بوجي وطمطم أطول عمل فني في تاريخ الأطفال

بصوا بقى نيجي يمين نيجي شمال ، مفيش عمل فني مصري استمر أكتر من بوجي وطمطم، دى خلصانة عافية كدة، بس عافية مبررة وبالأرقام، بوجي طمطم في منها كام جزء، سامعك ياللي بتقول 6 أو 7، لا إطلع كمان، لا مش 10 لاء، كمان شوية ولا دستة لاء، بوجي وطمطم يا سادة 18 جزء، كارتون العرائس الأكثر شهرة واستمرارية في تاريخ التلفزيون المصري، اللي بدأ في رمضان 1983 وكمل معانا لحد 2009 بعد فترة توقف لطيفة وجه ابن رحمي كمل المشوار.

بوجي وطمطم هما قمة الهندسة الوراثية في الكون، قرد أخته ارنبة وولاد عمه قرود وأخته الصغيره ارنبة باين هي كمان، وعايشين معانا في الشارع عادي واصحابهم بني أدمين، الفكرة المجنونة دي كلها طلعت من دماغين دماغين اتنين بس.

الأول والاشهر هو الله يرحمه المخرج محمود رحمي، محمود رحمي ده عقبال أمالتك كان مترتب على دفعته في كلية فنون جميلة وتقديره ده كان يضمنله وظيفة معيد في كلية فنون جميلة، بس لانه مضروب بالفن في دماغه قرر إنه يروح يشتغل في التلفزيون ولا انه يبقى مدرس في الكلية.

رحمي بيبدأ حياته في التلفزيون وبعدين يتخصص في فن العرائس، بس وقتها كان أستاذ العرائس في مصر والعالم العربي وواحد من اساتدة الفن ده في العالم كان الله يرحمه صلاح السقا أبو أحمد السقا، الراجل ده هو اللي أخرج الليلة الكبيرة وصحصح لما ينجح ومسرحيات عرائس كتير ها يجي يوم أكيد ونتكلم عنه بس خلونا نرجع لرحمي.

رحمي بدايته مع العرائس كان مع برنامج عرائس اسمه توتة وسمسم، لكن عمنا رحمي نوّر أوي بقى والدنيا زهزهت معاه جدا مع بوجي وطمطم لما صمم عرائس بوجي وطمطم وزيكا وزيكو، ومش بس بوجي وطمطم  اللي عاشوا معانا من إبداع رحمي، فاكرين بقلظ أيون بقلظ بتاع ماما نجوى ده اللي كان بيعمل صوته الله يرحمه يارب عمنا سيد عزمي، أهو ده اختراع رحمي برضوا، وياسلام لو تفتكروا كمان أوبريت اللعبة بتاع نيللي، اللي هو أوعي سيبي اللعبة بتاعتي لاء دي بتاعتي يا سلام يا اختي، أهو ده كمان رحمي.

الدماغ التانية بقى اللي كانت السبب في بوجي وطمطم كان الله يرحمه ويبشبش الطوبة اللي تحت راسه المثقف الكبير والشاعر والمترجم والكاتب المسرحي دكتور يسري خميس الراجل ده واحد من أعمدة الثقافة والفن في مصر، بس للأسف قليل جدا اللي يعرفوه، دكتور يسري هو الراجل اللي عمل العالم اللي عشنا معاه 18 جزء هو اللي عمل بوجي وشخصيته ورسمها على الورق وطمطم، هو اللي كان بيكتب و يألف وبيقدر يقنعنا إن القرد تبقى اخته أرنبة وانهم عايشين معانا على الأرض عادي واصحابهم بشر.

دول الدماغين اللي طلعوا بوجي وطمطم، وطبعا إحنا عارفين اللى كان بيعمل دور بوجي هو يونس شلبي، واللي كانت بتعمل دور طمطم هي هالة فاخر، طب مين الباقي بقي؟

بص يا سيدي اللي عمل دور زيكا هو الفنان ماهر سليم ربنا يديله الصحه، واللي عمل دور زيكو هو الله يرحمه عمنا سيد عزمي واللي عملت دور طنط شفيقة هي إنعام سالوسة، واللي عملت دور طماطم هي تغريد العصفوري واللى عمل دور أبو شكشك كان رضا الجمال، أما عم شكشك بقى حبيب قلبي ده ،كان الله يرحمه رأفت فيهم.

إقرأ أيضا

مي كساب في “العتاولة” .. عندما تختمر الموهبة

رأفيت فيهم نفسه صوت من أكتر الأصوات اللي سمعها المواطن المصري في حياته، ده الراجل صاحب الجملة الخالدة اللي كنا بنسمعها في كلمتين وبس ” فوت علينا بكرة يا سيد” وهو ممثل قدير بس ما خدش حقه من الشهرة خالص.

يالا كل حي بياخد نصيبه عموما الضلمة ما بتخوّفش يا سمكة ملونة على رأي طمطم، نشوفكوا بكرة.