عفوًا داعمين إدريسا أجاي.. الإنسانية مش بالقطاعي

إدريسا أجاي لعيب سنغالي في نادي باريس سان جيرمان، إدريسا أجاي بيرفض يدعم مجتمع الريمبو، عشان كده بيعتذر ويتغيب عن الفريق لما تيجي الجولة اللي بتضاف خلالها ألوان علم الرينبو لتيشيرتات اللعيبة، وبيعمل ده من سكات تحت بند “أسباب شخصية”.

ذكريات ذات مغزى

في ذات فترة من فترات حياتي اشتغلت في مصنع كريستال فشارع جسر السويس، صحاب المصنع كانوا إسلامجية، فكان الشغل كله يقف وقت الصلاة والناس تروح تصلي، كنت وأتنين تانيين بنستغل وقت الفراغ ده في شرب الشاي والمعسل في غرزة شاي في وش الباب الخلفي للمصنع، الأتنين دول الكبير فيهم صنايعي مهم في المهنة والصغير صبيه.

تقريبا مافيش حد من الإداريين والمشرفين، اللي كلهم دقون، إلا وكلمني في موضوع الصلاة.. والموضوع تدرج من التلميح للكلام للنصيحة للأمر بالمعروف لتحقيق إداري لتخييري بين الصلاة والاستمرار في الشغل، كل ده ومافيش حد بيكلم الأسطى ولا صبيه نص كلمة.. لا عن الصلاة ولا عن التدخين في حيز “التسجة” بتاعتهم، اللي متركب فوقها شفاط مخصوص، ده رغم أن التدخين ممنوع في المكان كله.. وفيه حافز + علاوة ثابتة لكل مقلع عن التدخين.

بديهيات لابد من إقرارها

نتفق أو نختلف على موقف إدريسا لكنه يبقى في الأول والأخر إنسان حُر، من حقه يكون جاهل ويخلط بين دعم الاندماج المجتمعي وبين إعلان الإنتماء أو الدعوة للإنضمام لجماعة ما، زي ما من حقه يكون فاهم صح بس مش عايز يدعم حق الجماعة دي في الحياة بشكل متساوي مع باقي البشر لإنه مؤمن إن سلوكهم ما هو إلا لعنة إلهية.. أو لأي سبب ما في الحياة، لإنه ماطلعش خد موقف عدائي منهم أو من دعمهم، فقط رفض المشاركة بدون إبداء أسباب ولا إفصاح حتى عن رأيه.

نتفق أو نختلف منظومة الكورة بتديرها مؤسسات مستقلة لها لوايحها التنظيمية المعلنة، بالتالي كل اتحاد يقدر يدعم أو لا يدعم ما يشاء (طبعًا فيه حدود دنيا وقصوى بتحددها الاتحادات القارية ومن فوق الكل الفيفا)، فنلاقي مثلًا الدوريات الأوروبية بتدعم أوكرانيا.. واتحادات الشرق الأوسط تدعم فلسطين، وماحدش فيهم عمل العكس.. ومافيش حد يقدر ياخد موقف رسمي من اللي مادعمش التانيين.

 بين كاس ريبري وألوان أجاي

القاعدة العريضة من مسلمين الشرق الأوسط جعلوا إدريسا بطل شعبي، والاتحاد الفرنسي نصب له محكمة تفتيش، دوشة وتشنج حوالين موقف صاحبه اختار إنه مايخدهوش بشكل علني، زي ريبيري كده لما رفض يتصور بالبيرة زي باقي زمايله، لإنها خمرة وحرام وكده… هو حر برضك.

المتشابه بين الحالتين أن الأتنين اللعيبة ماعملوش ظيطة.. خدوا موقفهم من سكات، لا ريبري زايد على زمايله ولا أجاي أعلن عن أي رأي ضد حقوق المثليين، وفي الحالتين جماهيرنا العريضة احتفلت احتفال البائس بلا أمل.

الفارق بين الحالتين أن الأولى لشخص رافض يشيل مشروب والتانية لشخص رافض أن المختلف عنه يعيش زيه، وفي الحالة الأولى ماحدش كلم ريبري وخد الصورة مع باقي زمايله من غير الكاس عادي، أما في التانية فالمؤسسة المنظمة للبطولة قررت تحقق مع أجاي.

سياسة قلب الشراب

السياسة المذكورة هي ألطف طريقة لفهم واستبيان منطلقات مواقف الأشخاص وهل هي إنسانية منحازة للحريات ولا عنصرية منحازة لمعسكر بعينه وهتتغير لو المعطيات أتبدلت، تعالوا نطبق السياسة دي على الموقف الحالي.

أنا مثلًا شايف أن الموقف الرسمي ضد أجاي مبالغ فيه ويندرج تحت بند التفتيش في النوايا والاعتداء على الحرية الشخصية للاعب وإجباره على المشاركة في فاعلية هو مش عايز يشارك فيها. فالسادة المتضامنين معاه.. هيكون موقفهم إيه لو لعيب هنا ربط علامة الريمبو على دراعه في ماتش؟، هل هيشوفوا أن ده حقه ووجه نظره وقناعاته اللي مش من حق حد يجبره عليها؟ ولا هيركبوه الحمار بالمقلوب؟

بلاش.. لو لعيب جاب جون وهيص عادي ولما حد من زمايله نصحه يسجد رفض؟ هيكون الموقف منه إيه؟

الإجابة ع السؤال ده مهمة، مش عشان هتخلي حد يغير موقفه ولا حاجة… إنما عشان الشخص مننا يعرف يفهم نفسه، فمايطلعش يتكلم عن حرية الرأي وحقوق الإنسان ويفتكر نفسه غاندي، إنما يجيب من الآخر ويقول نفس كلام أكثر الأمراء لزوجة.

اللزوجة وتقاطعات المصالح

على ذكر السيد تريكة ومواقفه وتصريحاته الشعبوية الشهيرة، منتظرين تعليقه ودعمه ده خلال الستوديو التحليلي، زي ما دعا اللعيبة العرب والمسلمين في الدوري الإنجليزي إنها ترفض المشاركة في الجولات المماثلة في البريميرليغ، أصول يدعم الشاب إدريسا ويشكره ع الهوا، ولا هيلتزم بسيساة الطناش اللي ملتزمة بيها شبكة bi sport تجنبًا لسيرة الموقف الرسمي لإدارة PSJ القطرية؟

موقف إدارة PSJ

إدارة PSJ قالت في تعليقها على الجدل اللي داير: أن القرار الذي اتخذه جايي هو «قرار فردي»، وأكدت أن النادي «حريص دائمًا على محاربة جميع أشكال التمييز».

موقف الاتحاد الفرنسي

ليكيب الفرنسية أعلنت أن مجلس الأخلاق الوطني التابع لاتحاد الكرة الفرنسي، وجه خطاب للاعب السنغالي إدريسا أجاي قال فيه: «هناك حالتان، الأولى أن هذه الافتراضات لا أساس لها من الصحة، وهنا ندعوك دون تأخير للتحدث علانية من أجل إسكات هذه الشائعات، وندعوك لإرفاق ردك بصورة لك، وأنت ترتدي القميص المعني، والحالة الثانية أن تكون هذه الشائعات صحيحة، وفي هذه الحالة نطلب منك أن تكون على دراية بنطاق تصرفك والخطأ الجسيم الذي ارتكبته».

إقرأ أيضا

ملف أزمة الأغنية المصرية 3 : التوزيع الموسيقي … عصر الموسيقى البلاستيك

«الكفاح ضد التمييز الذي تتعرض له الأقليات المختلفة، مهما كانت، هو معركة أساسية ودائمة سواء كان لون البشرة، أو الدين، أو الميول الجنسية، أو أي اختلاف آخر، فكل أشكال التمييز تقوم على نفس الأساس، وهو رفض الآخرين لأنهم يختلفون عن معظمهم».

«وبرفضك المشاركة في هذه العملية الجماعية، فأنت تؤكد صحة السلوك التمييزي، ورفض الأخر، وليس فقط ضد مجتمع المثلية».

وختم الاتحاد الفرنسي خطابه: «تأثير كرة القدم على المجتمع وقدرة اللاعبين على تمثيل نموذج يحتذى به لمن يعجب بهم، يمنحنا جميعا مسؤولية خاصة».

مثال ختامي

الجواب عبر بوضوح عن نسق تفكير ومنطلقات موقف ورؤية العالم بالنسبة لإدارة الاتحاد الفرنسي، بشكل واضح الناس قالوا كلام يلزمهم يكون ده نفس موقفهم لو لعيب كسر أو كان حريص على تفادي المشاركة في التقليد المتبع قبل بداية كل ماتش بالقعاد على ركبة ونُص في رمزية لنبذ العنصرية اللونية.

ختامًا.. بشكل شخصي نفسي الناس حدانا تفهم أن المجتمعات هناك شايفة أن المثليين أقلية تستحق الدعم زيها زي المسلمين والمهاجرين العرب بالظبط، فموقف لبس ألوان الريمبو مصدره نفس مصدر موقف نادي بلاكبيرن الإنجليزي لما فتح الملعب لمسلمين عشان يصلوا فيه العيد.