قريبًا.. “المشوار” بث مباشر

الموضوع كبر وتقريبا خرج عن السيطرة، التصوير في مسلسل المشوار شغال لغاية لحظة نشر الكلام ده.. ويمكن لحد قرايته كمان، فريق العمل دلوقتي متقسم لخمس وحدات منفصلة.. كل واحدة منهم ليها مخرج ومدير تصوير، مش عارف هل محمد ياسين ماسك وحدتين ولا المخرج المنفذ مدور وحدة.

التتر صاحي

بعد ما تايتل محمد ياسين تم تعديله في التتر من مخرج إلى إشراف عام حصل كمان تعديل.. في تايتل محمد فريد من تأليف إلى إشراف على الكتابة، ده غير تعديلات تانية في تعريف ومهام كل الصناع الرئيسيين (كتابة، إخراج، تصوير، مونتاج) للعمل تقريبا.. واختفاء أحدهم وظهور آخرين.

يهدها اللامركزية

اللامركزية حلوة مافيش كلام.. بس الكلام ده في السياسة مش تصوير عمل درامي، في السياسة هتحقق مكاسب وتوفر وقت ومجهود.. إنما في الدراما هتبوظ الراكورات وتفكك ترابط الأحداث والتفاصيل، لأن المشهد الواحد ممكن يكون مقسوم بين أكتر من فريق عمل “وحدة تصوير”، التقسيم مع الضغط يزيدوا من فرص حدوث أخطاء ماحدش ممكن يكتشفها غير المخرج/المونتير المركزي، وهنا هيبقى اكتشاف متأخر.

مثال1

الصورة ع اليمين من مشهد “نهار خارجي” ماهر مستني ابنه رحيم يخرج من باب عمارة “شقة عزة” عشان يسلم عليه وياخد منه فلوس، الصورة ع الشمال من مشهد “نهار داخلي” في شقة عزة.. وليد داخل الشقة فيصادف رحيم وهو خارج.

طبقًا للوضع المآساوي الداير حاليا.. المشهدين دول اتصوروا عن طريق وحدتين عمل غير بعض، فعادي جدًا وحدة الخارجي رسمت مكان ماهر بالوضوح ده لعين أي حد طالع العمارة.. لإنهم مش متواصلين مع وحدة الداخلي اللي نفذت مشهد متصل بيظهر فيه وليد لسه فايت من باب العمارة ماكملش دقيقتين. فينتج عن ده خلل مزدوج.. مش بس مكان ماهر بقى غير مناسب “الصح كان يبقى مستخبي”، إنما كمان خضة ورد فوق بقت عريانة “مش متخدم عليها”.. إن كان بأن ماهر واقف مستخبي أو لقطة إضافية نشوف فيها دخول وليد للعمارة بدون ما يلمح ماهر، بس لا فيه تركيز كافي لتلافي الأخطاء الدقيقة دي ولا فيه وقت لخدمة التفاصيل أو تلافي الأخطاء.

الكتابة ع الهوا

الأسلوب ده ينفع في حالات زي المسلسلات الطويلة جدًا إن كانت متصلة زي الجرئ والجميلات أو متصلة منفصلة زي هرقليز خصوصًا لو العمل كوميدي زي Friends، إنما يبقى مسلسل عادي 30 حلقة وتبقى حلقاته فيها مشاهد بتتكتب ع الهوا ومن أشخاص مختلفين كل حد منهم بيتحرك مع وحدة تصوير مختلفة.. وكلهم مضغوطين بشكل مرعب.

فماحدش ينتظر إلا وقوع والمزيد من الوقوع، نفس المشهد اللي خدناه كمثال من شوية.. الداخلي منه ينفع نموذج عملي لكارثية الكتابة ع الهوا.

مثال2

يبدو أن اللي كتب حوار المشهد ده ماعندهوش فكرة بمستوى علاقة الشخصيات ببعض، فحط جملة عجيبة على لسان ورد عشان يفتح بيها الحوار بينها وبين وليد.

وليد ماكنش في مشوار وأتأخر.. بالعكس ماحدش يعرف إنه جاي أساسًا، ومن الأصل مافيش بين الشخصيتين (ورد-وليد) ما يستدعي أنها تسأله سؤال بالصيغة دي ولا بالأداء ده.. اللي يحسسنا إنه متأخر وهي بتلومه. قبل ما المشهد يخلص فجأة وليد يحلف ورد ويشهدها على حواره مع عزة.. عن طريق جمل وأداء اللي يتفرج عليه يفتكر الأتنين دول بينهم أتفاق.

الضغط يولد الانفجار

كمان للآسف علي صبحي “وليد” كان باين عليه اللخبطة وفقدان إحساسه بمكانه في مسار الأحداث، ده غير أن التسميع خد من تركيزه أكتر من الأداء. وعلى صعيد أخر المقدم علاء صبغ وروق على حاله.

حاليا صناع العمل بقوا في وضع لا يحسدوا عليه بالمرة، من ناحية مضطرين يمطوا عشان يغطوا زمن الحلقة.. فنشوف مشاهد مبالغ في زمنها، عن طريق حشو جمل حوارية وتشبيع لحظات ونظرات شكلها حلو بس مابتقدمش جديد.

ومن ناحية تاني مضطرين يشدوا إيقاع المسلسل عشان يقفلوا الأحداث كلها في الكام حلقة الباقيين، فمن ناحية الحلقات مليان مشاهد ممطوطة ومن ناحية تانية بتظهر تفاصيل مفاجأة عشان تنقل الأحداث، زي وصولات الأمانة اللي ظهروا من العدم عشان شامل يهدد بيهم عزة.

إقرأ أيضا

عتبات البهجة .. بين الخبرة والأولد فاشون شعرة

الانفجار

واحد من المشاهد المهمة حركيًا ودراميًا، هو مشهد ضرب ماهر لشامل، بداية حلقة 23، المشهد ده كان مستحيل يتم كروته أكتر من كده، تعالوا نراجع المشهد مع بعض كده واحدة واحدة.

في الوقت اللي ماهر رايح على شقة عزة (بدون اتصال على تليفون ورد) ياخد مراته وأبنه لمكانه الجديد.. تكون ورد بتستعجل رحيم عشان يلحقوا يروحوا مشوار غير معلوم لينا، في نفس الوقت شامل رايح يدور على عزة اللي خرجت في مشوار غير معلوم لينا.

الوضع قبل المشهد كان فيه شوية تفاصيل تخلي حصوله بالشكل ده عبثي تمامًا

• ورد طاردة ماهر من الشقة، المعلومة دي مش عند شامل، بس الطرد كان قدام عزة وبسببها.
• ورد وماهر اصطلحوا ولو نسبيًا.. خلال الهرب من رجالة وجيه “دي معلومة ماتعرفهاش عزة”.
• ماهر عرف أنهم مطلوبين رسمي للتحقيق… فبلغ ورد إنها ماتخرجش من الشقة.

بناء عن 1 و2 ماينفعش ماهر يروح على هناك عمياني، خصوصًا وأن لسه ورد هتلم حاجتهم ويمشوا، وبناء عن 3 ماينفعش ورد تخرج في مشاوير غير مبررة، وبناء عن ملابسات المشهد نفسه.. مافيش ما يستدعي أو يزق علاقة ورد وعزة يحصل فيها كده، كان عادي تقولها أن شامل عاكسها أو مد إيده عليها.

ختام

للآسف العمل اللي بدء بداية جميلة هينتهي نهاية مؤسفة، لسه التصوير شغال والكتابة دايرة ع الهوا والغلطات هتزيد أكتر وأكتر لأن الزنقة بتزيد أكتر وأكتر، ولأن بالإيقاع ده وارد الحلقة تلاتين تبقى أول دراما رمضانية الجمهور يتابعها عبر بث مباشر.. فوراد كمان أنها تبوظ خالص ويضطروا يعلنوا عن جزء تاني من المشوار.