حكاية ست الستات ” هياتم ” من البلاج للنجومية

أصلها ما تنفعش يعني، ما تنفعش خالص بصراحة نتكلم عن صواريخ السيما في مصر وما نجيبش سيرتها، الست دي ليها حته في عقل وقلب كل راجل في البلد دي  وتحديدا جيلنا أحنا بتوع التمانينات الجيل اللي فتح عينه كانت هي في قمة انوثتها وتألقها، طبعا انا بتكلم على ست ستات جيلنا، هياتم.

من الأول كده علشان نبقى علي نور هياتم ما بدأتش حياتها رقاصة ولا دخلت معهد تمثيل ولا هوبت ناحية ورشة تمثيل إحنا فضلنا نتفرج على موهبة وانوثة خام بدون أي تدخلات خارجية أو مواد صناعية، أو حتى تهذيب، حاجة كده جاية من عالم تاني خالص.

هياتم اسمها الحقيقي سهير حسن مرزوق اتولدت في 22 يوليو سنة 1950 في الإسكندرية، طب الست هياتم بقى بقت هياتم امتى مين هيتمها أصلا؟ علشان نجاوب على الحدوتة دي لازم نرجع لأواخر الستينات وتحديدا على شط البحر في اسكندرية.
في يوم من أيام الصيف في أواخر الستينات وتقريبا إحنا بنتكلم تقريبا كده في سنه 68 أو 69 كانت قاعدة الست أم سهير وجوزها الأستاذ حسن مرزوق وعيالهم والعيلة على أحد شواطئ الإسكندرية وبالصدفة الشط ده كان بيعمل مسابقة اسمها ملكة جمال الشاطئ، والبنات قدمت للمشاركة في المسابقة لكن سهير ما قدمتش علشان تتفاجئ سهير إن لجنة التحكيم اختارتها هي دون على كل البنات علشان تبقى ملكة جمال الشاطئ.

بعد ما كسبت المسابقة قابلت المخرج المسرحي الكبير حسين جمعة في الوقت ده حسين جمعة كان بيعيد تقديم أوبريت شهرزاد اللي لحنه سيد درويش على مسرح سيد درويش في اسكندرية، وطلب من هياتم إنها تمثل وفعلا وافقت سهير حسن واقنعت عيلتها علشان تبدأ أول خطوة ليها في عالم الفن من على مسرح سيد درويش.

ومع أول ظهور ليها على المسرح لفتت أنظار الكل بلا استثناء وكانت المقالات وردود الأفعال على ظهورها حاجة اخر عظمة من الأخر الصحافة الفنية في مصر طلعت بيها السما، وابتدت هياتم تشتغل في المسرح واحده واحدة، طب الرقص جه أمتى؟

الرقص جه لما قابلت وكيل الفنانين المشهور جدا وقتها ” عرابي” اللي زارها وسألها إنتي بتعرفي ترقصي؟ قالتله طبعا، فقالها طب ما تقومي توريني كده، قامت سهير واتحزمت وهاتك يا رقص، هنا عم عرابي تنح وقال إنتي حاجة عظيمة جدا، ولازم ترقصي، طب يا عم يهديك يرضيك، المهم الست هياتم قدرت تقنع أمها بالفكرة وفعلا عرابي جابلها الناس اللي بتفصل بدل الرقص وقيدها في المكتب عنده علشان يقدمها في حفلة من الحفلات.

لو قولنا إن هياتم دي الحظ كان ماشي في رجليها محدش ها يصدق، لكن دي الحقيقة لما خلاص ثبتت الرؤية وإن سهير حسن ها ترقص قرر عرابي إنه يشوفلها اسم شهره كدة وطلع الإسم اللي عارفينه كلنا دلوقتي “هياتم” لكن إيه أول حفلة قدمتها هياتم كرقاصة وأول ظهور ليها كرقاصة؟

إقرأ أيضا

ظاهرة هياتم .. “قبضاي” الوسط الفني الذي حيّر الصحافة

أول ظهور ليها كان في حفلة الربيع مع عبد الحليم حافظ ورقصت على أنغام اغنية زي الهوا، في الفترة دي ست الستات دخلت السينما من باب إنها رقاصة وممكن تمثل مشهد أو اتنين وقعدت تشتغل رقاصة في الافراح والكباريهات لمدة 6 سنين لحد ما قررت إنها ها تبطل رقص في الكباريهات والأفراح وها تتفرغ إنها تشتغل ممثلة.

وفعلا بدأت هياتم رحلتها كممثلة واشتغلت مع مخرجين عتاوله على راسهم حسين كمال ومحمد عبدالعزيز وعمر عبدالعزيز ومحمد خان وسمير سيف وغيرهم كتير من المخرجين وفضلت طول السبعينات والتمانينات واحده من أشهر النجوم في السينما المصرية وكمان النص الأولاني من التسعينات كمان، وفي 27 يوليو 2018 سابتنا ست الستات هياتم وماتت بعد معاناة قصيرة مع مرض السرطان، الله يرحمك يا ست