مسلسل اللعبة 2 وتحدي الجواز .. قراءة نقدية من الحلقة السادسة إلى التاسعة

المرة دي هنتكلم عن أكتر من حلقة مع بعض في مسلسل اللعبة 2 عشان نقدر نحصر الحدث الموحد اللي بينها (التحدي)، الحلقة السادسة مافيهاش حدث كبير إنما هي تمهيد أو فرش لأحداث جاية في السكة، بس ده مايمنعش أن كان فيها تفاصيل لطيفة تستحق الإشادة وأخطاء تستاهل التوضيح.

اقرأ أيضًا 
اللعبة الجزء الثاني : الحلقة الأولى .. الضحك للضحك

هبدء بالأخطاء بما أن الحلقة بدأت بيها:

• أول مشهد وسيم بيحاول يقنع إسراء يبطلوا لعب فقال لها إنها أخت كبيرة لـ مدبولي وهتبقى أخت كبيرة كمان للبيبي القادم في السكة.. رغم أن شويكار قالت إنها حامل في 3.
• خبر الحمل أتقال وهمه سهرانيين بالليل في مشهد الضحك والصبح بسيوني وصل الشغل قبل وسيم لحق أمتى راح مع مراته للدكتور وعرفوا أن الحمل كاذب؟
• مشهد البنك حصلت غلطة في تبديل أرقام الشبابيك.. (الشباك اللي يمين مازو).
• في مشهد اختيار المشروع شيماء قالت على سعدون إنه مدرس موسيقى.. فبقيت مش عارف هو مدرس زي ما بتقول ولا ساقط قيد زي ما هو قال في القسم؟
• في أفتتاح السنتر مازو بيعد الفلوس ويقول أن كده كله تمام ومافيش ضرايب هتعرف تحاسبهم، بعيد عن أن مافيش سبب يوضح ليه الضرايب مش هتقدر تحاسبهم.. فأصلًا الغرض من غسيل الأموال هو أن الشخص يعرف يدفع الضرايب.
• في نهاية حفل الافتتاح مازو قال على وسيم إنه عاطل ومع ذلك سكت له.. هو نسي إنه أشتغل؟
• الخطأ الأهم هو خطأ زمني رهيب.. مازو فكر في المشروع بالنهار وافتتحه في نفس اليوم بالليل.

الحلقة بقى كان فيها شوية حاجات لطيفة زي مشهد حمام سباحة الأطفال فكرته دمها خفيف، وتطور الأوضاع في الفندق الحقير برضه معمول حلو ويبشر أن العالم ده هيبقى فاكهة العمل، كمان عجبني زيادة مساحة شخصيات تانية زي عصفورة وتهاني.. وأظن شخصية عصفورة محتاجة حد كوميديان، زي محمد فهيم مثلًا أو أي حد مايكونش بيتعامل بوصفه جاي يسد خانة مش مهمة.. إنما حد يشيل منطقته زي شخصية رجب المتميزة جدًا، واللي أظنها هتكون نقطة إنطلاق لحسام داغر.

اقرأ أيضًا 
مسلسل اللعبة 2 .. حكاية الأخطاء الستة الموجودة في الحلقة الثانية

أما أهم حاجة في أحداث الحلقة دي واللي خلاني أضمها مع اللي بعدها في موضوع واحد هو نهايتها بالإعلان عن التحدي الجديد.

مع بداية الحلقة السابعة التحدي الجديد بينطلق بـ”بلوف” مسخرة.. صريخ ضحك، تغيير الجارة عبقري جدًا واختيار رانيا يوسف موفق جدًا، وإكرامًا للدخلة البديعة هاذكر إيجابيات الحلقة دي الأول.. وأول حاجة هي أداء سامي مغاوري وأحمد فتحي.

اقرأ أيضًا 
مسلسل اللعبة 2 الحلقة الثالثة “لماذا كان ختامها مُوَفَّق جدًا ؟”

فقرة الـV.O خلال اجتماع الأزواج ذكية ودمها خفيف.. والأهم أن زمنها متقاس بالمازورة، حاجة كده مافيهاش ثانية “لونجير”. كمان مشهد وسيم والـ”بيست فريند” بتاعته فكرته عظيمة ومضحكة.. الحلقة دي عمومًا بروزت علاقة وسيم وإسراء أكتر، اللي لغاية دلوقتي أفضل علاقة بين شخصيتين.. هي وعلاقة سعدون وزيكا، ييجي بعدهم بمسافة علاقة مازو بابنه كريم.. وأتمنى مساحة الولد ده تزيد لأن شكله كده ظريف وبيعرف يمثل.

كل محاولات التقرب من سوسن دمها خفيف على مستوى الأفكار بالأساس ثم الإيفيهات تيجي كتكملة للضحك مش الأساس، ودي ميزة كبيرة، عجبني كمان قوي تنفيذ لعبة السكاكين.. تقريبًا متنفذ أحلى من شمس الزناتي.

نخش بقى على عيوب الحلقة دي عشان نلحق نشوف اللي بعدها:

• نسرين جاية تشحت سلم بالشياكة دي كلها أزاي.. طب حتى تجيب البواب معاها، وبعدين هي جاية تشحت سلم ولا جاية تدور على رئيس اتحاد الملاك (أنا عن نفسي أتوقع أن كل ده هيكون له مبرر في أخر التحدي.. بس لحد دلوقتي دي أخطاء).
• مشهد الأسانسير شهد خطأين على بؤ واحد.. مازو لما غريب البواب أتصل عليه لف أيده العكسية عشان يرد من الودن الأقرب ليها.. وبيتكلم عن الدبل وهو مش لابس دبلة.
• وسيم خلال شرحه الخطة لفريقه ماسك قلم أحمر والكلام مكتوب على الورق بلون إسود.
• وسيم عرف لقب سوسن البهادوري وقالُه لفريقه وهو لسه مايعرفهوش.. بيعرفه بعد كده من غريب.
• مشهد تصنت شيماء على مازو وسعدون الجغرافيا بتاعته بايظة، تحسها واقفة تتصنت من بره السنتر.. ولما تيجي تدخل عصفورة يتعامل معاها إنها مشيت ويدي رئيسه التمام.. وحاجة أخر لخفنة.
• مازو بيحاول ياخد معلومات من غريب رغم إن نسرين حكت له عن حياتها في الأسانسير.. تقريبا كده حصلت غلطة في المونتاج ومشهد أستجواب رجب أتحط متأخر عن مكانه.

بعد رصة الغلطات دي أحب أشيد قوي بالتواريخ المظبوطة على التايم لاين بتاع نسرين.. وأشاور على خطأ كارثي العمارة دي غالبا مافيهاش دور سابع.

التحدي بيوصل لذروته في الحلقة التامنة.. مواقف مضحكة وإيفيهات لذيذة، كل محاولات الفريقين دمها خفيف لدرجة المسخرة.. خصوصًا مشهد المول، وأضعفهم مشهد العصافير، وكالعادة مشاهد الفندق الحقير حلوة.. وأحلى ما فيها الحلقة دي فكرة الشوك والمعالق واستخدام كارت الشاب بتاع دبلومة التنكر.. لطيف جدًا.

اقرأ أيضًا 
مسلسل اللعبة الجزء الثاني .. قراءة نقدية للحلقة الرابعة والخامسة

بس للأسف الحلقة فيها مشاهد ملهاش لازمة زي مشهد أتفاق مازو وفريقه على باب المطعم، وكمان حصلت أخطاء لا تغتفر.. زي فلوس مشهد المول اللي ماتلمتش من الأرض أو أستقبال جميل لمكالمة بسيوني في حضن الجارد بتاع المطعم، والخطأ الأهم هو وصول معلومة العزومة ومكانها لوسيم.. أه شخصية غريب متقدمة من الأول إنه مالهوش أنتماء وممكن يعترف بسهولة بالترغيب أو الترهيب، بس هو عرف بالمعلومة أمتى؟ ومن مين؟.. خصوصًا وأن مازو ماخرجش من باب العمارة أصلًا.

إقرأ أيضا

الحشاشين.. هل الصباح هو الرجُل “الإخيه”؟

الحلقة التاسعة

وقفلة مجنونة جدًا لتحدي الجوازة، القفلة عالية جدًا على مستوى الفكرة وكمان التنفيذ.. عادة الأعمال الكوميدية مابتحتويش على مشاهد عنف صريحة، وهو اللي تجاوز المخرج عنه في مشهد ضرب وسيم وطلع مشهد عنيف بس مشي مع الأحداث والكوميدية غطت ع العنف زي ما هو مطلوب في النهاية.

تفاصيل الجوازة والفرح كِرّف صاعد بسرعة الصاروخ، حيلة المأذون الديلفري  والعالي قوي بقى فقرة “خلي بالك من زوزو” والجدية العبثية اللي أتعاملت في أداء عارفة عبد الرسول لشخصية شويكار.

حلقة متلاحقة المشاهد والأحداث، الجوازة نقلت الدراما لمنطقة تانية ومستوى أكتر تعقيدًا، بدون الأخلال بالمنطق أو الكوميديا، ودخول شويكار على خط اللعب زود شخصيتها اللي بدورها نشطت الجو العام أكتر، ووصل الكِرف لقمته مع قفلة الحلقة باكتشاف الفخ اللي وقع فيه وسيم.