصر الأخير فيقرر بني هلال الاستعانة بفارسهم الأهم رزق فتحصل المواجهة بين أبو زيد و رزق، طبعا أبو زيد ميعرفيش أن ده والده و لا رزق يعرف إن أبو زيد ابنه.
تضطر خضرا الشريفة تقول السر ،و يرجع أبو زيد الي بني هلال أمير، ويحارب معاهم ينتصر ويحب ” الجازية ” أخت السلطان حسن كبير بني هلال، في نفس الوقت الأمير دياب بن غانم بيحب الجازية فيحصل أول تنافس بين أبو زيد ودياب أو ذياب بن غانم، العلاقة بين الأبطال الثلاثة دياب و أبو زيد و الزناتي قائمه على الاحترام كل واحد عارف قيمة التاني و بيمدحه، الجازية بتتجوز أمير صعيدي وتروح تعيش في مصر عشان تحافظ على فرسان القبيلة.
أبو زيد و دياب
أبو زيد يقرر يشوف مكان تاني بيتنكر و بيسافر يشوف تونس، يرجع يقنع القبائل كلها إن الحل من الجفاف والمجاعة يروحوا معاه على تونس، بيروحوا تونس بيتصدى لهم الحاكم القوي زناتي خليفة و بيحارب حرب شرسة جدًا، دياب بيقرر إنه يقعد في منتصف الطريق عشان زهق منهم.
الزناتي بيكون عنده تنبؤات أن اللى هيقتله بمواصفات دياب ، عشان كدة كان كل يوم يحارب أبو زيد و الهلاليل وهو متأكد ان قاتله مش بينهم،كانت كل يوم بتحصل مواجهات بين أبو زيد والزناتي بتنتهي بالتعادل لحد ما الناس تسنجد بدياب فيستجيب و يقتل الزناتي ويحكم تونس.
الأصل التاريخي للسيرة؟
الهلالية قبائل عربية كان تعيش في مصر لما قامت الدولة الفاطمية انتقلوا لصعيد مصر وبعد كدة قرر الفاطميين التخلص منهم نهائيًا، فكرة الفاطميين وقتها أن وجود القبائل الهلالية بزعامات واضحة خطر عليهم، فقرروا إنه يبعتوهم لأعداء الدولة الفاطمية في المغرب، لكن الهلالية تمرودا عليهم و أعلنوا ولائهم للخليفة العباسي في بغداد، يعني مبدأ أضرب أعدائك بأعدائك وانت الكسبان.
ملحوظة: يرجع نسب الجاوازي وهي قبيلة ليبية إلى أبو زيد الهلالي
إيه أثر القبائل الهلالية علينا دلوقني ؟
كل لهجات الشمال الافريقي مستوحاة من لهجة بني هلال
يعني إيه ؟ يعني كانت لكل قبيلة لهجة .. عشان بنوا هلال عاشوا معانا اتعلمنا منهم اللغة العربية بطريقتهم.
للمرأة دور عظيم فى تغير المجتمع، يعنى لو عاوز تحكم على أى مجتمع ممكن تحكم عليه من المرأة، نظرة المجتمع للمرأة ، دور المرأة في المجتمع.
إحنا هنحكي عن الجازية الهلالية، تقدر تقول عليها ست بس بمليون راجل، جازية تقريبًا كان من أهم أسباب الصراع بين دياب بن غانم و أبو زيد الهلالي بسبب حبهم لها.
الأميرة الجازية هي بنت سلطان سرحان و الأميرة الشماء وأخت السلطان حسن سلطان العرب كما تقول السيرة، ويقولون أنها كانت فائقة الجمال ..لديها شعر أسود طويل يصل إلى قدميها
الجازية مش مجرد أميرة ،الجازية فارسة و محاربة والعقل المدبر .. كانت في مجلس الشوري ..كانت بتقدر تقرب وجهات النظر، وبتعرف تقدم مقترحات جديدة
الجازية هي نموذج المرأة العربية المضحية، طول الرواية بتضحي عشان العائلة و القبلية، وهي دي المعاني اللى عاوزه الناس اللى كتبوا السيرة يزرعوها فينا، التضحية من أجل المجتمع.
أول حاجة ضحت بيها الجازية أنها قررت تبعد عن أبو زيد عشان ميكونيش حبها له سبب لصراعه مع دياب بن غانم فتشتت القبيلة وتفتت، وقررت إنها تتزوج من راجل صعيدي من الأشراف اسمه الشريف أبو هاشم .. وأنجبت منه محمد و حامد.
أثناء الهجرة كانوا محتاجين لها، محتاجين لعقلها و ثقافتها، لما القبيلة طلبوا منها أنها تكون معهم في الهجرة، زوجها رفض، قال لها لو عاوزه تروحي لأهلك تبقي مش على ذمتي، فقررت أنها تتطلق منه و تروح تنضم لأهلها، ودي الفكرة اللى بتكرر فى السيرة مع أكتر من شخصية؛ التضحية من أجل أن تبقي العائلة، زي ما هتكرر فى قصة يونس، ينفع أحبك من غير أهلي.
السيرة في الفن
السيرة الهلالية اتعملت فيلم زمان سنة 1947 بطولة سراج منير، واتعملت مسلسل مصري كان كل جزء بيتغير أبو زيد نفسه مش عارف إزاي مرة يبقي أحمد عبدالعزيز ومرة يبقى جمال عبدالناصر و في الجزء الأخير يبقي رياض الخولي كان مسلسل ضعيف.
اتعملت مسلسل سوري حلو بطولة سلوم حداد وسامر المصري و سوزان نجم الدين
مينفعش نقفل البوست قبل ما نكتب إن عبد الرحمن الأبنودي قعد 20 سنة يجمع السيرة الهلالية من كل دول العربية
الكاتب
ما هو انطباعك؟
