246 مشاهدة
بفلوسي ياكلاب
– في أحد البيوت المصرية الهاي كلاس، يدور هذا الحوار بين شاب و”مامته”:
– مامي مامي.. عاوز اخرج فيلم..
– مش دلوقتي يا حمادة، لما تخلص إعدادي الأول..
“بعد إعدادي”
– مامي مامي.. عاوز اخرج فيلم..
– مش دلوقتي يا حمادة، لما تخلص ثانوي..
“بعد ثانوي”
– مامي مامي.. عاوز اخرج فيلم..
– استنى لما اكلملك حد من صحابي يدخلك معهد السينما..
“بعد المعهد”
– مامي مامي.. عاوز اخرج فيلم..
– خد يا حبيبي اخرج الفيلم، وانا هنتجه، ومتنساش كيس الزبالة وانت نازل..!
ده باختصار ملخص الفن المصري، الفن اللي بيتورث من الأب للابن، وم الأم للحفيدة، وتحسهم واخدينه كده وراثة، مش عن طريق الموهبة لا سمح الله، والموضوع ممتد ولحد الجيل التالت، من فنان كبير، كان متزعم أفلام أكشن الأبيض واسود، أيام ما كان فيه سينما “ترسو” في مصر.. ولسه المأساة مستمرة…
الفنان الكبير مكتفاش بأنه عمل فيلم تفصيل لبنته اللي مش موهوبة لا شكلا ولا موضوعا، ولا بنته التانية اللي دخلت مجال الإنتاج من باب “أنا عاجي معاكو كده”، بل فتحوا الباب ل”حفيدته” كمان، واللي سوبهااااان الله، طلعت موهوبة بجد..! الكارثة الأكبر بقى، ف أن فيه حفيد تاني، داخل علينا بسيناريو فيلم، عمره تقريبا 10 سنين، بيعرف في أواسط صناع السينما بالسيناريو النحس…
السيناريو اللي اتكتب تقريبا سنة 2008، وشفناه بيتنقل من إيد أحمد زكي الله يرحمه، لخالد صالح، الله يرحمه، ده حاليا ف إيد “الننوس” الصغير، ابن المنتجة الكبيرة، واللي لسه متخرج أول امبارح من المعهد، ومش فاهم أي حاجة، بس هو صحي الصبح قالها مامي عاوز اعمل فيلم، قالتله مد إيدك في الكومود جنب السرير، هتلاقي سيناريوهات، خدلك واحد بس استنضف 😀
المشكلة الأكبر، إن “الننوس” واخد دور في الفيلم، يعني نوت أونلي هنفتي في الإخراج، بط أولصو هنفتي في التمثيل، ويتوب علينا ربنا، وليحترق صناع السينما المهرة، وأصحاب الخبرة، وذوي الطموح، اللي مش عندهم ماما تنتج ليهم..!
طبعا دي مش أول حادثة إخراجية ولا جريمة فنية تحصل في مصر، قبل كدة خرج علينا النابغة “رامي إمام” صاحب “بوحة”، المخرج الملاكي للزعيم، و”كريم العدل” الكارثة الإخراجية، صاحب المسلسل الملحمي “ريح المدام” وقريبه “محمد أو ماندو العدل” اللي أخرج بفلوس دادي وأونكل…
يا جدعان المشرحة مش ناقصة قتلى..! كفاية مخرجين ملاكي، وكفاية إنتاج بفلوس بابي ومامي ودادي، إدو فرصة للناس الموهوبة، قرايبكم ع العين والراس، بس يتعلموا الأول، بلاش تقهروا المواهب الشابة، والناس المتمرمغة في الفن، علشان خريج سنة 2016 من معهد السينما يعني..! الرحمة..!
الكاتب
ما هو انطباعك؟
