مسلسل اللعبة الجزء الثاني .. قراءة نقدية للحلقة الرابعة والخامسة

نواصل استكمال القراءة النقدية لـ مسلسل اللعبة الجزء الثاني ومع الحلقتين الرابعة والخامسة، فالبداية بتقديم جيد ومشوق لشخصية زيكا “زكريا”، وفعلًا بنشوف كراكتر مرسوم كويس وبيتلعب بشطارة من إسماعيل فرغلي، ومن ناحيته بيتألق أحمد فتحي في أداء ردود أفعال بسيوني على مهازل السيد زيكا، أداء أسس من خلاله لشكل العلاقة بين الشخصيتين، واللي واضح إنه هيستمر معانا لفترة مش قليلة وهيكون واحد من مصادر الضحك اللي صناع العمل هيعتمدوا عليها كتير، وبصراحة الأتنين بيأدوها حلو.

يعيب المشهد بس خطأ أن الشخصيات كانت بتتكلم عن كلية مش معهد سياحة وفنادق، وخطأ (راكور) بأختفاء الجيتار من على كتف زيكا أو تحوله إلى شنطة وسط.

تقديم عالم فندق “وادي الحمام” أتعمل حلو قوي قوي، لفتني أن قد ما العالم المحيط بالفندق شكله فيك جدًا على قد عالم الفندق ما شكله حقيقي، العالم اللي أتقدم خلال فوتومونتاج أقل ما يتوصف به إنه هايل، وظهور شخصية رجب ابن شناكل، اللي بيلعبها بحيوية ونشاط حسام داغر، أداء هايل أقدر أقول إنه كان سبب كبير لشد إيقاع المشاهد اللي ظهر فيها.. ساعده على ده حيوية عالم الفندق عن باقي عوالم المسلسل.

الحلقة دي مافيهاش حاجة مميزة غير لعب الفنان سامي مغاوري بأداء بسيوني قبل التورط بشكل أوفر وبأداء رايق قوي بعده.. ده غير الأداء المتميز لرجب ابن شناكل، ومافيش في الدراما غير بدء التحدي الجديد المكمل معنا للحلقة الخامسة.

اقرأ أيضًا 
اللعبة الجزء الثاني : الحلقة الأولى .. الضحك للضحك

الحلقة الخامسة هي ألطف حلقة لحد دلوقتي، ساعد فده الأعتماد على المواقف والحركة أكتر من الإيفيهات، تحدي الإضحاك أترسم بروقان.. تصاعد بمعدل حلو ومواقف فعلًا مسخرة، كمان تخلل المحاولات مشاهد دمها خفيف، زي مشهد السلم اللي اعتبرته درس من عارفة عبد الرسول في تقديم كوميديا بدون إيفيهات، طريقة تخليه مهم لأي عمل كوميدي.

اقرأ أيضًا 
مسلسل اللعبة 2 .. حكاية الأخطاء الستة الموجودة في الحلقة الثانية

مشهد عابه بس تصرف بسيوني بوصفه متفاجئ بوجود شويكار رغم إنه خارج من جوه على صوتها هي.

إقرأ أيضا

هل تفادينا السيناريو اللبناني بإسقاط الجماعة؟

مشهد سقوط جميل أتلعب كويس قوي، تفاهة الموضوع مع الأوفر الشديد في الأداء مع الموسيقى التصويرية كلها خلقت حالة من الضحك. أظن ساعد في ده أن بنية المشهد مش محتاجة لشخصيات ثانوية أصلًا، ووصلنا لقمة المسخرة مع اجتماع العيلة في بيت شويكار، ضحك أداء وإيفيهات وهلس ومواقف وأكسسوار.. مسخرة. خط الأزواج كان أعلى بكتير من خط زيكا وجميل، تنوع الضحك في مشهد خروج شيماء عالي ومشهد اجتماع العائلة والحيوية اللي فيهم خلتهم غطوا على مشاهد الخط التاني بدرجة كبيرة.

تنتهي الحلقة بنهاية تحدي الضحك بفريق فايز وفريق مهزوم.. ونشوف الحلقة الجاية من اللعبة 2 جايزة الفريق الكسبان وغالبًا هنشوف بداية تحدي جديد لأن مش معقولة بعد كل ده مازو ووسيم هيتراجعوا.

اقرأ أيضًا 
مسلسل اللعبة 2 الحلقة الثالثة “لماذا كان ختامها مُوَفَّق جدًا ؟”