الماتش

في ليلة صيف جنوبية هواها مبلول شجن وسماها ناقصه قمر، كان جد قاعد مع حفيده يشربوا شاي بحليب، على نور تليفزيون عتيق بيذيع ماتش ماحدش بيتفرج عليه. طلب الحفيد من جده يحكي له حدوتة، الجد قاله: هاحكي ليك حكاية ناس عاشت في حالها، تاكل وتشرب.. تلبس وتفرح من طَرح أيدها.. ناس….

سيداتي أنساتي سادتي، ننتقل الأن إلى أذاعة خارجية من ستاد…

*******

أرض الدهب كانت بصح أرض خير، الغيط براح.. النخل زاد عن عدد الخلايق، في الليل.. الأرض تنام في حضن النيل، وفي صباح يوم عجيب الشمس طلعت وبدأت الحكاية.

*******

يسنتر على طول ويباصي للي جنبه، وحأقول لكم بسرعة تشكيل الفرقتين

*******

دهب راجل قديم زي النخيل.. حافظ كل حتة في أرض الجدود، لساه عفي زي الأرض اللي روحه في جوفها، يرويها بعرقه.. دمه.. روحه.. سنين عمره، تنبت معابد.. وبيوت.. ونخيل يطرح تراث يعيش زمن، ولما يحين الحصاد يخرج من الفجر يحصد… دهب.

ماشي بالكورة يرقص واحد والتاني والتالت …. توووووووت

*******

كل الناس أتسمرت حتى دهب

*******

الحكم بيروح عليه وبيطلع له الكارت الأصفر

*******

المية عليت.. الأرض كشت.. راحت بيوت، حزن دهب.. النخل بيشب يمكن يشوف الشمس، الخلق بقت فوق بعضها، لكن يا ولدي الأصل خير.. قسموا الرغيف ساعدوا الجيران، كل ده بفضل دهب الراجل الحكيم اللي في قلب الشدة وقف..

*******

في وسط الملعب بيحاول ينظم صفوف فرقته، وبيلعب واحدة بينية بتوصل عند..

*******

علوب، ابن دهب، فات صنعة أبوه حيزرع فين.. ما الأرض راح نصها، صار صياد يدور في النيل.. اللي كان بيحضن الأرض وفجأة بلعها من غير هزار. بقت هي دي الحياة.. أرض ومية.. سمك وبلح.. هات والحساب أخر الموسم.

لكن.. وآآآه من لكن، النهر قام من جديد.. وغرقت كمان حته من أرض عم دهب.

اللي بيضرب كف على كف مش مصدق أن الحكم حسب اللعبة “أوفسايد” على…

*******

علوب خد أبوه ورحلوا من تاني، قعدوا في أخر حتة فضلت من الأرض.. بنوا تالت بيت ليهم تحت أخر نخلة فضلت، النخلة اللي أتزرعت يوم ما أتولد عم دهب….

*******

اللي باين عليه الإجهاد

*******

علوب بقى أب.. وبعت أبنه يشتغل في الشمال يمكن ياخد بأيد الرزق الشحيح، سافر الواد للمدينة.. الواد اللي بالعافية يفك الخط وما يفهم غير في الزرع والقلع.. المركب والشبك، هيعمل أيه في المدينة الزحمة..

*******

مدثر تايه قدام لوحده، الخطوط كلها بعيد عن بعض.. وفي وسط الملعب…

*******

علوب دماغه بتلف.. بين أبنه اللي سافر بعيد وأبوه المريض بالحزن، الرزق قل.. الأرض كشت.. والنخل راح.. حتى المركب ضاعت والنيل بيعلى. ده غير الأخبار اللي بتقول أن النهر هيعلى من جديد، بس النوبة دي هتكون أعلى من كل مرة. وصل الكلام لدهب حاول يقوم..

يا خبر أبيض..الحكم بيدي له كارت الأحمر

*******

دهب بيصرخ نروح فين؟!؟، بيدور مع أبنه على أي حتة هتفضل من أرض الدهب، أي حتة ينفع يتدفنوا فيها ولما يرجع الحفيد يبقى يزورهم.

*******

الحكم رافض أنه يقعد في أي حتة في الملعب، لازم يطلع بره خالص.. وسط الجمهور.

*******

علوب بعت لأبنه يشتكي هناك، يمكن صوته يوصل فيسيبوا ليهم أي حتة تكفي يادوب أوضة ومدفن.. وزاوية يصلوا فيها على روح اللي راح.

*******

وماشي مدثر ويعدي مدثر ويفوت مدثر ويشوط شوطة جامدة تيجي في العارضة..

إقرأ أيضا

رجال الصف الثاني (4) على صبري .. إمبراطور الاتحاد الاشتراكي

*******

وصل الخبر لعلوب.. خد أبوه والذكريات وخرج حزين، دهب وقف لأخر مرة ع الشط يبص ع البيوت.. النخل.. الطين.. المدافن والمعابد.

*******

طبعا يا جماعة قرار الحكم نهائي

النهر قام قومته الأخيرة.. قام لتالت مرة في 50 سنة، قام عشان يبلع الأراضي.. الذكريات.. النخل.. الأغاني.. عضم الجدود، قام لغاية ما غطى أعلا نخلة فالبلد.. نخلة دهب.

*******

بنحاول نبص عليه في المدرجات بس الكاميرا مش جايباه..

يادوب لو الناس قعدت كده شوية ممكن نعرفه من الفانلة

مدثر سايب الكورة وواقف..

*******

ع الشط -الجديد- مستني المية تنزل عشان يلمح الذكريات، يادوب يشوف مدنة جامع كان جنب داره.. وراس نخلة عالية كان أسمها نخلة دهب، تفكره بحاجات كتير.. كتير أوي.. داره.. أبوه.. نخله.. لعبه.. تراثه.. عضم الجدود.. صوت الدفوف.. فرحة سبوع.. ندرالكرامة.. يوم  الحصاد.. أرضه البراح.. حتى حبه كله راح.

تووووووووووووووت .. صفر الحكم.